Prezident Uładzimir Zialenski inicyjavaŭ značnyja pierastanoŭki va ŭradzie Ukrainy. Na pasadu kiraŭnika Kabinieta ministraŭ jon prapanavaŭ ciapierašniuju vice-premjerku Juliju Śvirydzienka. Raskazvajem, što pra jaje viadoma i čym jana adroźnivajecca ad papiarednikaŭ.
Julii Śvirydzienka 39 hadoŭ. Jana naradziłasia 25 śniežnia 1985 hoda ŭ Čarnihavie ŭ siamji dziaržaŭnych słužačych. Jaje baćka pracavaŭ u Čarnihaŭskim adździaleńni Antymanapolnaha kamiteta Ukrainy, a maci zajmała pasadu ŭ abłasnoj radzie.
U 2008 hodzie Julija skončyła Kijeŭski nacyjanalny handlova-ekanamičny ŭniviersitet (ciapier Dziaržaŭny handlova-ekanamičny ŭniviersitet), atrymała stupień mahistra pa śpiecyjalnaści «mieniedžmient antymanapolnaj dziejnaści». Paśla jana advučyłasia ŭ aśpirantury taho ž univiersiteta pa śpiecyjalnaści «Ekanomika i kiravańnie nacyjanalnaj haspadarkaj».
Pieršym miescam pracy Śvirydzienka stała pasada finansavaha ekanamista ŭ sumiesnym ukrainska-andorskim pradpryjemstvie AAT «AMP» (Kijeŭ), jakoje pracavała ŭ siektary nieruchomaści.
Z 2011 hoda jana ŭznačaliła pastajannaje pradstaŭnictva Čarnihava ŭ horadzie Usi (Kitaj). Na hetaj pasadzie Śvirydzienka adkazvała za pryciahnieńnie kitajskich inviestycyj.
Jak pišuć ŚMI, mienavita ŭ Kitai adbyłosia znajomstva Śvirydzienka ź biznesmienam i deputatam Čarnihaŭskaj abłasnoj rady Valeryjem Kuličom, jaki pryjazdžaŭ u Kitaj u składzie delehacyi pradstaŭnikoŭ biznesu i čynoŭnikaŭ.
«Jula — nie pra hrošy»
U 2015 hodzie, kali Kulič staŭ kiraŭnikom Čarnihaŭskaj abłasnoj dziaržaŭnaj administracyi, jon zaprasiŭ Śvirydzienka na pasadu svajho daradcy. Paźniej jana ŭznačaliła ŭpraŭleńnie ekanamičnaha raźvićcia, zatym — stała pieršym namieśnikam, a ź lipienia 2018 hoda ŭžo vykonvała abaviazki kiraŭnika administracyi.
Za pieryjad pracy ŭ Čarnihavie Śvirydzienka prajšła stažyroŭki ŭ Hiermanii i Šviecyi. Takim čynam, jana ŭjaŭlaje niačasty prykład čynoŭnika, znajomaha i z kitajskaj, i ź jeŭrapiejskaj sistemami.
Śvirydzienka hanaryłasia tym, što za čas jaje pracy ŭ abłasnoj dziaržaŭnaj administracyi Čarnihaŭskaja vobłaść atrymała bolš za 340 miljonaŭ dołaraŭ pramych zamiežnych inviestycyj, što składaje bolšuju častku ad ahulnaj sumy (430 miljonaŭ dołaraŭ). Pry joj u 2017 hodzie Čarnihaŭskaja vobłaść zaniała pieršaje miesca va Ukrainie pa tempach rostu inviestycyj.
Jak piša «Ukrainskaja praŭda», adzin čarnihaŭski čynoŭnik nie pad zapis uspaminaje, što Śvirydzienka na pasadzie v.a. kiraŭnicy administracyi pracavała ledź nie ŭ kruhłasutačnym režymie, kab zarekamiendavać sabie pierad uładami ŭ Kijevie.
«Śviridzienka tady była niekanfliktnaj i niekarumpavanaj. Pra jaje zaŭsiody kazali: «Jula — nie pra hrošy». Zvyčajna ŭsie namieśniki kiraŭnikoŭ administracyi imknulisia prasoŭvać svaich padradčykaŭ abo kampanii, a Jula — nie», — padzialiŭsia z vydańniem svaimi ŭspaminami adzin z čarnihaŭskich čynoŭnikaŭ.
Pry hetym u Administracyi tahačasnaha prezidenta Piatra Parašenki navat nie razhladali varyjanta addać joj vakantnuju pasadu.
U vyniku ŭ listapadzie 2018 hoda žančyna pajšła ź dziaržsłužby i niejki čas pracavała ŭ adnoj sa struktur svajho byłoha kiraŭnika Valeryja Kuliča — dyrektaram sumiesnaha z estoncami pradpryjemstva «Sidko Ukraina», jakoje śpiecyjalizujecca na vytvorčaści karmoŭ dla žyvioł i dzikich ptušak i zajmajecca pierapracoŭkaj arhaničnaj pradukcyi.
Tady Śvirydzienka daviałosia kiravać pryblizna sotniaj ludziej i kaardynavać vytvorčaść prykładna 20 tysiač ton pradukcyi na hod.
Va ŭrad Ukrainy jana pryjšła ŭ vieraśni 2019 hoda na pasadu namieśnika ministra ekanamičnaha raźvićcia, handlu i sielskaj haspadarki Ukrainy, a ŭ lipieni nastupnaha hoda ŭžo stała pieršaj namieśnicaj hetaha ministra. A ŭžo ŭ śniežni 2020-ha stała namieśnicaj kiraŭnika Ofisa prezidenta Ukrainy, adkaznaj za ekanamičnyja pytańni. Na hetaj pasadzie jana prapracavała amal hod — da listapada 2021 hoda, kali Uładzimir Zialenski pryznačyŭ jaje pieršaj vice-premjerkaj i ministarkaj ekanomiki.
U 2020 i 2021 hadach Śvirydzienka reprezientavała ŭkrainski bok i ŭ pracoŭnaj padhrupie pa sacyjalna-ekanamičnych pytańniach Kantaktnaj hrupy pa ŭrehulavańni kanfliktu ŭ Danbasie — tady jak namieśnica kiraŭnika Ofisa prezidenta.
Paśla pačatku poŭnamaštabnaj vajny, u 2022 hodzie, na Śvirydzienka lahła zadača ŭtrymańnia ekanomiki krainy va ŭmovach vajny.
Taksama ŭ śfieru adkaznaści Śvirydzienka ŭvajšli pošuki mižnarodnaj dapamohi. U składzie ŭkrainskaj delehacyi jana niekalki razoŭ brała ŭdzieł u pieramovach sa Złučanymi Štatami. U krasaviku hetaha hoda čynoŭnica reprezientavała Ukrainu na padpisańni dalikatnaha pahadnieńnia pa pryrodnych resursach z ZŠA.
Absalutny muzyčny słych, jaki dapamahaje budavać karjeru
Jak piša «Ukrainskaja praŭda», Julija Śvirydzienka maje absalutny muzyčny słych. Kali b treba było vyznačyć sakret jaje karjernaha pośpiechu, to jaho kvintesiencyjaj było b jakraz hetaje ŭmieńnie — ledź nie imhnienna adnaŭlać, ułoŭlivać zadaču z paŭsłova i adrazu pradukavać varyjanty rašeńnia.
Takoje ŭmieńnie ŭžo nie raz, byccam «mahičnaja pałačka», źmianiała atmaśfieru sustreč i pryčaroŭvała zamiežnyja delehacyi ŭ chodzie pieramovaŭ.
«Julija maje navyki chutkaha reahavańnia. Bolšaść ludziej, kali atrymlivajuć novuju zadaču, patrabujuć hadziny, kab padumać nad jaje rašeńniem. (…) Julija zusim nie adkładaje spravaŭ na potym. I jašče jana zdolnaja pravodzić sustrečy i narady biez kanfliktaŭ», — charaktaryzuje žančynu na ŭmovach ananimnaści adzin z čynoŭnikaŭ.
Hety ž navyk, jak śćviardžajuć žurnalisty, dapamoh žančynie chutka prasoŭvacca pa karjernaj leśvicy.
«Jula nikoli nie stanoviłasia ŭ pozu na naradach i zaŭsiody išła rabić toje, što skazaŭ prezident. Navat kali jano joj nie padabałasia, nikomu nie padabałasia — ale prezident skazaŭ — značyć, treba», — pryhadvaŭ nie pad zapis adzin z byłych kaleh Śvirydzienka.
Śvirydzienka zapomniłasia svaim niaźmiennym natatnikam, kudy detalova natavała idei prezidenta, kiraŭnika OP i premjera.
U toj ža čas, umieńnie łavić miełodyju adnačasova źjaŭlajecca i słabaściu žančyny. Bo dla taho, kab prajhrać miełodyju, treba, kab chtości jaje stvaraŭ.
Śvirydzienka zaŭsiody była cudoŭnaj vykanaŭcaj, ale hetak ža zaŭsiody mieła nad saboju niejkuju vyšejšuju instancyju — načalnika, jaki hienieruje zadačy.
Što viadoma pra siamju Julii Śvirydzienka
U toj ža čas, jak pišuć ŚMI, u ludziej, jakim davodziłasia pracavać sa Śvirydzienka, skłałasia ŭražańnie, što jana nie pryzvyčajenaja da krytyki. Zaŭsiody byŭ niechta nad joju, chto zabiraŭ asnoŭnuju masu chiejtu na sabie. Jana dahetul baluča reahuje na krytyku, moža svarycca i abražacca na ludziej za pasty ŭ sacsietkach.
Najbolšy strach Śvirydzienka, jak śćviardžajuć jaje siabry, — heta što ludzi buduć abmiarkoŭvać jaje małodšaha brata, jaki niezadoŭha da pačatku vialikaj vajny vyjechaŭ z Ukrainy, demanstratyŭna adroksia mandata deputata Čarnihaŭskaj abłasnoj rady ad partyi «Słuha naroda» i ciapier žyvie sabie ŭ Łondanie — u kvatery i domie, nabytych užo paśla ŭvarvańnia.
Viadoma, što Śvirydzienka zamužam, haduje dačku Safiju. Muž čynoŭnicy vałodaje dźviuma kampanijami, jakija zajmajucca budaŭnictvam, ramontam, telekamunikacyjami i absłuhoŭvańniem sietak suviazi.
Dla Uładzimira Zialenskaha charakterny vybar u jakaści premjer-ministra technakrataŭ, ludziej nie z top-abojmy i tym bolš nie prafiesijnych palitykaŭ. Pieršym jaho premjeram byŭ 35-hadovy ekanamist Alaksiej Hančaruk, ź im Zialenski adpracavaŭ niadoŭha. Druhim staŭ 45-hadovy Dzianis Šmyhal, jaki zajmaŭ pasadu piać hadoŭ.
39-hadovaja Julija Śvirydzienka, z adnaho boku, upisvajecca ŭ hety ž šerah, ale dośviedu ŭ jaje našmat bolš — jak i ŭ samoha prezidenta ciapier. Tym bolš što kožny vajenny hod možna śmieła ličyć za piać.
Kamientary