Były hałoŭny ideołah Biełarusi pradaŭ dom u Drazdach za $600 tysiač
Aleh Pralaskoŭski zajmaŭsia prapahandaj u 2000-2010-ch, a paśla nibyta viarnuŭsia na radzimu ŭ Rasiju.
Samym darahim domam, jaki pradali ŭ Minsku ŭ lipieni 2025 hoda, staŭ katedž na vulicy Pakroŭskaj. Jak paviedamlaje Realt.by sa spasyłkaj na Rejestr cen na ziamielnyja ŭčastki, za jaho zapłacili $600 tysiač. Adras doma nie paviedamlajecca, viadoma tolki jaho płošča — amal 456 kvadratnych mietraŭ.
Na vulicy Pakroŭskaj znachodzicca paŭtara dziasiatki damoŭ. Niekatorymi ź ich vałodajuć biźniesmieny, a častku ŭčastkaŭ razdavali ŭ siaredzinie 2000-ch pradstaŭnikam łukašenkaŭskaj elity — čynoŭnikam i top-spartsmienam.
Siarod haspadaroŭ elitnaha žylla na Pakroŭskaj vice-premjer Natalla Piatkievič, kolišni vice-premjer Ivan Bambiza. Tut mieli nieruchomaść chakieisty Rusłan Salej i Uładzimir Cypłakoŭ (abodva zahinuli).
Damy budavalisia pa indyvidualnych prajektach, tamu płošča ŭ kožnaha ź ich adroźnivajecca ad susiedniaha.
Dom płoščaj 455,9 mietra — adziny, jaki dakładna traplaje pad apisańnie — naležaŭ byłomu ministru infarmacyi Alehu Pralaskoŭskomu.
Pralaskoŭski — uradženiec padmaskoŭnaha Sierhijeva Pasada, doŭhi čas išoŭ pa vajskovaj linii. Kali ŭznačaliŭ analityčny adździeł słužby biaśpieki Łukašenki, to karjera nabyła druhoje dychańnie.
Pralaskoŭski ŭznačalvaŭ infarmacyjnaje ahienctva BiełTA, byŭ namieśnikam kiraŭnika Administracyi prezidenta. Paśla byli kresły hałoŭnaha ideołaha krainy, dyrektara Infarmacyjna-analityčnaha centra i, narešcie, pasada ministra infarmacyi.
U 2014 hodzie Pralaskoŭskaha źniali z pasady, bolš pra jaho nie było čuvać. Znajomyja eks-čynoŭnika kazali, što jon viarnuŭsia na radzimu ŭ Sierhijeŭ Pasad.
Ciapier čytajuć
U hadavinu śmierci Žanny Fryskie Dźmitryj Šepieleŭ raspavioŭ, čamu nie dazvalaje synu bačycca ź jaje svajakami16
Kamientary
[Zredahavana]