U ZŠA nazvali piać mahčymych scenaryjaŭ zakančeńnia vajny va Ukrainie

1. Pucin pahadžajecca na biezumoŭnaje spynieńnie ahniu

Na dumku žurnalistaŭ CNN, hety varyjant małavierahodny. Rasija ŭžo adchiliła takuju prapanovu viasnoj, niahledziačy na pahrozu novych sankcyj. Ciapier Maskva viadzie aktyŭny nastup na ŭschodzie, sprabujučy zamacavać terytaryjalnyja dasiahnieńni. Navat dadatkovy cisk na Kitaj i Indyju, partnioraŭ Rasii, naŭrad ci źmienić hetuju łohiku da vosieni.

2. Pieramovy dla novych pieramovaŭ

Jak ličyć CNN, bolš realistyčny varyjant — damoŭlenaść ab praciahu dyjałohu, što moža «zamarozić» front z prychodam zimy. Kali Rasija da taho času zachopić Pakroŭsk, Kanstancinaŭku abo Kupiansk, jana atrymaje vyhadnyja pazicyi dla dalejšych dypłamatyčnych tarhoŭ.

Taksama nie vyklučana, što Kreml pasprabuje pastavić pad sumnieŭ lehitymnaść prezidenta Ukrainy Uładzimira Zialenskaha i sprabavać pryvieści da ŭłady va Ukrainie prarasijskich palitykaŭ.

3. Ukraina vytrymlivaje dva nastupnyja hady

Adznačajecca, što ŭ hetym scenary vajskovaja dapamoha ZŠA i Jeŭrasajuza dazvolić Kijevu zachavać najaŭnyja miežy, prymusiŭšy Maskvu znoŭ źviarnucca da pieramovaŭ. U vypadku pośpiechu na froncie Jeŭropa moža adpravić «siły strymlivańnia» — kantynhient NATA pablizu Kijeva i bujnych haradoŭ, jaki budzie dapamahać z łahistykaj i raźviedkaj.

4. Katastrofa dla Ukrainy i NATA

Na dumku analitykaŭ, u vypadku pravału padtrymki z boku ZŠA, paśla ŭmoŭnaj «razradki» pamiž Trampam i Pucinym, Rasija nibyta moža razhramić ukrainskija pazicyi na ŭschodzie i rušyć uhłyb krainy. Jeŭropa pasprabuje ŭtrymać situacyju, adnak biez amierykanskaha ŭdziełu moža nie spravicca.

Tady rasijskaja armija vychodzić na apieratyŭny prastor u Dnieprapiatroŭskaj i Zaparožskaj abłaściach i pravodzić razhrom USU. Zialenski sprabuje ŭzmacnić mabilizacyju, ale heta abaročvajecca ŭnutrypalityčnaj katastrofaj.

Heta — najhoršy scenar: raspad ukrainskaj abarony, palityčny kryzis i navat ryzyka straty dziaržaŭnaści.

5. Krach dla Pucina: afhanski scenaryj

Adznačajecca, što jość i lustranaja pierśpiektyva — kali Rasija zahraźnie ŭ vajnie, jak kaliści ŭ Afhanistanie. Rost strataŭ, cisk sankcyj, razład u adnosinach z Kitajem i Indyjaj, a taksama ŭnutranaja niezadavolenaść elitaŭ mohuć pryvieści da destabilizacyi samoha Kramla.

CNN piša:

«Paŭstańnie Pryhožyna ŭžo pakazała, što ŭ sistemie nie ŭsio tak stabilna, jak zdajecca. U hetym scenaryi Pucin vyhladaje mocnym, pakul zusim raptoŭna nie stracić usio».

Pry hetym telekanał ličyć, što «ni adzin z varyjantaŭ nie źjaŭlajecca dobrym dla Ukrainy», akramia apošniaha. I nivodzin ź ich nie moža realizavacca tolki volaj Pucina i Trampa — biez pramoha pryciahnieńnia Ukrainy da pahadnieńnia.

• 1
• 0
• 0
• 2
• 0
• 1
• 2
• 0