U Ispanii likvidavali złačynnuju arhanizacyju, jakaja zajmałasia vytvorčaściu i raspaŭsiudžvańniem kantrafaktnaj i kantrabandnaj tytuniovaj pradukcyi ŭ pravincyjach Małaha, Kordava i Sievilja na poŭdni krainy, paviedamlaje «Biełaruś i śviet» sa spasyłkaj na Okdiario.
U chodzie apieracyi pad nazvaj Crujina byŭ zatrymany 21 čałaviek, usie jany źjaŭlajucca ispancami. Taksama na padpolnych fabrykach znajšli i vyzvalili 18 hramadzian troch krain — Biełarusi, Kitaja i Vjetnama.
Pavodle acenak pravaachoŭnikaŭ, vytvorčaja mahutnaść hetych pradpryjemstvaŭ dasiahała 8 miljonaŭ cyharet u dzień, što ŭjaŭlaje saboj padatkovuju machinacyju na sumu bolš za 2 miljony jeŭra ŭ dzień (pavodle ich rynkavaj vartaści).
U chodzie praviedzienych pieratrusaŭ ahienty kanfiskavali abstalavańnie i materyjały, źviazanyja ź niezakonnaj vytvorčaściu, na sumu bolš za try miljony jeŭra. Ekspłuatavanyja pracaŭniki prybyli ŭ Ispaniju čatyry miesiacy tamu, ašukanyja arhanizacyjaj, jakaja vierbavała ich praz sacsietki iłžyvymi prapanovami pracaŭładkavańnia ŭ budaŭničaj śfiery. Abiacali płacić ad 2 500 da 3 000 jeŭra ŭ miesiac.
Tyja, chto adhuknuŭsia, ujechali ŭ krainu pavietram praz aeraport Małahi, dzie ich sustreli i dastavili ŭ furhonach na fabryki. Hałoŭnaja znachodziłasia na abjekcie ŭ Sjera-de-Jehuas — municypalitecie ŭ Małazie z nasielnictvam 3 500 čałaviek.
Na fabrykach u prybyłych adabrali mabilnyja telefony. A zatym bolš za 100 dzion trymali ŭ pierapoŭnienych pakojčykach i prymušali pracavać pa 12 hadzin u sutki biez apłaty — nibyta dziela pahašeńnia mierkavanaha doŭhu za dastaŭku ŭ Ispaniju.
U pracaŭnikoŭ byli tolki minimalnyja zručnaści — rukamyjnik, brudny duš, mikrachvaloŭka… Vokny byli zaklejenyja plonkaj i kardonam, kab nichto nie moh ich ubačyć zvonku.
U volny čas adzinym zaniatkam było siadzieć unutry, adrezanymi ad źniešniaha śvietu. Fabryka ŭ Sjera-de-Jehuas była samaj zahružanaj i aktyŭnaj, ale taksama pracavali punkty ŭ municypalitetach Asuna i Łusiena. Tytuń vyrablaŭsia masava i fasavaŭsia ŭ pački, što imitavali roznyja brendy.
Metaj rasśledavańnia palicyi było źniščeńnie fabryk i złačynnaj arhanizacyi. Ahienty nie čakali, što padčas pieratrusaŭ vyjaviać 18 ekspłuatavanych ludziej.
Ź ich 12 — hramadzianie Biełarusi i Kitaja — padali chadajnictva ab viartańni ŭ svaje krainy. Šaściora vjetnamcaŭ, naadvarot, paprasili dazvołu zastacca ŭ Ispanii.
Ciapier jany vyvučajuć ispanskuju movu i naviedvajuć kursy pavyšeńnia kvalifikacyi. Niekalki pracadaŭcaŭ užo abiacali dać im pracu paśla lehalizacyi statusu.
Aryštavanym hramadzianam Ispanii vystaŭlenyja abvinavačańni — u tym liku ŭ handli ludźmi, padatkovych machinacyjach i kantrabandzie tytuniovych vyrabaŭ.
Ciapier čytajuć
«Čaściej za ŭsio žučok staviać niedaloka ad razietak». Jak siłaviki prasłuchoŭvajuć biełarusaŭ pa telefonie i ŭ kvaterach13
Kamientary