Padčas načnoj ataki na Tahanroh ŭkraincy źniščyli dva ŭnikalnyja rasijskija samaloty
U vyniku načnoj ataki na Tahanroh na terytoryi Tahanrohskaha avijacyjnaha navukova-techničnaha kompleksa imia Bieryjeva było źniščana 2 samaloty, a taksama naniesienyja straty infrastruktury. Heta paćviardžajecca spadarožnikavymi zdymkami.
Adzin z hetych samalotaŭ — A-60, ekśpierymientalnaja latajučaja łabaratoryja, jakaja vykarystoŭvałasia dla vyprabavańniaŭ łaziernaj zbroi.
Spadarožnikavaje fota, zroblenaje try dni tamu, 22 listapada, pakazvaje, što na ŭčastku aeradroma, jaki paciarpieŭ ad udaru, stajaŭ mienavita samalot A-60. Na spadarožnikavych zdymkach taksama bačnyja ciepłavyja ślady, zafiksavanyja sistemaj manitorynhu pažaraŭ NASA FIRMS. Samalot lohka paznać pa niezvyčajnym nasavym abciakalniku, u jakim mieścicca śpiecyjalnaje abstalavańnie.
Jak pakazvaje analiz zdymkaŭ za inšyja daty, A-60 praciahły čas stajaŭ na hetym miescy biez ruchu — jašče da pačatku poŭnamaštabnaj rasijskaj ahresii suprać Ukrainy. Apošnija paviedamleńni pra toje, što Rasija adnaviła raspracoŭku bajavoha łaziera i madernizacyju A-60, adnosiacca da 2012 hoda, piša «Radyjo Svaboda».
Druhi źniščany samalot — A-100 (biez radara), samalot dalokaha radyjołakacyjnaha vyjaŭleńnia i kiravańnia.
Taksama značnyja paškodžańni atrymaŭ zavod, u pryvatnaści cech kančatkovaj zborki.
Akramia samalotaŭ i cecha ŭkrainskija ŭdary parazili pazicyju sistemy SPA C-400, ale ź jakimi nastupstvami — sa spadarožnika ciažka vyśvietlić.
Heta nie pieršaja ŭkrainskaja ataka na navukova-techničny kompleks imia Bieryjeva, jaki śpiecyjalizujecca na absłuhoŭvańni i madernizacyi ŭnikalnych rasijskich samalotaŭ — nie tolki A-60, ale i samalotaŭ dalokaha radyjołakacyjnaha vyjaŭleńnia A-50, jakija Rasija ŭžo stračvała padčas vajny. Tak, u sakaviku 2024 hoda ŭ vyniku ataki ŭkrainskich dronaŭ na terytoryi kompleksu byŭ paškodžany dach adnaho z anharaŭ.
Kamientary