Upieršyniu za dziesiacihodździe «Biełłakt» spracavaŭ ź minusam, dy jašče i ahromnistym. I voś čamu
Źjaviłasia śviežaja spravazdačnaść hihanta biełaruskaj małočnaj pramysłovaści, vaŭkavyskaha «Biełłakta», lidara pa vytvorčaści suchoha dziciačaha charčavańnia nie tolki ŭ Biełarusi, ale na ŭsioj postsavieckaj prastory. Stabilna paśpiachovy zavod, mažarytarnym akcyjanieram jakoha źjaŭlajecca dziaržava, raptoŭna staŭ vialikim daŭžnikom z zatavaranymi składami i admoŭnaj rentabielnaściu.
Finansavaja spravazdačnaść «Biełłakta» za 2025 hod nie padobnaja da spravazdačnaści zdarovaha pradpryjemstva, jakim zavod biezumoŭna źjaŭlaŭsia apošniaje dziesiacihodździe. Dla ilustracyi anamalii i paraŭnańnia «Naša Niva» praanalizavała finansavyja dakumienty «Biełłakta» z 2015 hoda.
Dziesiacihodździe «Biełłakt» stabilna naroščvaŭ vyručku, imkliva raźvivajučysia i vyrastajučy na dvuchznačny pracent na hod. Praryŭnoha rostu nie adbyłosia tolki ŭ 2023 i 2025 hodzie — u pieršy z hetych hadoŭ pad uździejańniem sankcyj rynak pierabudoŭvaŭsia, a ŭ druhi zapavoliłasia rasijskaja ekanomika.
Ale i vialikich padzieńniaŭ nie zdaryłasia. Pry hetym usio roŭna: u 2025 vyručka na plus-minus adnym uzroŭni, sabiekošt taksama, a pa vynikach hoda — 12 miljonaŭ rubloŭ strat. Čamu tak zdaryłasia? Što źjeła prybytak?
Uźlacieli kiraŭničyja vydatki (41 miljon rubloŭ) i vydatki na realizacyju (47 miljonaŭ rubloŭ), u 2024 hodzie było 29 miljonaŭ rubloŭ i 38 miljonaŭ rubloŭ adpaviedna.
Kiravańnie i realizacyja źjeli bolšuju častku prybytku, reštu dajeli inšyja vidy naturalnych vydatkaŭ, a ŭ minus zahnali vypłaty pa kredytach — u pradpryjemstva ŭ 4,3 razu vyraśli straty pa finansavaj dziejnaści.
I kali b tolki heta.
Za adzin hod pradpryjemstva stała hihanckim daŭžnikom. Karotkaterminovyja daŭhi (da pahašeńnia ciaham hodu) vyraśli amal u siem razoŭ: z 15,5 miljona da 103,6 miljona rubloŭ!
Razam z hetym na 100 miljonaŭ rubloŭ vyraśli zapasy, u asnoŭnym — hatovaj pradukcyi.
Hrašovych srodkaŭ na rachunkach stała mienš: skaračeńnie z 23 miljonaŭ da 6 miljonaŭ. A nieraźmierkavany prybytak (nazapašanaja pradpryjemstvam paduška) skaraciŭsia na 30 miljonaŭ rubloŭ (z 153 miljonaŭ da 122 miljonaŭ). Inšymi słovami, «Biełłakt» prajeŭ usio toje, što zarabiŭ za niekalki apošnich hod.
Dyk što zdaryłasia z zavodam? Tłumačeńnie prostaje. Letam 2025‑ha da paśpiachovaha pradpryjemstva dałučyli Hrodzienski kansiervavy zavod.
Jaho bałansavy košt i składskija zapasy acanili ŭ dziasiatki miljonaŭ rubloŭ, jakija dadalisia ŭ aktyvy «Biełłakta», ale pryrost takich aktyvaŭ nie pavinien uvodzić u zman, tamu što sam zavod staŭ stratnym, a harantyi, što zapasy hatovaj pradukcyi pieratvoracca ŭ hrošy — niama.
Kali hetamu pašyranamu «Biełłaktu» znoŭ udasca viarnucca ŭ zonu prybytkovaści — pytańnie. Heta moža być mahčyma pry spryjalnaj rynkavaj kanjunktury, umiełym markietynhu i aptymizacyi tych śfier, jakija źjadajuć prybytak.
Finansavyja zapasy, adkładzienyja «Biełłaktam» ŭ paśpiachovyja hody, u niejkim sensie dazvalajuć takija šokavyja ekśpierymienty.
Prynamsi častku strat pa finansavaj dziejnaści ŭ 2025 hodzie, a taksama rost zapazyčanaści možna patłumačyć aktyŭnym inviestavańniem u novy prajekt. Praŭda, ci tak heta ŭ realnaści — nieviadoma.
Pry hetym viadoma, što «Biełłakt» prynamsi z 2018 hoda ŭžo ŭdzielničaŭ u dziejnaści Hrodzienskaha kansiervavaha zavoda, šukajučy tamu prymianieńnie ŭ ramkach svaich biznes-pracesaŭ i arandujučy častku abstalavańnia.
Ciapier čytajuć
Chto toj zamiežnik, jaki zabiŭ žonku i zhvałtavaŭ padčarycu ŭ Dobrušy14
Chto toj zamiežnik, jaki zabiŭ žonku i zhvałtavaŭ padčarycu ŭ Dobrušy
Alaksandr Nadsan pieršy raz pryjechaŭ u Biełaruś paśla saraka hadoŭ emihracyi. Minskaja moładź niečakana znajšła ŭ im toje, čaho nie bačyła ŭ svaich baćkach88
Alaksandr Nadsan pieršy raz pryjechaŭ u Biełaruś paśla saraka hadoŭ emihracyi. Minskaja moładź niečakana znajšła ŭ im toje, čaho nie bačyła ŭ svaich baćkach8
«Kali i pryjedu ŭ Biełaruś, to ŭžo jak turyst». Arhienciniec chacieŭ zrabić biznes u Biełarusi, ale jaho vysłali za drabiazu. Ciapier dazvolili viarnucca, ale jość niuans22
Kamientary