U Pleščanicach vystupić lehiendarny ŭ svoj čas hurt «Technałohija». Jaho apłaciŭ čałaviek, jaki haściŭ tut u babuli

U budučuju subotu, 20 vieraśnia, u Pleščanicach vystupić papularny ŭ 90‑ch pop-hurt «Technałohija». Heta tyja, što śpiavali: «Naciśni na knopku — atrymaješ vynik. I tvaja mara zbudziecca». U hetym hodzie hurtu spoŭnicca 35 hadoŭ, ale ŭ Biełaruś jany pryjeduć na paŭtary hadziny i tolki dziela taho, kab vystupić chedłajnierami na «Pleščanickim kirmašy».

Dla haradskoha pasiołka kancert z udziełam lehiendarnaha hurta — heta nietypovaja historyja.

Haradski pasiołak Pleščanicy znachodzicca za 60 km ad Minska, jechać na mašynie kala 40 chvilin. Hetaje miesca možna było b pastavić u adzin šerah sa mnostvam inšych typovych pasiołkaŭ, dzie jość aŭtavakzał, škoła, balnica — uvohule, usia standartnaja infrastruktura. Ale nie: za apošnija niekalki hadoŭ Pleščanicy stali asablivymi. Pra heta śviedčyć i budučy vystup lehiendarnaha hurta «Technałohija».

Usie vydatki pa pryjeździe hurta ŭziaŭ na siabie viadomy fizik-jadzierščyk, uładalnik IT-kampanii Andersen Alaksandr Chomič.

Biznesmien naradziŭsia ŭ Połacku, ale maje niepasrednaje dačynieńnie da Pleščanic. Jak raskazali miascovyja žychary, tut žyli dziadula i babula Alaksandra, i jon kožnaje leta pravodziŭ u ich. Ciapier jaho ŭsie miascovyja nazyvajuć prosta «miecenat».

Za apošnija niekalki hadoŭ Alaksandr Chomič pabudavaŭ u Pleščanicach dva parki, ahulnaja płošča jakich zajmaje 2,2 ha. — Samy bujny park my nazvali ŭ honar Nabokava, lubimaha piśmieńnika Alaksandra. Druhi — heta vialikaja placoŭka dla dziaciej ź vializnym ekranam dla prahladu filmaŭ, multfilmaŭ, — raskazaŭ Onliner staršynia Pleščanickaha sielvykankama Alaksandr Sidarevič.

— Alaksandr Chomič stolki ŭžo zrabiŭ dla Pleščanic, što vam dnia nie chopić, kab napisać pra heta. Jon kuplaŭ leki ŭ miascovuju balnicu, uładkavaŭ parki — ukłaŭ užo kala 1,5 młn dalaraŭ.

Posmotrieť etu publikaciju v Instagram

Publikacija ot Pleŝienicy Life (@pleschenitsy_life)

— Vystup «Technałohii» — jaho ideja? — Nie, maja, — pryznajecca Alaksandr Sidarevič.

— Jon skazaŭ, što možna vybrać luby hurt — i ja vybraŭ «Technałohiju». Kolki heta budzie kaštavać, ja nie mahu skazać: pryjezd hurta ŭ Pleščanicy poŭnaściu arhanizavaŭ Alaksandr, nam užo prosta patelefanavali arhanizatary i raskazali, jak i što budzie. Takoje, viadoma, u nas budzie ŭpieršyniu, tak što pryjazdžajcie abaviazkova da nas na śviata!

Adznačym, što vystup «Technałohii» projdzie ŭ ramkach miascovaha śviata «Pleščanicki kirmaš», kirmaš startuje ŭ 16:30.

A ŭ 19:30 chedłajniery zaśpiavajuć dla ŭsich «Dziŭnyja tancy», «Siońnia ŭnočy», «Naciśni na knopku», «Usio, što ty chočaš». Śviatočny viečar pradoŭžycca dyskatekaj z kavier-hrupaj «Minskaje mora» («NeMoRe»).

• 4
• 0
• 1
• 3
• 0
• 0
• 0
• 0