Nietańjachu na Hienasamblei nazvaŭ pryznańnie Paleściny «haniebnym» i niepasredna źviarnuŭsia da CHAMAS
Źjaŭleńnie premjer-ministra Izraila Bińjamina Nietańjachu na trybunie Hienasamblei AAN u piatnicu vyklikała buru emocyj: ad śvistu da apładysmientaŭ. Pierad tym, jak jon pačaŭ svaju pramovu, dziasiatki aficyjnych pradstaŭnikoŭ i dypłamataŭ pakinuli zału ŭ znak pratestu.
Nietańjachu pačaŭ svaju pramovu ź pieraliku ŭdzielnikaŭ tak zvanaj iranskaj vosi supracivu, jakoj Izrail nanios surjoznuju škodu za minuły hod — z momantu jaho minułaha vystupleńnia pierad Hienasamblejaj, piša Bi-bi-si.
«Heta voś ujaŭlała pahrozu miru va ŭsim śviecie, stabilnaści našaha rehijona i samomu isnavańniu majoj krainy, Izraila», — zajaviŭ Nietańjachu.
Jon raspavioŭ, jak za apošni hod Izrail nanios udar pa jemienskich chusitach, źniščyŭ «asnoŭnuju častku terarystyčnaj mašyny CHAMAS» i «nanios surjoznuju škodu «Chiezbale» ŭ Livanie.
«Ale samaje hałoŭnaje […] — my razburali iranskuju prahramu stvareńnia jadziernaj zbroi i balistyčnych rakiet», — dadaŭ izrailski premjer.
Vystupleńnie Nietańjachu ŭ AAN tranślavałasia praz hučnahavarycieli, ustanoŭlenyja izrailskimi vajskoŭcami na miažy z Hazaj. I izrailski premjer źviarnuŭsia niepasredna da zakładnikaŭ:
«My vas nie zabyli», — skazaŭ Nietańjachu i paabiacaŭ, što Izrail nie supakoicca, «pakul nie viernie vas usich dadomu». Jon začytaŭ imiony 20 čałaviek, jakija, jak miarkujecca, usio jašče žyvyja.
Paśla hetaha jon taksama niepasredna źviarnuŭsia da CHAMAS:
«Składzicie zbroju, adpuścicie moj narod i vyzvalicie zakładnikaŭ, — skazaŭ Nietańjachu astatnim lidaram CHAMAS. — Kali vy heta zrobicie, to zastanieciesia žyvymi. Kali nie — Izrail budzie vas pieraśledavać».
Paśla hetych pramych zvarotaŭ da zakładnikaŭ i tych, chto ich zachapiŭ, premjer-ministr Izraila źviarnuŭsia da prysutnych.
Jon abvinavaciŭ zachodnija krainy ŭ tym, što padtrymka, jakuju Izrail adčuvaŭ ź ich boku paśla napadu 7 kastryčnika, ciapier źnikła, chacia, jak śćviardžaje Nietańjachu, mety Izraila zastalisia raniejšymi — viarnuć zakładnikaŭ i ŭpeŭnicca, što nivodzin izrailcianin bolš nie budzie žorstka zabity abo zachopleny ŭ pałon.
Na minułym tydni niezaležnaja mižnarodnaja kamisija pa rasśledavańni na akupavanaj paleścinskaj terytoryi (stvorana Savietam pa pravach čałavieka AAN) pryjšła da vysnovy, što Izrail učyniŭ hienacyd u Hazie, i što vysokapastaŭlenyja izrailskija čynoŭniki, uklučajučy Nietańjachu, padbuchtorvali da hetych dziejańniaŭ.
Vystupajučy ŭ Hienasamblei AAN, premjer Izraila adkinuŭ abvinavačańni ŭ hienacydzie i ŭ tym, što Izrail naŭmysna atakuje mirnych žycharoŭ u siektary Haza.
«Usio naadvarot, — zajaviŭ jon. — Izrail raspaŭsiudžvaje miljony ulotak i adpraŭlaje miljony tekstavych paviedamleńniaŭ, kab prymusić mirnych žycharoŭ pakinuć Hazu».
Tym časam, pavodle jaho słoŭ, «CHAMAS chavajecca ŭ miačetach, škołach, balnicach, žyłych damach», kab prymusić mirnych žycharoŭ «zastavacca ŭ niebiaśpiecy, časta pahražajučy im zbrojaj».
«Ci stała b kraina, jakaja čynić hienacyd, malić nasielnictva pakinuć niebiaśpiečnyja rajony Hazy? Niaŭžo nacysty prasili jaŭrejaŭ syści?» — skazaŭ Nietańjachu.
Kamientujučy temu hoładu ŭ siektary Haza, premjer-ministr Izraila zajaviŭ, što mirnym paleścincam nie chapaje ježy, tamu što «jaje kradzie, chavaje i pradaje» CHAMAS.
U žniŭni mižnarodnaja arhanizacyja IPC — abjadnoŭvaje ahienctvy AAN, humanitarnyja arhanizacyi i ŭrady šerahu krain — zajaŭlała, što ŭ horadzie Haza aficyjna paćvierdžana najaŭnaść hoładu. U dakładzie arhanizacyi havaryłasia, što hoład u stalicy siektara stvorany štučna.
U zaklučeńnie Nietańjachu prakamientavaŭ rašeńnie šerahu krain, jakija niadaŭna pryznali dziaržavu Paleścina. Na hetym tydni heta zrabili Francyja, Vialikabrytanija, Aŭstralija, Kanada, Partuhalija i Bielhija.
«Heta poŭnaje varjactva, i my nikoli hetaha nie zrobim», — zajaŭlaje premjer-ministr Izraila, majučy na ŭvazie, što jaho kraina nikoli nie pahodzicca na ŭtvareńnie susiedniaj dziaržavy, što, pavodle jaho słoŭ, było b samahubstvam dla Izraila.
Ultymatum Trampa
Premjer-ministr Izraila vystupaŭ u piatnicu pierad Hienasamblejaj AAN nie tolki na fonie mocnaha cisku na jaho z boku bolšaści krain śvietu, ale i na fonie niečakanaha ultymatumu z boku svajho hałoŭnaha i viernaha sajuźnika — Donalda Trampa.
«Ja nie dazvolu Izrailu anieksavać Zachodni Bierah, — zajaviŭ napiaredadni Tramp žurnalistam u Biełym domie. — Nie, ja hetaha nie dapušču. Heta nie adbudziecca».
Prezident ZŠA prapanuje čarhovy płan pa ŭrehulavańni, jaki ŭklučaje punkt ab poŭnym razzbrajeńni CHAMAS.
Adnak paśla dvuch hadoŭ nie nadta ŭražalnych vynikaŭ pieramovaŭ z CHAMAS, jaki nie tolki nie viarnuŭ usich zakładnikaŭ, ale i nazyvaje pryznańnie paleścinskaj dziaržavy cełym šeraham krain Zachadu pramym vynikam svaich dziejańniaŭ 7 kastryčnika, u Izraili skieptyčna staviacca da lubych novych mirnych płanaŭ.
Sam Nietańjachu vystupaje rezka suprać stvareńnia paleścinskaj dziaržavy, nazyvajučy heta pahrozaj biaśpiecy Izraila. A jaho krajnie pravyja sajuźniki pa kaalicyi vystupajuć za anieksiju Zachodniaha Bieraha raki Iardan, kab pakłaści kaniec lubym realnym pierśpiektyvam niezaležnaj Palestyny.
Sam izrailski premjer dahetul havaryŭ tolki pra mahčymaść pašyreńnia jaŭrejskich pasialeńniaŭ na Zachodnim bierazie, razmova pra poŭnuju anieksiju — prynamsi, u ramkach aficyjnaj paviestki — pakul nie išła.
Tamu zajava Donalda Trampa prahučała niečakana nie tolki dla Nietańjachu, ale i ŭvohule dla ŭsich. Viadoma, što napiaredadni, u čaćvier, pamiž lidarami ZŠA i Izraila adbyŭsia telefonny zvanok, i, mahčyma, pytańnie anieksii taksama zhadvałasia, ale dakładna heta nieviadoma.
Foty z Maskvy dajuć pabačyć Pucina i Łukašenku biez hrymu11
Kamientary