Biełaruskija školniki stvaryli dziciačy błakpost na miažy z Ukrainaj. U ich savieckija našyŭki i miedal «udzielnika SVA»
Školniki patrulujuć vakolicy i dakładvajuć pamiežnikam ab padazronych mašynach.
Biełaruskija školniki arhanizavali dziciačy błakpost u vioscy Hłybockaje za kiłamietr ad miažy z Ukrainaj. Atrad stvaryli chłopcy, jakija na leta pryjechali da svaich babul u viosku.
Kiruje błakpastom 14-hadovy Daniła sa škoły ŭ Homieli. Jon chodzić u kiepcy ź vialikaj našyŭkaj u videa savieckaha ściaha i navat z pahonami staršaha lejtenanta. Takoje nieaficyjnaje zvańnie jamu prysvoili miascovyja pamiežniki, paviedamlaje STB.
Jašče adzin chłopiec z atrada prymacavaŭ da himnaściorki dziŭnyja miedali. Adna ź ich ź vialikaj litaraj Z — simvał rasijskaj ahresii suprać Ukrainy. Heta adzin z šmatlikich varyjantaŭ miedali «Za ŭdzieł u apieracyi pa demilitaryzacyi i denacyfikacyi Ukrainy». Takija miedali ŭručajuć udzielnikam poŭnamaštabnaj vajny. Ale ich možna nabyć i ŭ internecie.
Udzielniki dziciačaha pamiežnaha atrada patrulujuć miascovaść z 9 ranicy štodzionna. Jany zapisvajuć danyja padazronych, pa ich mierkavańni, mašyn i vyjaŭlać padazronych ludziej.
Jašče školniki prachodziać tearetyčnuju i praktyčnuju padrychtoŭku na miascovaj pahranzastavie. Časam pamiežniki biaruć chłopcaŭ na pravierku padazronaha transpartu.
Dobraachvotny atrad uziaŭ sabie nazvu «Biełaruś». Školniki prydumali sabie statut z 20 praviłaŭ i abrali pazyŭnyja. Kab patrapić u skład hrupy, treba prajści adbor — padletki aceńvajuć fizičnuju padrychtoŭku kandydata i asabistuju matyvacyju. Sudziačy pa repartažy, u atradzie ŭdzielničajuć jak minimum 5 čałaviek. Dla siužeta na dziaržTB lidaru atrada navat vydali aŭtamat.
Kamandzir atrada Daniła jak uznaharodu za inicyjatyvu atrymaŭ ad pamiežnikaŭ sapraŭdnuju vajskovuju formu. Chłopiec kaža, što maryć stać pamiežnikam, ale zdaroŭje nie dazvalaje. Jon navat napisaŭ list Łukašenku, u jakim raskazaŭ, što ŭ krainie jość dzieci, jakija marać abaraniać Radzimu.
Ciapier čytajuć
Vaskrasienski: Adkryvajecca nieba — i Aleś Bialacki adrazu vychodzić24
Kamientary