Niepał u najbližejšyja dva hady nie budzie brać z alpinistaŭ płatu za ŭzychodžańnie na viaršyni 97 himałajskich hor, kab stymulavać turyzm u addalenych i mienš zamožnych rajonach krainy i pryciahnuć tudy alpinistaŭ, piša Bi-bi-si.
Adnačasova płata za dazvoł na ŭzychodžańnie na Evierest, najvyšejšuju viaršyniu śvietu, u pik siezona ź vieraśnia vyraście da 15 tysiač dalaraŭ — heta pieršaje pavyšeńnie amal za 10 hadoŭ.
Abviaščajučy pra svajo rašeńnie, ministerstva turyzmu Niepała vykazała nadzieju, što hetaja inicyjatyva pryciahnie ŭvahu da «nieviadomych turystyčnych praduktaŭ i napramkaŭ».
Alpinizm — heta važnaja krynica dachodu dla Niepała, na terytoryi jakoha znachodziacca vosiem ź dziesiaci samych vysokich hor śvietu. U minułym hodzie zbory za ŭzychodžańnie prynieśli 5,9 młn dalaraŭ ZŠA, bolš za try čverci hetaj sumy pryjšłosia na Evierest.
Viaršyni, na jakija možna budzie padniacca biaspłatna, raźmieščanyja ŭ zachodnich niepalskich pravincyjach Karnali-Pradeš i Sudurpaščym-Pradeš. Ich vyšynia — ad 5970 mietraŭ da 7132 mietraŭ. Abiedźvie hetyja pravincyi adnosiacca da liku samych biednych i najmienš raźvitych rehijonaŭ krainy.
«Niahledziačy na zachaplalnuju pryhažość hetych hor, kolkaść turystaŭ i alpinistaŭ tut vielmi małaja z-za składanaha dostupu. My spadziajomsia, što admiena płaty za ŭzychodžańnie dapamoža źmianić situacyju», — skazaŭ Chimał Hautam, dyrektar Departamienta turyzmu Niepała.
«Novyja turysty dapamohuć stvaryć pracoŭnyja miescy, prynieści dachod i ŭmacavać miascovuju ekanomiku», — cytuje jaho skazaŭ jon.
Adnak pakul niezrazumieła, ci płanujuć ułady palapšać infrastrukturu i transpartnaje złučeńnie z hetymi addalenymi rajonami. Nie jasna taksama, nakolki paśpiachova miascovyja ŭłady spraviacca z napłyvam alpinistaŭ, kali inicyjatyva biaspłatnaha ŭzychodžańnia budzie realizavanaja.
Alpinisty tradycyjna nie vyjaŭlali asablivaj cikavaści da hetych 97 ciažkadastupnych viaršyń — za apošnija dva hady jany pabyvali tolki na 68 ź ich. Dla paraŭnańnia: u 2024 hodzie ŭłady vydali 421 dazvoł na ŭzychodžańnie na Evierest.
Evierest, najvyšejšaja viaršynia śvietu vyšynioj bolš za 8849 mietraŭ, u apošnija hady cierpić ad praźmiernaj cikavaści z boku alpinistaŭ i ekałahičnych prablem.
U krasaviku 2024 hoda Viarchoŭny sud Niepała pastanaviŭ, što ŭrad pavinien abmiežavać kolkaść dazvołaŭ na ŭzychodžańnie na Evierest i niekalki inšych viaršyniaŭ, zajaviŭšy, što «nieabchodna ŭličvać prapusknuju zdolnaść hor».
U studzieni hetaha hoda ŭłady abviaścili ab pavyšeńni płaty za dazvoł na 36%.
Dla tych, chto pasprabuje pakaryć viaršyniu pa-za pikavym siezonam z krasavika pa maj, ciapier košt uzychodžańnia na Evierest ź vieraśnia pa listapad składzie 7500 dalaraŭ, a ź śniežnia pa luty — 3750 dalaraŭ.
Parłamient Niepała taksama abmiarkoŭvaje novy zakon, jaki budzie patrabavać ad kožnaha, chto žadaje ŭzyści na Evierest, spačatku padniacca na inšuju niepalskuju haru vyšynioj bolš za 7 tysiač mietraŭ.
Heta inicyjatyva zrobić viaršyni Karnali-Pradeš i Sudurpaščym-Pradeš «idealnymi trenirovačnymi placoŭkami», piša Kathmandu Post.
«Šmatpartyjnaść, pluralizm mierkavańniaŭ — heta brachnia, zachodniaja brachnia». Łukašenka razhladaje kanstytucyjnaje viartańnie da savieckaj sistemy74
«Šmatpartyjnaść, pluralizm mierkavańniaŭ — heta brachnia, zachodniaja brachnia». Łukašenka razhladaje kanstytucyjnaje viartańnie da savieckaj sistemy
«Dziaŭčyna niedzie praź siem siekund užo pikiravała bieź piłota». Siabar deltapłanierysta, jaki raźbiŭsia ŭ Stročycach, raskazaŭ, što pryviało da trahiedyi33
Kamientary