«Heta biada». Łukašenka nazvaŭ samuju vialikuju niebiaśpieku dla UNS u budučyni
Alaksandr Łukašenka miarkuje, što z nastupnym prezidentam UNS nie zmoža padzialić uładu.
Alaksandr Łukašenka, jaki nie tolki ŭzurpavaŭ pasadu kiraŭnika dziaržavy, ale dadaŭ da taho i pasadu staršyni UNS, na naradzie pa padrychtoŭcy Usiebiełaruskaha narodnaha schodu nazvaŭ samuju vialikuju niebiaśpieku dla UNS u budučym.
Łukašenka zajaviŭ, što ŭ hetym hodzie «ŭpieršyniu» da UNS nastolki pilnaja ŭvaha i pa sutnaści, i pa formie. Tamu treba, skazaŭ jon, vypracoŭvać styl raboty UNS i prezidyuma UNS, jaki «zachavajecca nazaŭždy».
Mahčyma, na jaho vypracoŭku spatrebiacca hady, ale pačynać treba ŭžo zaraz, miarkuje Łukašenka.
«Samaje niebiaśpiečnaje dla nas (ludzi heta prymiecili, asabliva śpiecyjalisty), kali UNS (nie siońnia, viadoma) potym ź inšym prezidentam pačnie kanfliktavać. Heta biada. Nijakaha kanfliktu być nie pavinna. Tamu, vybudoŭvajučy pa sutnaści rabotu UNS i jaho prezidyuma, treba rabić tak, kab kožny zajmaŭsia svajoj spravaj», — padkreśliŭ Alaksandr Łukašenka.
«Prezident jość prezident. Heta kiraŭnik dziaržavy, jaho paŭnamoctvy dziesiacihodździami ŭžo, hruba kažučy, pa-narodnamu, ustakanilisia, i nie treba heta razburać. Heta daje peŭny efiekt», — skazaŭ jon.
UNS, pavodle jaho słoŭ, pavinna zajmacca bolš bujnymi, hłabalnymi pytańniami. «My damovilisia, heta ŭžo žalezabietonna, što jano vyznačaje napramki pracy dziaržavy na ahladnuju pierśpiektyvu, stratehičnyja zadačy», — dadaŭ Łukašenka.
Heta nie značyć, miarkuje jon, što ŭ kampietencyju UNS nie buduć uvachodzić taktyčnyja pytańni. Ale schod nie pavinien kankuravać ź niejkimi orhanami, jakija biehajuć pa krainie i kantralujuć niejkija pracesy, papiaredziŭ Łukašenka. Hetaha, pavodle jaho słoŭ, ni ŭ jakim razie nielha dapuścić.
«U nas tut niekatoryja chvarejuć hetaj prablemaj — jak uładkavać pracu UNS, delehataŭ… Prapanujuć kantralavać usio i ŭsia. Hetaha dapuścić nielha. U kožnaha svaje abaviazki i paŭnamoctvy. Kali my budziem parušać peŭny paradak, my pryjdziem da sumnych nastupstvaŭ», — kaža jon.
Taksama važna, pavodle Łukašenki, vyznačyć miesca prezidyuma UNS nie tolki ŭ sistemie dziaržaŭnaj ułady ŭ krainie, ale i ŭ hramadstvie ŭ cełym. A taksama pryniać vyvieranyja rašeńni pa kolkaści aparatu UNS. «Lišnich ludziej tut być nie pavinna. Usio treba rabić zychodziačy ź nieabchodnaści i z tych abjomaŭ pracy, jakaja kładziecca na aparat, prezidyum i UNS. Ja chaču, kab vy padychodzili nie tolki tvorča, ale i pa-haspadarsku da hetaha pytańnia», — aryjentavaŭ jon.
Refierendum pa novaj Kanstytucyi z šyrokimi paŭnamoctvami UNS adbyŭsia ŭ lutym 2022 hoda. Paśla pratestaŭ 2020 hoda Łukašenka mierkavaŭ, što novaja kanstrukcyja dazvolić jamu pravieści niekatoryja źmieny ŭ hramadstvie i zachavać pry hetym uładu. Ale, akazałasia, što staraja kanstrukcyja z dapamohaju vializarnaj armii siłavikoŭ i biaskoncych represij biezdakorna pracuje. Što ciapier rabić z novymi šyrokimi paŭnamoctvami UNS, prapisanymi novaj Kanstytucyjaj, Łukašenka, vyhladaje, nie viedaje.
Kamientary