U heta składana pavieryć, ale niekatoryja aŭto ŭ Biełarusi kaštujuć našmat tańniej, čym u Jeŭropie. Jak takoje mahčyma?
Biełarusy zvykli mierkavać, što aŭtamabili ŭ Jeŭropie kaštujuć značna tańniej, čym u Biełarusi. Ale praz suśvietnuju ekspansiju kitajskich aŭtavytvorcaŭ bałans pačaŭ źmianiacca.
Kitajskija marki zavajoŭvajuć rynak Jeŭropy
U Biełarusi kitajskija aŭtamabili ŭžo paśpieli stać paŭsiadzionnaściu. Mocnym šturškom dla rostu ich papularnaści stała toje, što z Rasii syšli suśvietnyja aŭtavytvorcy paśla raźviazvańnia joj poŭnamaštabnaj vajny va Ukrainie, a na Rasiju i paźniej na Biełaruś byli nakładzienyja šmatlikija sankcyi, častka ź jakich tyčycca akurat aŭtamabilaŭ.
Užo pa vynikach 2025 hoda (z ulikam Belgee) kala 70% prodažaŭ novych aŭto ŭ Biełarusi prychodziłasia na kitajskija marki.
I kali ŭ vypadku ź Biełaruśsiu luboŭ da kitajskich mašyn šmat u čym abumoŭlena adsutnaściu alternatyŭ, bo ŭ sałonach źnikli papularnyja raniej VW, Renault, Hyundai dy inšyja suśvietnyja marki aŭto rasijskaj zborki, to ŭ Jeŭropie situacyja zusim inšaja.
Pry hetym užo letam 2026 hoda dola kitajskich aŭto ŭ prodažach u Jeŭropie dasiahnuła amal 11%. A ŭ susiedniaj Polščy pa vynikach žniŭnia bolš za 15% rehistracyj novych aŭto prypała na kitajskija marki.
Myta nie pieraškoda
I heta pry ŭmovach, što kitajskija elektramabili ŭ Jeŭrasajuzie aproč standartnych 10% myta abkładajucca dadatkovymi, jakija ŭ zaležnaści ad kankretnaha vytvorcy vahajucca ad 17 da 35%. Nijakich ilhot pa PDV taksama niama.
Dla aŭto z ruchavikom unutranaha zharańnia i ŭ tym liku hibrydaŭ dziejničajuć standartnyja 10% myta plus PDV, jaki ŭ vypadku z Polščaj składaje 23%.
Praz heta kitajskaja aŭto ŭ Jeŭropie kaštujuć daražej, čym u Biełarusi. Asabliva, kali havorka idzie pra elektryčki.
Roźnica ŭ cenach šakuje
Naprykład, kampaktny elektramabil Dongfeng BOX, jaki ŭ 2025 hodzie staŭ samym papularnym elektramabilem u Biełarusi, pradajecca pa cenach ad 50 700 rubloŭ (kala 15 000 jeŭra).
U Polščy ceny na taki samy aŭtamabil pačynajucca z 99 900 złotych (kala 22 700 jeŭra). Roźnica abumoŭlena tym, što heta mienavita elektramabil i na jaho raspaŭsiudžvajecca dadatkovaje myta ES.
U vypadku ź bienzinavymi aŭto roźnica mienšaja. Tak, siedan Dongfeng Shine ŭ Biełarusi kaštuje ad 60 100 rubloŭ (kala 17 800 jeŭra), a ŭ Polščy — ad 84 900 złotych (kala 19 300 jeŭra).
Ceny na krasovier Huge u Biełarusi pačynajucca z 95 300 rubloŭ (kala 28 200 jeŭra), a ŭ Polščy taki samy aŭtamabil pradajuć ad 134 900 złotych (kala 30 700 jeŭra).
Geely Polšča VS Biełaruś
Na polski rynak dobra viadomy biełarusam Geely aficyjna pryjšoŭ tolki letam 2025 hoda i pakul pradstaŭleny ŭsiaho tryma madelami: elektryčkami Je2 i Je5 i hibrydam Starray EM-i. Ahułam z ulikam šeraha impartu (taki ŭ Polščy taksama jość) za vosiem miesiacaŭ 2026 hoda ŭ Polščy zarehistravali 1166 novych aŭto marki Geely. Heta dazvoliła Geely usiaho praz hod paśla prychodu na polski rynak zaniać 10‑ie miesca pa papularnaści siarod usich 29 kitajskich brendaŭ, jakija pradajucca ŭ Polščy.
Što da roźnicy ŭ cenach, to jana prosta šakavalnaja. Elektryčny krosovier Geely EX5 Pro biełaruskaj zborki ŭ nas kaštuje ad 73 900 rubloŭ (kala 22 000 jeŭra). U Polščy taki samy elektramabil, tolki kitajskaj zborki, Geely E5 Pro (roźnica ŭ naźvie madeli zaležyć ad rynku), kaštuje ad 169 900 złotych, što składaje kala 38 600 jeŭra.
Ale istotnaja roźnica ŭ canie na kitajskija aŭto isnuje i ŭ vypadku, kali razmova idzie pra aŭto, jakija ŭ abiedźviuch krainach pastaŭlajucca nieaficyjna.
Naprykład, patrymany elektryčny spartyŭny siedan Xiaomi SU7 u Biełarusi pradajecca pa cenach ad 110 tysiač rubloŭ (kala 32 500 jeŭra) za aŭto 2024 hoda vypusku. U Polščy ceny na takija aŭto pačynajucca z 210 tysiač złotych (kala 47 700 jeŭra).
Biełaruś — raj dla elektramabilaŭ?
Usia reč u tym, što ŭ Biełarusi vielmi spryjalnyja ŭmovy dla impartu elektramabilaŭ. Da vyčerpvańnia kvoty, jakaja dla jurydyčnych asob była vykarystana 24 lipienia, a dla fizičnych — 5 vieraśnia, elektramabili ŭ Biełaruś zajazdžali pad 0% myta.
Ale navat paśla taho, jak ustanoŭlenyja na ŭzroŭni JEAES kvoty na biazmytny ŭvoz skončylisia, impart elektryčak usio adno davoli tanny. Myta na ich składaje 15%, a kali aŭto ŭ krainu ŭvozić ilhotnik, to, adpaviedna, 7,5%. Što da PDV, to elektramabili majuć hetuju ilhotu da 1 studzienia 2029 hoda.
Tamu navat kali na nastupny hod JEAES nie vyłučyć kvoty na biazmytny ŭvoz elektrakaraŭ, ich impart nie stanie našmat daražejšym i jany ŭsio adno buduć kaštavać tańniej, čym u susiednich krainach ES, dzie, aproč pošliny ad 10 da 45%, isnuje jašče i standartny PDV.
Aproč taho, u Biełarusi kaštujuć tańniej, čym u Jeŭropie, kitajskija aŭtamabili, jakija źbirajuć u Biełarusi. I heta nie tolki Geely/Belgee, ale i Dongfeng dy niekatoryja inšyja marki.
Belgee pa-za kankurencyjaj
Tamu kali hladzieć na madelny šerah Belgee ahułam i Belgee S50 abo krasovier Ch50 u pryvatnaści, to z ulikam cany ŭ 17250 — 17450 jeŭra možna skazać, što ŭ krainach Jeŭrasajuza kankurentaŭ im amal nie isnuje.
Tańniej za ich — tolki biudžetny chetčbek Dacia Sandero. A kali razhladać krasoviery z AKPP, to samaja tannaja Dacia Duster u Polščy kaštuje 20 100 jeŭra, što na 2650 jeŭra daražej za samuju tannuju Ch50 z AKPP.
Što da aŭto zachodnich brendaŭ, to, viadoma, jany ŭ Jeŭropie kaštujuć tańniej, čym u Biełarusi. Asabliva kali brać novyja aŭto, impart jakich u našu krainu amal całkam spyniŭsia. U vyniku biełaruski aŭtapark za apošniuju piacihodku maksimalna addaliŭsia ad jeŭrapiejskaha.
Kamientary
" Sam usramsia, no nie sdamsia." (s)
Ich u łatarei razyhryvajuć. Na darohach amal nie traplajucca.
Spres BMV, Aŭdzi i Volva.
Varšaŭskija dylery kažuć, što Tajota i Škoda pa-raniejšamu biezumoŭnyja lidary, jak pieršaja pakupka pryvatnikami, hetak i dla karparatyŭnaha siektara.
U topie jość tolki adzin kitajec - heta krasovier siamiejny. mabyć mienavita praz maksimum aŭto za minimalny košt.