Litoŭskija siłaviki raskryli padrabiaznaści pra padrychtoŭku palityčnych zabojstvaŭ u Litvie. Udzielničali i biełarusy

Usio pačałosia ŭ pačatku 2025 hoda, kali hramadzianin Rasii, jaki pastajanna žyvie ŭ Litvie (jaho imia nie nazyvajecca, ale raniej stała viadoma, što heta baškirski aktyvist Rusłan Habasaŭ), źviarnuŭsia ŭ palicyju paśla taho, jak znajšoŭ u svajoj mašynie schavanuju pryładu dla sačeńnia. Paśla pravierki vyśvietliłasia, što za čałaviekam sapraŭdy nazirali, a jaho žyćciu pahražała realnaja niebiaśpieka.

Padčas dalejšaha rasśledavańnia supracoŭniki kryminalnaj palicyi vyjavili, što rychtujecca nie tolki jaho zabojstva, ale i napad na hramadzianina Litvy (raniej nazyvałasia imia aktyvista Vałdasa Bartkiavičusa, jaki arhanizuje dapamohu Ukrainie i viadomy svaimi časam ekstravahantnymi pavodzinami). Śledstva ličyć, što abiedźvie asoby byli vybranyja metanakiravana z-za ich palityčnych pohladaŭ i dziejnaści.

Pavodle danych śledstva, ź leta 2024 hoda ŭdzielniki hrupy źbirali infarmacyju pra budučych achviar: miescy pražyvańnia, pieramiaščeńni, ład žyćcia, miescy pracy i inšyja danyja. Dla hetaha vykarystoŭvalisia techničnyja srodki nazirańnia i tajnaje sačeńnie.

Da schiemy, jak śćviardžaje śledstva, byli datyčnyja hramadzianie niekalkich krain: Rasii, Biełarusi, Ukrainy, Hruzii, Łatvii, Małdovy i Hrecyi. Častka ź ich žyła ŭ Litvie, inšyja pryjazdžali śpiecyjalna dla vykanańnia kankretnych zadač.

Asnoŭnymi vykanaŭcami zabojstvaŭ pavinny byli stać dvoje hramadzian Hrecyi, adzin ź jakich taksama mieŭ hramadzianstva Rasii. Ich źviazvajuć z kryminalnym śvietam. Jany šukali dapamohu ŭ miascovych złačynnych kołach u Litvie: udakładniali, jak lepš nablizicca da achviar, jakim šlacham uciakać paśla napadu, dzie nabyć zbroju abo inšyja srodki dla zabojstva i jak pazbavicca dokazaŭ.

12 sakavika 2025 hoda ŭ Vilni prajšła śpiecapieracyja z udziełam antyterarystyčnaha padraździaleńnia «Aras». U vyniku byli zatrymanyja hałoŭnyja padazravanyja.

Paśla analizu sabranych materyjałaŭ śledstva vyjšła i na inšych arhanizataraŭ i finansistaŭ. U pačatku 2026 hoda razam z zamiežnymi partniorami była praviedziena mižnarodnaja apieracyja. Novyja zatrymańni i pieratrusy prajšli ŭ Polščy, Ukrainie i Hrecyi.

Asobna padkreślivajecca, što rasśledavańnie vyjaviła suviazi pamiž vykanaŭcami i zamoŭcami, jakija, pavodle viersii litoŭskaha boku, dziejničali ŭ intaresach rasijskaj vajskovaj raźviedki.

Akramia padrychtoŭki zabojstvaŭ, padazravanyja mahli zajmacca i inšymi zadačami: zboram infarmacyi pra vajskovyja abjekty, a taksama arhanizacyjaj padpałaŭ techniki vajskovaha pryznačeńnia, jakaja mahła vykarystoŭvacca dla padtrymki Ukrainy.

Na hety momant abvinavačańni abo padazreńni vystaŭlenyja 13 asobam. Dzieviać čałaviek užo zatrymanyja. Na jašče čatyroch vydadzienyja jeŭrapiejskija ordary na aryšt, ich praciahvajuć šukać. Troje zatrymanych za miažoj užo pieradadzienyja Litvie, jašče pa dvuch asobach vyrašajecca pytańnie ekstradycyi.

Śledstva praciahvajecca, i litoŭskija ŭłady zajaŭlajuć pra ciesnaje supracoŭnictva z zamiežnymi śpiecsłužbami i pravaachoŭnymi strukturami.

• 20
• 0
• 0
• 0
• 0
• 0
• 1
• 1