Pradstavili novuju kalekcyju školnaha adzieńnia na budučy siezon FOTY
Prezientacyja adbyłasia 9 lipienia ŭ Minsku, i kalekcyju pakazała fabryka «Kalinka», jakaja ŭvachodzić u kancern «Biellehpram». U bližejšy čas abnoŭlenaja školnaja forma źjavicca ŭ kramach — kalekcyi abnoŭlenyja na 60—75%, piša «Smartpres».
Pavodle słoŭ pradstaŭnicy Ministerstva adukacyi Iryny Bułaŭkinaj, školnaje adzieńnie pavinna być strymanym i nie adciahvać vučniaŭ ad vučoby. Dla chłopčykaŭ prapanujucca pinžaki, kamizelki, džempiery, kašuli. Dla dziaŭčynak — sukienki, sarafany, spadnicy, štany, kamizelki, błuzki z roznymi rukavami i inšyja rečy.
Namieśnica kiraŭnika «Biellehprama» Natalla Moroz paviedamiła, što da pačatku navučalnaha hoda budzie vypuščana kala miljona adzinak školnaha adzieńnia. Uličvajučy tavary ź minułaha hoda, u prodažy budzie na 20% bolš, čym letaś.
Što tyčycca mody i koleraŭ, to abaviazkovych koleraŭ niama — vybar zaležyć ad škoły i baćkoŭ. Ale najbolš papularnyja siarod usich — sini (70%) i čorny (30%).
Dyrektarka «Kalinki» Natalla Kuleš adznačyła, što novaja kalekcyja vykananaja ŭ styli minimalizmu: źnikli takija kolery, jak ružovy i małočny, ciapier u trendzie bieły i błakitny. U modzie prostyja fasony: pramy, prytaleny i ofiersajz. Rušy i pušysty dekor syšli ŭ minułaje. Zamiest ich — emblemy škoł, halštuki, znački.
Dla pašyvu vykarystoŭvajuć pieravažna naturalnyja i źmiešanyja tkaniny: bavaŭnianyja, viskoznyja, trykatažnyja.
Što da cenaŭ, to vytvorcy nie majuć vialikaha prybytku z vytvorčaści školnaj formy, bo rentabielnaść abmiežavanaja zakonam. Kab zarabić, treba pradać nie mienš za 10 tysiač adzinak.
Prodaž školnaha adzieńnia, abutku i aksiesuaraŭ pačniecca 15 lipienia. Asartymient budzie najbolš šyroki da 1 žniŭnia, ale kupić školnyja tavary možna ciaham usiaho hoda.
Pa słovach kiraŭnicy «Kalinki», za 300 rubloŭ možna nabyć dla dziciaci 4—5 elemientaŭ školnaj formy. Ceny zastalisia na ŭzroŭni minułaha hoda.
Cichanoŭski raskazaŭ, što treba było rabić u žniŭni 2020-ha62
Kamientary
Naprykancy minułaha navučalnaha hoda, pierad Vielikadniem, pravodzili dabračynny kirmaš dla zbora srodkaŭ dla USU pierad škołaj ŭ pravincyjnym horadzie va Ukrainie. Škoła nosić imia Nazaryja Jaremčuka - najbolš viadomaha vykanaŭcy "Čyrvonaj ruty". Pierad uvachodam u škołu - kuča ŭsiakich ruchavych zabavak dla dziaciej - batuty takija kruhłyja ź sietkaj, jak u nas pryvoziać na śviaty, tenisnyja stały i rakietki, samakaty, humki skakać, baskietbolnaje kalco ź niekalkimi miačami. I na pierapynkach usio heta zadziejana, pryčym bieź niejkich zahadaŭ nastaŭnikaŭ. Dzieci chodziać u zvyčajnyja dni ŭ zvyčajnym zručnym kožnamu adzieńni i tamu jaho nie škada ni na batucie, ni na samakacie, ni ź miačykam. Pry hetym, usio ž, za tym, što adbyvajecca na placoŭcy pierad škołaj, praź videakamiery naziraje asabista dyrektar. Časam u dynamikach čujecca jahony hołas: "Chłopčiki z pjatoho "B", nie pirskajtiesia vodoju, jak vi siditimietie na urokach mokri?"
Dva razy za toj dzień, jakraz na pierapynkach, paŭz škołu prajazdžali kałony "Na ŝiti", jakija pravoziać vulicami horada palehłaha hieroja ŭ jahonuju apošniuju darohu. Dzieci, kali čuli huki kałony, što nabližałasia, biez anijakich kamandaŭ kidali svaje zabavy i vychodzili za parkan škoły, stavali paŭz darohu na adno kalena i pravažali svajho zahinułaha ziemlaka, addajučy jamu pašanu.
U kancy pierapynku (i ŭ pačatku taksama) zamiest zvanka z dynamikaŭ hraje refren z "Čyrvonaj ruty" - "Tam. Ta-ta-ta-ta-tam" - i łaskavy, ale nastojlivy mužčynski hołas kaža "Ditońki, jdiť vžie v kłasi, zaraz počinatimieťsia urok". Placoŭka pierad škołaj pavoli puścieje.
Pry hetym školnaja forma va Ukrainie taksama jość. Jana adroźnivajecca ŭ roznych škołach. Ale apranajuć jaje dzieci tolki na niejkija ŭračystaści, kštałtu pačatku ci zakančeńnia navučalnaha hoda. A voś toje, jak va Ukrainie adbyvajecca toje, što ŭ našym saŭkovym zapaviedniku zaviecca "liniejka", patrabuje asobnaha apoviedu.