Minčuk kupiŭ na aŭkcyjonie kvateru ź piensijanierkaj, jakaja dva hady naadrez admaŭlajecca vysialacca

Bonusam da tannaha łota išoŭ niuans — susiedka‑piensijanierka, zarehistravanaja ŭ kvatery, jakaja nie śpiašałasia źjazdžać. Alaksandr uzvažyŭ usie «za» i «suprać» i vyrašyŭ uziać udzieł u tarhach: žyć čaćviarych u pakoi internata ŭžo nadakučyła. Čym skončyłasia heta avantura? Ničym dobrym, piša Onliner.by.

— U sudzie ja daviedaŭsia niuansy, ad jakich, miakka kažučy, byŭ u šoku.

Dvuška z vysokimi stolami i płoščaj kala 60 «kvadrataŭ» prapanoŭvałasia pa sapraŭdy spakuślivaj canie — tarhi startavali z 112 000 rubloŭ, abo 37 900 $ pavodle kursu. Kaliści abjekt byŭ adabrany za daŭhi ŭ kampanii AAT «Trest Biełsantechmantaž №1». Aŭkcyjon, jaki musiŭ prajści imkliva, byŭ pryznačany na maj 2023 hoda.

— Parailisia z žonkaj i vyrašyli pasprabavać ščaścia, tym bolš dvuška znachodzicca va ŭdałaj łakacyi. Praŭda, bačyli my jaje tolki na fota, — zhadvaje Alaksandr. — Na toj momant składana było pradbačyć, nakolki łot vyraście ŭ canie, tamu ja zahadzia abzvaniŭ usich svajakoŭ, kab zrazumieć, jakuju sumu jany mohuć nam pazyčyć.

Darečy, pierad pačatkam anłajn‑tarhoŭ ja ŭdakładniŭ, jak chutka zmahu vypisać zarehistravanuju žycharku. Mnie zapeŭnili, što z hetym nie budzie prablem.

Jakija‑niebudź inšyja detali adnosna abjekta daviedacca nie ŭdałosia: sudovamu vykanaŭcu nielha raskryvać infarmacyju.

U ranicu ŭ dzień «iks» para sieła pierad manitoram i čakała startu tarhoŭ. Aŭkcyjon abiacaŭ być haračym: na kvateru pretendavali adrazu siem achvotnych.

Pavialičyć

— «Bitva» doŭžyłasia da viečara: u vyniku kvatera dastałasia mnie za 156 211 rubloŭ, abo kala 52 800 $ pa kursie. Žonka abradavałasia i ŭžo ŭ dumkach rasstaviła ŭ domie meblu, — praciahvaje mužčyna.

— Trochi paźniej ja aformiŭ prava ŭłasnaści i prakansultavaŭsia ź jurystam nakont dalejšych dziejańniaŭ. Spačatku adpraviŭ Irynie (imia źmieniena), zarehistravanaj u kvatery, list, u jakim paviedamiŭ, što płanuju zajechać u kvateru ź siamjoj i prašu jaje dobraachvotna vyzvalić žyllo. Adkazu nie było. Tady my pasprabavali trapić u kvateru, ale dźviery nichto nie adkryŭ ni padčas adnaho z našych vizitaŭ. U teoryi ja moh by, jak ułaśnik, uzłamać zamki i pamianiać ich, ale vyrašyŭ raźviazać situacyju mirnym šlacham.

Paśla niekalkich marnych sprobaŭ damovicca ź Irynaj Alaksandr padaŭ pazoŭ ab vysialeńni piensijanierki praz sud:

— Užo na sudovym pasiadžeńni ja daviedaŭsia šmat novaha. Naprykład, što Irynu zasialili ŭ dvušku na vulicy Jakuba Kołasa pa rašeńni suda jak člena siamji byłoha najmalnika. Praŭda, jość niuans: sud abaviazaŭ uładalnika — AAT «Biełsantechmantaž №1» — zaklučyć z žančynaj biesterminovuju damovu najmu, ale hetaha nie zrabili. Jak mnie viadoma, žančyna admoviłasia płacić arendu ŭ 750 rubloŭ, adnak praciahvała žyć u kvatery i apłačvać kamunałku. Paśla taho, jak kvatera trapiła na tarhi i źmianiła ŭłaśnika, u teoryi dahavor najmu pavinien być zaklučany ŭžo sa mnoj.

Pry hetym ja byŭ pierakanany, što maju prava vysielić piensijanierku pa zakonie, bo jana nie źjaŭlajecca ŭłaśnicaj doli — prosta ŭ nulavych atrymała prava žyć u kvatery.

U hetaj historyi šmat niuansaŭ, ale vynik adzin — sud admoviŭ va ŭsich maich patrabavańniach, spasłaŭšysia na toje, što zakon nie maje zvarotnaj siły (Irynu zasialili sudovym rašeńniem pa starym zakanadaŭstvie, a pa novym vysielić jaje ŭžo nielha i niama kudy).

Zabiahajučy napierad, adznaču, što klučy ad kvatery ja atrymaŭ tolki ŭ sakaviku 2024 hoda. Ciapier my pavinny žyć ź piensijanierkaj u adnoj kvatery i nikoha nie chvaluje, što ŭ mianie dvoje niepaŭnaletnich dziaciej, — ŭ adčai razvodzić rukami mužčyna.

Pavodle słoŭ Alaksandra, jon padaŭ apielacyju ŭ haradski sud, jaki pakinuŭ rašeńnie papiaredniaj instancyi bieź źmienaŭ.

— Padčas razboru ja daviedaŭsia, što Iryna mieła jašče adnu kvateru, jakuju paśla aŭkcyjona padaryła synu.

Situacyja ŭskładniajecca tym, što my z žonkaj i dvuma dziećmi žyli ŭ internacie na vulicy Sołtysa. Pakolki my vyrašyli situacyju z žyllom i nabyli kvateru, praz dva miesiacy nam pryjdziecca vyjechać ź internata. Ale kudy? U nievialiki pakoj biez ramontu, dzie budzie žyć čužy čałaviek va ŭzroście? Heta absurd.

Ja ŭžo zadumvajusia zdać kvateru kamuści. Inšaha varyjantu pakul nie baču. Adrazać kamunikacyi, pamianiać zamki? Nie, usio ž taki chaču pry lubych abstavinach zastavacca čałaviekam, — adznačaje surazmoŭca. Mužčyna kaža, što piensijanierka prapanavała kampramis, jaki ŭpirajecca ŭ kruhłuju sumu.

— Iryna prapanavała zapłacić joj 25 000 $ pa kursie, paśla čaho jana vyzvalić žyllo. A dzie mnie ŭziać takija hrošy? Kab nabyć hetuju dvušku, pryjšłosia zaleźci ŭ daŭhi, jakija ja dahetul viartaju.

Nasamreč ja nabyŭ kata ŭ miašku, za što sudžusia ŭžo druhi hod. Čamu piensijanierku nielha pierasialić u arendnaje žyllo abo internat? Faktyčna ŭ jaje jość biesterminovaja damova najmu: u teoryi niby aranduje hetuju kvateru, ale ŭ rečaisnaści žyvie ŭ joj biaspłatna hadami, — padvioŭ vynik Alaksandr.

«Ja tut žyła, žyvu i budu žyć» — što kaža druhi bok

Žurnalisty źviazalisia ź Irynaj, kab daviedacca jaje mierkavańnie adnosna situacyi. Piensijanierka, daviedaŭšysia pra sutnaść razmovy, rašuča zajaviła: «Usie pytańni — da advakata».

— Mahu vam karotka rastłumačyć, u čym sutnaść — dadała žančyna. — U hetaj kvatery ja žyła pa dakumientach z 2008 hoda, z mužam i jaho baćkami. Ale na samoj spravie zajechała siudy raniej. Mianie tut zasialili jak člena siamji pa rašeńni suda.

Pavialičyć

— Ja tut žyła, žyvu i budu žyć. Alaksandr, kuplajučy kvateru, viedaŭ pra ŭsiu situacyju: ja pakazvała jamu sudovaje rašeńnie, dzie čornym pa biełym napisana, što maju na heta prava. Ja prapanavała vyrašyć pytańnie mirnym šlacham, ale jon admoviŭsia. Alaksandr choča, kab ja vyzvaliła žyllo i pajšła ŭ nikudy, ale tak nie byvaje. Vybačajcie, u mianie bolej niama času.

Juryst: Status žychara adnosna ŭłaśnika nie vyznačany

Žurnalisty paprasili jurysta, znajomuju z materyjałami spravy, dać kamientar:

— Alaksandr nabyŭ kvateru, jakaja znachodziłasia va ŭłasnaści AAT «Biełsantechmantaž №1», u 2023 hodzie. Žyllo pradavałasia praz aŭkcyjon, z zarehistravanym žycharom — Irynaj. Jana prapisałasia ŭ dvuchpakajovaj kvatery ŭ 2009 hodzie na padstavie rašeńnia suda jak člen siamji najmalnika. U 2022 hodzie (paśla śmierci muža) sud pryniaŭ rašeńnie prymusić AAT «Biełsantechmantaž №1» zaklučyć ź joj biesterminovuju damovu najmu.

Da taho jak kvatera była realizavana praz tarhi, rašeńnie suda ab zaklučeńni dahavora najmu nie było vykanana.

Darečy, jak vyśvietliłasia paźniej, u žančyny była jašče adna kvatera ŭ Minsku. Jana zdała svajo žyllo paśla taho, jak kvateru na vulicy Jakuba Kołasa vystavili na tarhi.

Alaksandr padaŭ sudovy pazoŭ, abhruntavaŭšy patrabavańnie ab vysialeńni Iryny tym, što jon źjaŭlajecca novym ułaśnikam kvatery i nie maje namieru zaklučać ź joju damovu najmu.

Sud admoviŭ u pazovie. Sprava ŭ tym, što normy Žyllovaha kodeksa Respubliki Biełaruś u dziejučym vyhladzie nadajuć novamu ŭłaśniku žyłoha pamiaškańnia prava nie tolki nie zaklučać dahavor najmu, ale i razarvać jaho, kali taki zaklučany. Adnak hetyja normy ŭviedzieny ŭ 2012 hodzie. Iryna ž była zarehistravana ŭ žylli jak člen siamji najmalnika ŭ 2009 hodzie, a sam najmalnik — u 1957 hodzie.

Pry tym, pry pryniaćci novaha Žyllovaha kodeksa ŭ 2012 hodzie nie było ahavorak ab niedapasavanaści artykuła 63 na adnosiny, jakija praciahvalisia paśla ŭstupleńnia ŭ siłu kodeksa, zakon nie ŭkazaŭ takoha.

Pavialičyć

U 2025 hodzie Alaksandr znoŭ padaŭ pazoŭ ab vysialeńni Iryny. Svaje patrabavańni jon abhruntavaŭ p. 2 art. 89 Žyllovaha kodeksa: «Byłyja členy siamji ŭłaśnika žyłoha pamiaškańnia, inšyja hramadzianie, jakija majuć prava vałodańnia i karystańnia žyłym pamiaškańniem i nie majuć doli ŭ pravie ahulnaj ułasnaści na heta žyllovaje pamiaškańnie, padlahajuć vysialeńniu pa patrabavańni ŭłaśnika žyłoha pamiaškańnia biez pradastaŭleńnia inšaha žyłoha pamiaškańnia, kali inšaje nie ŭstanoŭlena dahavoram abo piśmovaj damovaj ab paradku karystańnia žyłym pamiaškańniem, a taksama zakonnymi aktami».

Pavodle jurysta, na siońnia situacyja vyznačajecca nastupnym čynam: status Iryny adnosna ŭłaśnika nie vyznačany. Nieviadoma, kim jana źjaŭlajecca adnosna ŭłaśnika kvatery i členaŭ jaho siamji.

Taksama nie zrazumieła, ci abaviazany Alaksandr zaklučać ź joju damovu najmu (i na jakich umovach), upłačvać padatak abo pryznavać jaje členam siamji. Jašče niajasna, ci buduć na žančynu raspaŭsiudžvacca inšyja normy Žyllovaha kodeksa, jakich nie było ŭ kodeksie 1999 hoda i žyllovym zakanadaŭstvie 1957 hoda.

— Pry hetym jana praciahvaje žyć u kvatery biez apłaty, h. zn. zachoŭvać ułasnyja srodki za košt inšych asob, — padviała vysnovu śpiecyjalist.

• 2
• 1
• 11
• 22
• 1
• 1
• 2
• 0