USU ŭzmacniajuć cisk na Krym, situacyja stała składanaju dla rasijskaj armii

Palavańnie na ciahniki i źniščeńnie mastoŭ

Pramy ŭdar ukrainskaha bieśpiłotnika pa chutkim pasažyrskim ciahniku № 68 Maskva — Simfieropal adbyŭsia 7 červienia 2026 hoda. Dronam byŭ paškodžany ciepłavoz, u vyniku čaho zahinuŭ pamočnik mašynista, a sam mašynist atrymaŭ ranieńni. Paśla hetaha incydentu płanavy ruch pasažyrskich sastavaŭ na paŭvostravie byŭ časova prypynieny. Kreml adreahavaŭ na ataku zajavaj, što padobnyja dziejańni «istotna ŭskładniajuć» sproby mirnych pieramoŭ.

U toj ža dzień ukrainskija siły atakavali aŭtamabilny most praz Čanharski praliŭ, jaki złučaje Krym z Chiersonskaj vobłaściu.

Rasijskim uładam pryjšłosia puścić uvieś patok mašyn u abjezd praz Armiansk.

Kambinacyja hetych udaraŭ pryviała da rezkaha paharšeńnia i biez taho vostraha paliŭnaha kryzisu — na paŭvostravie byŭ całkam prypynieny svabodny prodaž bienzinu.

Paralič Čarnamorskaha fłotu i marskija «paromy»

Dla transpartnaj błakady Ukraina mietadyčna źniščaje mahčymaść zabieśpiačeńnia Kryma z mora. Paśla taho jak Rasija straciła mahčymaść biaśpiečnaha vykarystańnia akvatoryi, jaje vialikija desantnyja karabli pieratvarylisia ŭ zvyčajnyja marskija paromy dla pieravozki vajskovych hruzaŭ.

Dziakujučy paśpiachovym atakam marskich biezekipažnych kataraŭ i rakiet, USU patapili VDK «Sarataŭ», «Novačarkask» i «Cezar Kunikaŭ», a taksama surjozna paškodzili «Minsk», «Aleniahorski harniak», «Jamał» i «Mikałaj Filčankaŭ». Heta prymusiła Čarnamorski fłot RF evakujavać asnoŭnyja bajavyja karabli z krymskich portaŭ u Novarasijsk.

Pad udary traplaje i suchahruzny fłot: tolki ŭ červieni byli atakavanyja sudny ŭ partach Biardzianska i Maryupala.

Nieba nad Krymam 

Važnaj umovaj dla praviadzieńnia dalokich atak źjaŭlajecca płanamiernaje źniščeńnie rasijskaj supraćpavietranaj abarony na paŭvostravie, bo mienavita jana pieraškadžaje šyrokamu prymianieńniu bieśpiłotnikaŭ.

Pavodle acenak ukrainskaha boku, za zimu i pačatak viasny Rasija straciła kala 80 srodkaŭ SPA, značnaja častka jakich raźmiaščałasia mienavita ŭ Krymie. 

Bujny rasijski pravajenny telehram-kanał «Vojennyj ośviedomitiel» tady pisaŭ, što rasijskaja supraćpavietranaja abarona na paŭvostravie moža kałapsavać užo na praciahu 2026 hoda, albo pačnie «vyciahvać» srodki SPA ź inšych rehijonaŭ.

Dla naniasieńnia ŭdaraŭ Ukraina aktyŭna vykarystoŭvaje bieśpiłotniki kłasa middle strike z dalokaściu kala 200 kiłamietraŭ. Jany kirujucca praz spadarožnikavuju suviaź Starlink u režymie anłajn, što robić ich niaŭraźlivymi dla rasijskich sistem REB i dazvalaje apierataram abychodzić pazicyi SPA pa składanych trajektoryjach.

Čyhunačnaja ŭraźlivaść i faktar Džankoja

Rasijskaja vajskovaja łahistyka tradycyjna i krytyčna pryviazanaja da čyhunki, pakolki zamianić ciažkija tavarnyja sastavy aŭtatranspartam niemahčyma. Adnak čyhunačnyja šlachi majuć vialiki chib — vysokaju ŭraźlivaść. Spynieńnie navat adnaho ciahnika całkam łamaje hrafik ruchu na cełym kirunku, a ramontnyja pracy patrabujuć šmat času.

Pavialičyć

Krym źviazany z macierykom čyhunkaj tolki ŭ dźviuch kropkach: praz Krymski most i praz suchaputny pierašyjek (apošni amal nie vykarystoŭvajecca z-za blizkaści da frontu).

Budaŭnictva novaj čyhunačnaj mahistrali ad Rastova-na-Donie praz Maryupal da Džankoja jašče nie zavieršana, i jana ŭžo traplaje pad ukrainskija drony.

Samym słabym miescam hetaj sistemy źjaŭlajecca vuzłavaja stancyja Džankoj, dzie sychodziacca ŭsie haliny, jakija zabiaśpiečvajuć centralnuju i zachodniuju častki Kryma. Sistemnyja ataki pa hetym vuźle zdolnyja całkam paralizavać abaronu rehijona.

Ci ŭdasca adrezać Krym?

Rasijskija vajskovyja karespandenty vielmi tryvožna aceńvajuć taktyku USU pa źniščeńni infrastruktury na pierašyjkach. 

«Uvohule, zdaryłasia toje, što mnohija ŭciahnutyja ŭ praces ludzi i tak razumieli. Praciŭnik paśladoŭna realizuje płan pa transpartnaj izalacyi Kryma», — piša z-vajenkar Žyvaŭ.

Rasijskija błohiery ličać, što Kijeŭ naŭmysna zamykaje ŭsie transpartnyja patoki vyklučna na Kierčanski most, kab paśla nanieści pa im adzin vyrašalny ŭdar.

Kanał «Dva majora» paćviardžaje maštab prablemy:

«Heta surjozna ŭskładniaje jak vajskovuju, tak i hramadzianskuju łahistyku: uźnikajuć pieraboi z zabieśpiačeńniem, prablemy z palivam, u Krymie situacyja ź im vielmi ciažkaja, niahledziačy na namahańni rehijona».

U toj ža čas kiraŭnik analityčnaj arhanizacyi Conflict Intelligence Team Rusłan Levijeŭ miarkuje, što pakul rana kazać pra poŭny ahniavy kantrol nad trasami, pakolki jany znachodziacca na adlehłaści bolš za 100 km ad pieradavoj, i dla ich poŭnaha pierakryćcia patrebna anamalna vialikaja kolkaść bieśpiłotnikaŭ.

Na jaho dumku, udary stvarajuć «surjoznuju prablemu dla rasijskich uzbrojenych sił, ale nie krytyčnuju».

Tym nie mienš, ahulny charaktar uździejańnia na Krym zastajecca kompleksnym.

Siły abarony Ukrainy zmušajuć rasijskaje kamandavańnie raspylać resursy, adnačasova łatać dzirki ŭ abaronie naftaschoviščaŭ, partoŭ, aeradromaŭ, a ciapier jašče i terminova šukać srodki dla abarony ruchomaha čyhunačnaha sastavu.

• 25
• 0
• 0
• 0
• 0
• 0
• 0
• 0