Mierc miarkuje, što Ukrainie ŭ abmien na šlach u ES daviadziecca pahadzicca sa strataj terytoryj
Fiederalny kancler Hiermanii Frydrych Mierc na sustrečy z navučencami himnazii imia Karła Vialikaha ŭ Marśbierhu na zachadzie Hiermanii vykazaŭ mierkavańnie, što Ukrainie ŭ miežach budučaha mirnaha pahadnieńnia z Rasijaj, mahčyma, daviadziecca źmirycca z tym, što častka jaje terytoryj zastaniecca pa-za kantrolem Kijeva, piša Reuters.
Pa słovach Frydrycha Mierca, mahčymaje spynieńnie ahniu i dalejšaje mirnaje pahadnieńnie mohuć uklučać składanyja palityčnyja kampramisy. Jon padkreśliŭ, što ŭ takim vypadku prezident Ukrainy Uładzimir Zialenski moža vynieści hetaje pytańnie na refierendum i patłumačyć hramadzianam, što adnačasova kraina atrymlivaje pierśpiektyvu ŭstupleńnia ŭ Jeŭrapiejski Sajuz.
«Kali prezident Zialenski choča danieści heta da ŭłasnaha nasielnictva i atrymać dla hetaha bolšaść, i jamu treba pravieści refierendum z hetaj nahody, to jon pavinien adnačasova skazać narodu: «Ja adkryŭ vam šlach u Jeŭropu»», — dadaŭ Mierc.
U toj ža čas kancler padkreśliŭ, što šlach Ukrainy ŭ ES budzie praciahłym i nie moža być realizavany ŭ najbližejšyja hady. Jon adznačyŭ, što aryjenciry na pačatak 2027 ci navat 2028 hoda, jakija akreślivaje Uładzimir Zialenski, źjaŭlajucca nierealistyčnymi praz patrabavańni da krainy-kandydata, u śfiery viaršenstva prava i baraćby z karupcyjaj.
Mierc taksama prapanavaŭ pramiežkavyja miechanizmy intehracyi, załučeńnie Ukrainy ŭ jakaści naziralnika da asobnych instytutaŭ ES da momantu paŭnapraŭnaha členstva.
Pierad hetym, vystupajučy na niefarmalnym samicie ES na Kipry, Zialenski kateharyčna adchiliŭ lubyja prapanovy ab «simvaličnym členstvie», zajaviŭšy, što ŭkrainskija vojski abaraniajuć Jeŭropu nie simvalična, a staviačy na kon svaje žyćci.
«My imkniemsia da takoha ž paŭnapraŭnaha členstva, jak i ŭsie krainy ES — ad Kipra da Polščy, — zajaviŭ prezident Ukrainy ŭ svaim zvarocie da lidaraŭ ES. — Adzinaje, pra što my prosim, — heta paskoryć praces paŭnapraŭnaha členstva, vyznačyŭšy dakładnuju datu jaho pačatku».
Na tym ža samicie staršynia Jeŭrakamisii Ursuła fon der Lajen i kiraŭnik Jeŭrapiejskaj rady Antoniu Košta vysoka acanili namahańni Ukrainy pa praviadzieńni reformaŭ, ale pieraścierahli ad ustalavańnia štučnych terminaŭ.
«Heta dvuchbakovy kantrakt, kali vy źjaŭlajeciesia krainaj-kandydatam. Heta ciažkija reformy, jakija krainy-kandydaty pavinny pravieści», — skazała fon der Lajen.
Mierc: U ZŠA niama stratehii ŭ vajnie suprać Irana, a Iran dziejničaje pa-mastacku
U ES kančatkova ŭchvalili kredyt dla Ukrainy i sankcyi suprać Rasii
U Jeŭropie enierhietyčny kryzis. Ci budzie jana znoŭ kuplać naftu i haz u Rasii?
«Kali my robim toje, što choča adna kraina, a nie toje, što chočuć 26 — heta nie zusim demakratyja». Kaja Kałas raskrytykavała sistemu hałasavańnia ŭ ES
«Upieršyniu za hady ŭ zale niama ruskich» — Tusk tonka pakpiŭ z Orbana
Ciapier čytajuć
Jamu vybili čatyry zuby, a paśla vykinuli z krainy. Ciapier byłoha palitviaźnia aryštavali ŭ Łatvii z šaściu mihrantami ŭ mašynie23
Kamientary
No mierzaviec, priedavšij Ukrainu - vsie ravno Tramp. A jeŝie piedofił. I ahient putina.