Biełaruska zrabiła novy pašpart, a jon akazaŭsia niesapraŭdnym: Daviedałasia pra heta ŭ aeraporcie

Dla pajezdki ŭ AAE pašpart pavinien dziejničać minimum paŭhoda. Vieranika pra heta viedała, tamu zahadzia zaniałasia zamienaj dakumienta. Novy pašpart atrymała 1 lipienia hetaha hoda. Razam ź im dziaŭčyna atrymała na ruki stary — z šenhienam. Heta robicca dla taho, kab padčas nastupnaj padačy ŭ pasolstvie pakazać dobruju vizavuju historyju.

— Ja nie pieršy raz pakidaju sabie dva pašparty. Dziesiać hadoŭ tamu taksama lotała tak za miažu, uvohule prablem nie było. Stary treba pakazvać tolki dla pajezdak u Jeŭrasajuz, kali pierasiakaješ miažu. Tam było anulavana ŭsio, akramia staronki ź vizaj.

Sproba źjechać №1. «Na kantroli nie prapuścili»

Źbirajučysia ŭ adpačynak ź Minska ŭ Emiraty, dziaŭčyna ŭziała z saboj tolki novy pašpart, bo šenhien joj u hetaj pajezdcy byŭ nie patrebny.

— Vylet byŭ načny, u 00:30 6 vieraśnia. Prychodžu na kantrol da pamiežnikaŭ, daju dakumient, dziaŭčyna hladzić jaho doŭha, pačynaje hartać, potym kamuści telefanuje, prychodzić načalnik źmieny… Mnie praz akienca zajavili, što ŭ mianie niesapraŭdny dakumient. Ja kažu: jak takoje moža być? Jany skazali, što treba iści ŭ milicyju. Da pasadki ŭ samalot zastavałasia 40 chvilin. Dziaŭčyna patłumačyła svaju situacyju z vydačaj dvuch pašpartoŭ, ale na rejs jaje ŭsio roŭna nie puścili. Samalot palacieŭ bieź jaje.

— U vyniku mnie addali papieru, u jakoj napisana, što pašpart u mianie kanfiskavali z-za taho, što dakumient niesapraŭdny. Skazali, što za takoje praduhledžana administracyjnaja adkaznaść, ale štrafu nie budzie, tamu što heta nie maja vina. Usio było dastatkova vietliva i karektna ź ich boku, — uspaminaje biełaruska.

Pavialičyć

I tym nie mienš noč vydałasia stresavaj. Pa słovach Vieraniki, tur kaštavaŭ kala $1330. Zhubić hetyja hrošy było vielmi kryŭdna, tamu dziaŭčyna stała šukać varyjanty.

Jana daviedałasia, što ŭ toj ža dzień, 6 vieraśnia, zastavalisia bilety na rejs u Dubaj z vyletam u 13:30, i pasprabavała chutka vyrašyć pytańnie z pašpartam.

— Ja razvažała tak: u mianie albo zharać $1330, bo naŭrad ci ahienctva viernie mnie hrošy, albo ja dapłaču $450 — i ŭsio ž taki adpačnu.

Sproba źjechać №2. I znoŭ «pašpart niesapraŭdny»

Da vyletu zastavałasia pałova dnia. Ranicaj dziaŭčyna ŭžo była ŭ adździele pa hramadzianstvie i mihracyi (AHiM), jaki vydaŭ joj pašpart.

— Mnie patłumačyli, što supracoŭnik dadała ptušačku, jakaja stavić pašpart na kantrol, i heta značyć, što pašpart niesapraŭdny. Pavinny byli zrabić heta tolki na stary pašpart, a pastavili i na novy, — raspaviadaje Vieranika.

— U AHiM źviazalisia z aeraportam, i tyja paćvierdzili, što dakumient u ich, ale addać jaho jany mohuć tolki ŭpaŭnavažanamu supracoŭniku AHiM. Mnie skazali, što supracoŭnik pajedzie sa mnoj u aeraport. I paralelna źniali ptušačku ab tym, što pašpart na kantroli. Ja paśpieła kupić bilet, schapić valizku i znoŭ pryjechała ŭ aeraport, dzie atrymała na ruki pašpart.

Ale vydychnuć z palohkaj atrymałasia nie adrazu. Na kantroli historyja z «niesapraŭdnym dakumientam» paŭtaryłasia.

— Źmiena novaja, mianie znoŭ nie puskajuć. Ja prašu patelefanavać u AHiM namieśniku načalnika, ale nichto telefanavać nie śpiašajecca. Pryjšoŭ načalnik źmieny i patłumačyŭ: pašpart z kantrolu źniali, ale, pakul dakumient projdzie pa ŭsich bazach i infarmacyja abnovicca, patrebny čas. I heta nie 15 chvilin i nie 2 hadziny. Jašče trochi pakutlivaha čakańnia — i na hety raz usio skončyłasia dobra.

Pamiežnaja słužba aeraporta ŭsio ž taki zmahła źviazacca z AHiM i atrymać paćviardžeńnie, što pašpart sapraŭdny. A turystcy ŭdałosia, narešcie, dabracca da patrebnaha hiejta i palacieć u adpačynak. U Dubai prablem z pašpartam užo nie było, pa prylocie dadomu — taksama.

Ale źjaviłasia jašče adna detal, jakaja dadała Vieranicy chvalavańniaŭ u hetaj pajezdcy. Dla avijakampanii ŭnočy 6 vieraśnia jana «nie źjaviłasia na pasadku», a heta značyć, što była ryzyka anulavańnia zvarotnaha bileta.

— Niahledziačy na toje, što ja była zarehistravana na rejs i mieła pasadačny tałon, na pasadku ja nie źjaviłasia. Heta praviła nazyvajecca no-show. Potym my jašče niekalki dzion čakali paćviardžeńnia ad avijakampanii, što za mnoj usio ž taki zachavany zvarotny bilet. U vyniku ŭsio abyšłosia — na zvarotny bilet tracicca nie pryjšłosia.

«Straciła $550 nie pa svajoj vinie»

Biełaruska paličyła svaje vydatki: $450 i dadatkova $100 na taksi da hatela (užo apłačany tranśfier dziaŭčyna prapuściła). Dziaŭčyna płanuje pisać dasudovuju pretenziju ŭ AHiM z prośbaj kampiensavać niepradbačanyja vydatki.

— Nasamreč, ja vielmi ŭdziačna, što majo pytańnie tak chutka vyrašyłasia. Ale heta nie admianiaje taho, što ja patraciła svaje hrošy, kab hety adpačynak uvohule adbyŭsia. A majoj viny ŭ hetym niama, — kaža dziaŭčyna.

— Chaču jašče dadać, što ŭ takich situacyjach vielmi važna zachoŭvać spakoj. Nie treba płakać, isteryć, umolvać, stajać na kaleniach — vas usio roŭna nie vypuściać z krainy ź niesapraŭdnym dakumientam. Supracoŭniki pracujuć pa svaich praviłach i nie mohuć rabić vyklučeńniaŭ. Važna jak maha chutčej pryniać situacyju i pačać raźbiracca z hetym.

Žurnalisty taksama źviarnulisia pa tłumačeńni ŭ pres-słužbu HUUS Minharvykankama. Voś jak prakamienciravali hety vypadak:

— Sapraŭdy, da nas źviarnułasia minčanka, u jakoj supracoŭniki pamiežnaha kantrolu zabrali pašpart. My ŭstanavili, što pry vydačy hramadziancy novaha pašparta była dapuščana techničnaja pamyłka. Supracoŭniki AHiM apieratyŭna adreahavali na ŭźnikłuju situacyju i na praciahu niekalkich hadzin va ŭzajemadziejańni z adździełam pamiežnaha kantrolu likvidavali dapuščanuju pamyłku.

• 0
• 0
• 4
• 19
• 8
• 0
• 6
• 0