Kab nie płacić 21 rubiel štrafu, hamialčuk pradstaviŭsia imieniem siabra. I atrymaŭ kryminałku
Pavučalnaja historyja adbyłasia ŭ červieni minułaha hoda ŭ Homieli. U pieršuju subotu leta 40‑hadovy miascovy žychar vypiŭ, nabyŭ u centry horada bukiet dla svajoj dziaŭčyny i pajechaŭ da jaje na aŭtobusie. U metach ekanomii vyrašyŭ nie prabivać tałon, jaki ŭ jaho byŭ.
Na nastupnym ža prypynku ŭ sałon zajšli kantralory. Pasažyru z kvietkami pryjšłosia vyjści ź imi z aŭtobusa, raspaviadaje SK.
U bieźbiletnika kantralory spytali jaho imia, proźvišča, kab vypisać štraf. Ekanomny mužčyna adkazaŭ, što dakumientaŭ nie maje z saboju, ale, jak piša SK, upeŭniena nazvaŭ svaje proźvišča, imia, imia pa baćku, datu i miesca naradžeńnia, adras rehistracyi.
Kantralor zapisaŭ hetyja danyja dla štrafu ŭ 21 rubiel. Mužčyna raśpisaŭsia ŭ dakumiencie i nakiravaŭsia pa svaich spravach.
Praz paŭtara miesiaca padman vykryŭsia.
Niaspłačany štraf pavis na školnym tavaryšy bieźbiletnika. Vyrasła pienia, i z bankaŭskaha rachunku adnakłaśnika śpisałasia 126 rubloŭ.
Toj pabačyŭ niastaču pierad ździajśnieńniem važnaj ździełki. Ździełku pryjšłosia admianić, bo mužčynu spatrebiłasia prajści šerah instancyj, kab pazbavicca statusu štrafnika.
U sakaviku 2026 hoda «pradprymalnamu» žycharu Homiela pradjaŭlena abvinavačańnie pa č.1 art. 203‑1 (naŭmysnaje niezakonnaje pradastaŭleńnie piersanalnych źviestak inšaj asoby bieź jaje zhody, što paciahnuła pryčynieńnie istotnaj škody pravam, svabodam i zakonnym intaresam hramadzianina) Kryminalnaha kodeksa.
Pakarańnie — ad hramadskich spraŭ da dvuch hadoŭ pazbaŭleńnia voli.
Pamiatajecie Daniiła z Ofisa Cichanoŭskaj, jakomu za dva dni sabrali hrošy na ankałahičnuju apieracyju? Jamu napisaŭ toj samy adnakłaśnik, jaki jaho ŭdaryŭ — z čaho ŭsio i pačałosia44
Kamientary