«Razabrali budaŭničyja aharodžy za noč»: minčanie 20 hadoŭ zmahajucca za mini-park suprać AZS
Žychary minskaha mikrarajona Malinaŭka ŭžo dva dziesiacihodździ zmahajucca suprać budaŭnictva aŭtazapraŭki na nievialikim zialonym učastku pamiž vulicami Słabadskoj i Rafijeva, jaki ličać apošnim «zialonym ščytom» ad šumu i zabrudžvańnia MKAD, piša «Točka».
Aziarcoŭski trakt žvava złučaje ŭmierany minski ruch z vysakachutkasnaj MKAD. Pieršyja damy na ŭjezd u stalicu z hetaha boku — na vulicy Słabadskoj i Rafijeva.
Žychary hetych šmatpaviarchovak kampiensavali susiedstva z samaj chutkaj minskaj darohaj nievialikim zialonym astraŭkom ź dziasiatkam klonaŭ i biaroz. Mienavita hety placoŭka stała kamieniem spatyknieńnia dla minčan i miascovaj ułady: z 2003 hoda tut sprabujuć pabudavać AZS. Miascovyja — suprać.
Akramia MKAD, pablizu žyłoha rajona — CEC, a jašče kala čatyroch zapravak, jakija pryciahvajuć jašče bolš aŭtamabilaŭ, upeŭnienyja haradžanie.
U 2003 hodzie pazicyju miascovym udałosia adstajać. Toje ž paŭtaryłasia pry paŭtornych sprobach uźvieści AZS — u 2008-m i 2021-m. Ciapier, u 2025-m, znoŭ budoŭla.
Tolki na hety raz usio bolš surjozna: drevy ŭžo śpiłavali i na terytoryi pracujuć budaŭniki.
Zialonaja Malinaŭka VS urbanistyka
Mnohija žychary sučasnaha mikrarajona Malinaŭka pasialilisia tut z 90-ch hadoŭ. Jany pamiatajuć hety kutok jašče zialonym, z ščylnymi nasadžeńniami i śpievami sałaŭjoŭ, jakich čuli kožnuju letniuju noč.
Ciapier adkryć vokny ŭ miascovych damach ciažka: vielmi šumna, zaŭvažajuć miascovyja.
«Pobač u nas ščylny ruch pa haradskoj darozie, plus źjezd z kalcavoj, sama MKAD — vielmi šmat mašyn. Nu i, adpaviedna, vykidy ŭ pavietra: i CEC pobač, i čatyry zapraŭki», — adznačaje žycharka Taćciana Korzun.
Ci adpaviadaje ŭzrovień šumu i zabrudžvańniaŭ pryniatym u Biełarusi normam, haradžanie nie viedajuć. Adnak u adzin z hadoŭ, kali na ŭčastku płanavali budoŭlu, u mikrarajon pryjazdžaŭ ekołah, kab vyvučyć miascovaje stanovišča.
«Jon śćviardžaŭ, što tut nielha budavać AZS, maksimum — dobraŭparadkavać park. Jaho imia ludzi nie zapomnili, takija rečy naŭrad ci pryjdzie ŭ hałavu zapisać i zachavać. Pamiatajem tolki, što byŭ pažyły. Ciapier, raz budoŭlu ŭzhadnili, napeŭna, usie pakazčyki ŭ normie. Ale i ŭjaŭleńni pra normu za hety čas, vierahodna, źmianilisia», — miarkujuć minčanie.
Podpisy byli «suprać», a stali «za»?
Bolš za 20 hadoŭ haradžanam udavałasia ŭłasnaj niazhodaj strymlivać niepažadanuju dla ich budoŭlu. Pieršy raz — u 2003-m.
«Tady situacyju našym inicyjatyŭnym žycharam udałosia danieści da rajonnaha deputata. Jon pryniaŭ bok bolšaści (my tady sabrali kala tysiačy podpisaŭ). Napeŭna, paspryjaŭ niejak — i raboty chutka skončylisia», — uspaminaje Taćciana.
Kali pytańnie z budoŭlaj znoŭ stała aktualnym, miascovyja zładzili stychijny zbor — natoŭp litaralna za noč razabraŭ budaŭničyja aharodžy, raskazvajuć žychary Malinaŭki. Niazhodu znoŭ aformili i dakumientalna, ale kolki podpisaŭ sabrali ŭ toj raz, nie pamiatajuć.
«Tady z pradstaŭnikami tych, chto chacieŭ budavać, u nas była sustreča ŭ ŽES. Jany prynieśli pačku z podpisami žycharoŭ, jakija nibyta za budaŭnictva zapraŭki. Ale na listach ničoha nie było napisana — tolki podpisy. My pačali praviarać i akazałasia, što tam znajomyja nam ludzi. Źviazalisia ź imi — a heta tyja, chto pakinuŭ hołas suprać budaŭnictva AZS. Tady my zajavili, što źvierniemsia ŭ prakuraturu, što heta machlarstva, zvyčajnaja padrobka! Tady ŭsio chutka zharnułasia», — adznačaje Taćciana.
Tak, budoŭla zacichła bolš čym na 10 hadoŭ, ale ŭ 2021-m znoŭ uźnikła na haryzoncie mikrarajona.
«U bližejšy čas zapraŭka budavacca nie budzie»
Čatyry hady tamu intaresy žycharoŭ Malinaŭki pradstaŭlaŭ Ivan Cieraščankaŭ — zvyčajny žychar kvatery na Rafijeva. Jon žartuje: u miascovaj administracyi ŭžo tradycyja — adnaŭlać budoŭlu kožny raz z pryznačeńniem novaha kiraŭnika.
«U 2021-m, kali staršynioj była Taćciana Kaladka, my sabrali 602 podpisy suprać budaŭnictva AZS i aformili kalektyŭny zvarot. Zrabili heta paśla paviedamleńnia ab pačatku hramadskaha abmierkavańnia: svajo mierkavańnie vykazali dakładna ŭ termin», — raskazvaje Ivan.
Z-za kavidu ŭ administracyi nie viali asabistyja pryjomy hramadzian, tamu dakumient mužčyna addaŭ supracoŭnicy. Taja śpiecyjalna spuściłasia da Ivana na pieršy pavierch.
«Nie pamiataju, jakaja ŭ jaje pasada. Ale tam ža kamiery. Kali jość sumnievy, jak było, — možna pahladzieć. Žančyna pryniała dakumient, pastaviła štamp. U mianie zastałasia kopija, u jaje — aryhinał», — pakazvaje bieražliva zachavanuju tečku surazmoŭca.
Piśmovaha adkazu na zvarot Ivan nie atrymaŭ, tamu praz čas sam patelefanavaŭ u administracyju.
«Mnie skazali, što naša mierkavańnie ŭličana, i zapraŭka ŭ bližejšy čas budavacca nie budzie. Ja spytaŭ: «U bližejšy? A dalej jak?». Adkazali, što dalej žyćcio pakaža», — pierakazvaje dyjałoh mužčyna.
Što ciapier?
Suprać zapraŭki ŭ mikrarajonie vystupajuć pakaleńniami. Ciapier u inicyjatyŭnuju hrupu ŭvachodzić i Palina Korzun-Fomčanka, dačka Taćciany. Razam z susiedkaj dziaŭčyna ŭ čaćvier, 7 žniŭnia, pryjšła ŭ administracyju Maskoŭskaha rajona, kab razabracca ŭ situacyi.
«Pierš za ŭsio my ŭdakładnili, čamu budoŭla ŭ našym mikrarajonie pačałasia mienavita ciapier, bo ŭ 2021-m my sabrali dosyć šmat podpisaŭ. Plus da ŭsiaho ŭ dadzieny momant (pa 18 žniŭnia) idzie hramadskaje abmierkavańnie horadabudaŭničaha prajekta pa vulicach Słabadskaja — Alšanskaja — MKAD — praśpiekt Dziaržynskaha», — pieraličvaje Palina niekatoryja temy, jakija zakranuli na pryjomie.
Jak vyśvietliłasia, hramadskaje abmierkavańnie nie ŭklučaje ŭčastak na skryžavańni Słabadskoj i Rafijeva, a prajekt AZS uzhodnieny daŭno.
«My taksama nie zmahli znajści ŭ sistemie elektronnaj rehistracyi zapisaŭ pra naš zvarot ad 2021-ha hoda. A sam numar dakumienta «01/2» chutčej pakazvaje na toje, što zvarot uručnuju zarehistravali ŭ zvyčajnym žurnale», — dzielicca tym, što ŭdałosia vyśvietlić, Palina.
Pa vynikach hutarki dziaŭčaty pakinuli piśmovy zapyt na pošuk dakumienta. Ciapier pytańni, što ž stała z 600 podpisami i čamu, niahledziačy na ich, budoŭla ŭsio roŭna pačałasia, chvalujuć haradžan bolš za ŭsio.
Što chočuć miascovyja
Žychary mikrarajona daŭno maryli pra ŭładkavańnie svajho «zialonaha piatačka» — prasili pakinuć drevy i navat zasadzić terytoryju novymi.
«My prapanoŭvali zrabić placoŭku dla vyhułu sabak: u nas heta vialikaja prablema. Nam adkazali, što dla realizacyi prajekta inicyjatyŭnaj hrupy 10% ad jaho koštu pavinny pakryć žychary. Niahledziačy na toje, što ŭsie sabačniki płaciać adpaviedny padatak», — adznačaje Palina.
Žychary nie suprać samastojna pradumać placoŭku, ale budoŭla ŭžo kipić, i času na heta paprostu niama.
«Paśla 2021-ha ŭsie dumali, što tema zakrytaja. Voś i nie śpiašalisia», — abhruntoŭvajuć miascovyja.
U pažyłych ža žycharoŭ mikrarajona asablivyja narakańni nakont ciažkaha pavietra i niedastatkovaha azielanieńnia.
«Ankachvorych u domie šmat. Voś i ja zmahajusia. I ŭsie hetyja vychłapnyja hazy, šum ad MKAD lepš ni starym, ni maładym nie robiać», — padkreślivaje 70-hadovaja Maryja.
Na momant publikacyi na placoŭcy vyrubili niekalki dziasiatkaŭ dreŭ.
Uzamien, paviedamili ŭłady, pasadziać udvaja bolš. Ale maładych, tankastvołych, zaŭvažajuć žychary. Takija naŭrad ci mohuć zamianić daŭnija klony.
Ciapier žychary Malinaŭki znachodziacca ŭ pošuku ekołaha i jurysta, jakija dapamahli b haradžanam razabracca ŭ dadzienaj situacyi.
Kamientar miascovych uład
Pazicyju pa pytańni budoŭli administracyja Maskoŭskaha rajona vykazała na ŭłasnym sajcie.
Miascovyja ŭłady padkreślili: raźmiaščeńnie AZS u hetaj zonie — nie spantannaje rašeńnie. Jano praduhledžana jašče prahramaj raźvićcia sietki AZS na 2016—2020 hady. Saŭmin zaćvierdziŭ heta rašeńnie ŭ Pastanovie ad kastryčnika 2015-ha.
«U sakaviku 2021 hoda (z 06.03.2021 pa 30.03.2021), pakolki na toj momant nie było zaćvierdžanaha detalovaha płana terytoryi, było praviedziena abaviazkovaje hramadskaje abmierkavańnie hetaha asobnaha abjekta. Usie zaŭvahi i prapanovy žycharoŭ, jakija pastupili ŭ chodzie taho abmierkavańnia, byli ŭvažliva razhledžany na pasiadžeńni Horadabudaŭničaha savieta pry hałoŭnym architektary Minska», — śćviardžajuć u rajonnaj administracyi.
Śpiecyjalisty dapaŭniajuć: saviet uchvaliŭ raźmiaščeńnie abjekta i ŭličyŭ mierkavańni hramadzian. A mienavita — u prajekt uklučyli prapanovy pa dadatkovych mierach biaśpieki darožnaha ruchu (u tym liku piešachodnyja zony) i pa kampiensacyjnym azielanieńni terytoryi.
Što pa ekałohii?
Prajektnaja dakumientacyja ŭklučaje abaviazkovyja ekałahičnyja raźliki, zaŭvažajuć u administracyi.
«Śpiecyjalizavany analiz pakazaŭ, što pieravyšeńniaŭ ustanoŭlenych hranična dapuščalnych kancentracyj škodnych rečyvaŭ nie budzie ni pa asobnych inhredyjentach, ni pa ich sukupnym uździejańni na ŭsioj prylehłaj terytoryi», — zapeŭnivajuć śpiecyjalisty.
Taksama pa słovach miascovaj ułady, ustanoŭlena sanitarna-achoŭnaja zona ŭ 50 mietraŭ. U hety ž čas bližejšy žyły dom raźmieščany na adlehłaści 54 mietraŭ, što adpaviadaje patrabavańniam i zabiaśpiečvaje nieabchodny bufier.
Paźniej abjekt na skryžavańni vulic Rafijeva i Słabadskoj uklučyli ŭ prahramu raźvićcia AZS na 2023—2025 hady. Saŭmin heta zaćvierdziŭ u krasaviku 2023-ha. Usie ŭzhadnieńni atrymali ŭžo ŭ 2025-m.
Minharvykankam vydaŭ rašeńnie ab budaŭnictvie RDUP «Biełarusnafta-Minskaŭtazapraŭka» 8 maja 2025-ha. Aficyjny ž dazvoł na budaŭnictva datujecca 4 žniŭnia.
Jakoje hramadskaje abmierkavańnie ciapier idzie?
Ciapier (z 4 pa 18 žniŭnia) prachodzić hramadskaje abmierkavańnie inšaha dakumienta — «Horadabudaŭničaha prajekta detalovaha płanavańnia terytoryi» ŭ miežach vuł. Słabadskoj — Alšanskaj — MKAD — pr. Dziaržynskaha.
«U ramkach hetaha detalovaha płana ŭličana i raźmiaščeńnie dadzienaj AZS, jak abjekta, prajektavańnie i ŭzhadnieńnie jakoha ŭžo zavieršana raniej», — padkreślivajuć śpiecyjalisty rajonnaj administracyi.
Ciapier čytajuć
«Čaściej za ŭsio žučok staviać niedaloka ad razietak». Jak siłaviki prasłuchoŭvajuć biełarusaŭ pa telefonie i ŭ kvaterach12
Kamientary
A čto jeŝie ždať ot OKKUPACIONNOJ administracii?
im plevať s vysokoj kołokolni na ludiej.