Jak źmianilisia biełarusy paśla 2020 hoda? Cikavaje nazirańnie byłoha palitviaźnia

U novym vypusku TOKu były palitźniavoleny i supracoŭnik bujnych mižnarodnych farmaceŭtyčnych kampanij Siarhiej Šeleh vykazaŭ svajo bačańnie, jak źmianiłasia biełaruskaje hramadstva paśla 2020 hoda.

64-hadovy Siarhiej Šeleh apynuŭsia za kratami za salidarnaść ź biełarusami: jon danaciŭ arhanizacyjam, jakija paźniej, zadniaj dataj, byli pryznanyja ekstremisckimi i terarystyčnymi. 21 červienia paśla vizitu ŭ Minsk śpiecpradstaŭnika prezidenta ZŠA Kita Kiełaha jon apynuŭsia ŭ składzie 14 čałaviek, jakija vyjšli na volu.

Aceńvajučy źmieny, jakija adbylisia ŭ biełaruskim hramadstvie, Šeleh źviartaje ŭvahu na dva supraćlehłyja pohlady na padziei 2020 hoda, jakija prysutničajuć siarod jaho znajomych.

Adny ličać, što «biełarusaŭ pryvučyli jeści ź miski, i kali ŭ hetaj miscy budzie sup, zvarany ź biełarusa, jany ŭsio roŭna buduć jaho jeści».

Druhija aceńvajuć padziei 2020 hoda jak histaryčnuju viechu ŭ historyi našaj krainy:

«Heta pieramoha, kali narod uładzie pakazaŭ svaju abjadnanuju volu, (…) i što padziei 2020 hoda niepaźbiežna pryviaduć da ščaślivaj, demakratyčnaj, volnaj, nu i hetak dalej i da taho padobnaje Biełarusi».

Sam ža mužčyna ličyć, što «iścina znachodzicca niedzie pasiaredzinie», i dadaje:

«Što tyčycca mianie asabista, to ja ŭražany toj salidarnaściu, jakuju prajaŭlali ŭ adnosinach da majoj siamji mnohija i mnohija ludzi».

I hety fakt vyklikaje ŭ jaho ŭpeŭnienaść u tym, «dla našaj krainy jašče daloka nie ŭsio stračana, i što, biezumoŭna, patencyjał dla źmien jość, budzie i jaho składana zabić».

Niahledziačy na dva hady ŭ źniavoleńni, Siarhiej śćviardžaje, što jon nie straciŭ viery ŭ spraviadlivaść:

«Ja pa-raniejšamu hladžu na hety śviet i vieru ŭ toje, što spraviadlivaści, dabra ŭ im stanovicca bolš».

Dla taho, kab patłumačyć svoj pohlad, Šeleh zhadvaje amierykanski sieryjał «Sapraŭdny detektyŭ» (True Detective).

«Tam jość vydatnaja finalnaja scena, kali dva palicejskija, jakija rasśledujuć spravu, źviazanuju sa źniknieńniem, hvałtam ź dziaciej i zabojstvam dziaciej, pryčym rasśledujuć u takich zmročnych [umovach].

Heta poŭdzień ZŠA. Tam bałoty, niejkija strašnyja drevy, lijany, jakija ź ich źvisajuć. Takaja depresiŭnaja karcina. I voś jany ledź žyvyja vypaŭzajuć.

Noč, takaja ciemra navokał, adzin palicejski kaža inšamu: «Słuchaj, nu što źmianiłasia? Voś my z taboj znoŭ staim pad ciomnym niebam, ciemry našmat bolš, čym naohuł śviatła ŭ hetym śviecie». A druhi jamu kaža: «Ni ŭ jakim razie! Byli časy, kali zorak na niebie nie było ŭvohule».

«Toje, što adbyvałasia ŭ Biełarusi, ja nie ŭsprymaju ŭ kantekście tolki biełaruskaj historyi.

Moža być, časam sapraŭdy varta pahladzieć na nieba i zrazumieć, što kantekst našaj historyi źjaŭlajecca častkaj taho histaryčnaha pracesu, jaki zaraz adbyvajecca va ŭsim śviecie. Źmianiajucca, musić, uzajemaadnosiny pamiž čałaviekam i dziaržavaj», — davodzić Siarhiej Šeleh.

• 27
• 1
• 2
• 6
• 0
• 2
• 0
• 4