Čyrvonaja darožka, šykoŭnyja stroi, doždž i biaspłatny machita. Jak prajšoŭ vypuskny ŭ Licei BDU FOTY
Vypuskniki pačali źbiracca tut za niekalki hadzin da pačatku samoha śviata. Sioleta tut uručali atestaty 263 liceistam. Amal pałova ź ich atrymaje svaje zasłužanyja załatyja i siarebranyja miedali.
Jašče krychu pra ŭzrovień viedaŭ vučniaŭ u ličbach: 58 ź ich nabrali pa 100 bałaŭ na CE pa roznych pradmietach, a siem čałaviek paŭtaryli hety fantastyčny vynik dvojčy, piša Onliner.by.
Na ŭvachodzie ŭ licej usich haściej sustrakaje efiektny čyrvony chodnik. Praŭda, doždž maje svaje płany na hety viečar, tamu asnoŭnaje mierapryjemstva razhortvajecca ŭ chole. Vypuskniki pačali źbiracca tut za niekalki hadzin da pačatku samoha śviata.
Uvieś dekor vykanany ŭ łavandava-bežavych tanach. Jarka-bezavaha koleru i mantyi, u jakich vypuskniki z honaram fatahrafujucca.
Fotazon niekalki, ale da ich usio roŭna vyciahvajecca čarha: usie chočuć zrabić jak maha bolš zdymkaŭ na pamiać.
Haściej častujuć biezałkaholnym machita — ideja pryžyłasia jašče ź minułaha hoda, a taksama kavaj i harbataj. Ale na napoi vypusknikam jašče treba znajści chvilinku. Chtości repietuje vals, a chtości paŭtaraje tekst svajoj pramovy. Plus treba vyłučyć čas, kab razhledzieć usich novych adnakłaśnikaŭ — na kamplimienty adzin adnamu siabry siońnia nie skupiacca.
Adno z hałoŭnych pytańniaŭ, a kudy dalej? Pieravažnaja bolšaść, viadoma ž, nazyvaje BDU, vyklučeńnie — tolki tyja, chto źbirajecca ŭ miedycynskija VNU.
«300 bałaŭ u zapasie niadrenna padymajuć nastroj»
Zdajecca, Paša moža pretendavać na zvańnie samaha vysokaha vypusknika ŭ licei. Ale heta nie adziny «tytuł» — siońnia jon pavinien atrymać załaty miedal.
— Hety dzień my čakali dva hady, ale dahetul niama adčuvańnia, što jon užo nastaŭ, — strymana dzielicca emocyjami chłopiec.
A voś jaho baćki vyhladajuć značna bolš uzrušanymi:
— Jość pačućcio honaru za našaha syna, jaki ŭparta išoŭ da takoha vyniku. Dzieści my dapamahali, ale tym nie mienš jon sam dasiahaŭ svaich metaŭ.
Darečy, pra mety: Paša płanuje pastupać na fakultet prykładnoj matematyki i infarmatyki.
Taisija, Jana i Kira bačać siabie budučymi ekanamistkami, a pakul — školnicami, u režymie zaviaršeńnia zahruzki na 99,9%.
— Kali ščyra, pakul ničoha nie zrazumieła, usie kudyści biehajuć, fatahrafujucca. Dumaju, raźbiaremsia ŭ svaich pačućciach bližej da aficyjnaj častki. Pakul u pradčuvańni, — adznačaje Kira.
— Tak, zusim nie chvalujuča, bo chaciełasia chutčej dačakać hetaha dnia, ubačyć usich takimi pryhožymi, prybranymi i narešcie adśviatkavać naš vypuskny, — dadaje Jana.
Bačna, što dziaŭčaty pradumvali svaje vobrazy da najmienšych detalaŭ.
— Ja pačała samaja pieršaja šukać sukienku. Vybrała jaje jašče vosieńniu. Potym kožny miesiac dadavała da vobrazu štości jašče — sumačku, upryhožańni. Ale častka zadač, viadoma, usio roŭna zastałasia na apošni momant, — uśmichajecca Taisija.
A voś Kira spraviłasia z zadačaj chutka — vybrała pieršuju ž sukienku, jakuju prymierała.
Darečy, siabroŭki zmahli padabrać ubory ŭ adnoj i toj ža kramie. I da samoha śviata nikomu ich nie pakazvali — tolki adna adnoj.
Znoŭ vyrašajem padtrymać u hety chvalujučy momant baćkoŭ i znajomimsia ź Julijaj i jaje mamaj Vieraj.
— Tut takaja niejmaviernaja pryhažość! Emocyi prosta zaškalvajuć. Chočacca ŭsio razhledzieć, z usimi pavitacca. Vielmi padabajecca śviatočnaja atmaśfiera. Usie takija pryhožyja! — emacyjna apisvaje asablivy dla siabie dzień Jula.
— A ja, jak mama, naturalna, adčuvaju chvalavańnie. Jość adčuvańnie zaviaršeńnia važnaha etapu i pačatku čahości zusim novaha. U mianie taki trapiatki nastroj. Naš tata navat padrychtavaŭ nasoŭki na ŭsialaki vypadak.
Ale chvalavańnie — nie adzinaje pačućcio, jakoje buduć adčuvać Juliny baćki. Da emacyjnaha kaktejlu dakładna dadasca honar: vypusknica zdała dva ekzamieny na 100 bałaŭ i plus siaredni bał atestata — 10,0. 300 bałaŭ u zapasie niadrenna padymajuć nastroj. Z fakultetam i śpiecyjalnaściu dziaŭčyna pakul nie vyznačyłasia, ale taksama razvažaje pra ekanomiku.
Pakul pra surjoznyja rečy možna z pavažnaj pryčyny zabycca chacia b na sutki, raspytvajem vypusknicu pra jaje vobraz:
— Mnie zdajecca, u mianie situacyja niezvyčajnaja, bo taja samaja sukienka była znojdziena ź pieršaha razu. Potym byŭ pryjemny kłopat — zapis na makijaž i pryčosku. Siońnia ja adčuła vielmi pryjemnaje pačućcio padčas zboraŭ, kali hladzieła na svaju sukienku. Dumaju, dziaŭčaty zrazumiejuć, — razvažaje Jula.
— Mnie zdajecca, heta toj samy momant, kali možna adčuć siabie pryncesaj, — dadaje Viera.
«Zdajecca, što vypuskny — heta moj son»
Naša nastupnaja novaja znajomaja — taksama Viera, pieršym ža spravaj raspaviadaje, što abahaŭlaje fiziku. Paćviardžeńnie hetamu — udzieł u profilnaj alimpijadzie. I — spojler — žadańnie pastupać na fizičny fakultet (z zapasnych varyjantaŭ — fakultet prykładnoj matematyki i infarmatyki).
— Ja vielmi chvalavałasia, kali źbirałasia. Pieražyvała, što niešta pojdzie nie tak, razvalicca sukienka abo paciače makijaž. Ja farbavałasia kala čatyroch hadzin! I vielmi cikava pahladzieć, jak buduć vyhladać maje adnakłaśniki.
— Nasamreč, sumna raźvitvacca ź licejem. Heta miesca stała dla mianie domam. Tamu ciapier nakryła mocnaja chvala emocyj.
— Šukała sukienku ja vielmi doŭha. Spačatku chacieła tolki bardovuju. Ale kali ŭbačyła hetuju, jana nahadała mnie vobraz viasny, nimfy. I ja ź pieršaj siekundy ŭ jaje zakachałasia. Skazała mamie: chaču tolki jaje!
Nastupnaja surazmoŭnica — Maryja — taksama vielmi ŭschvalavanaja. Darečy, u budučyni dziaŭčyna płanuje stać psichołaham i dapamahać inšym spraŭlacca z chvalavańniem.
— Mnie zdajecca, što ja splu. My tolki što byli naviersie i fatahrafavalisia ŭ mantyjach, i ŭ mianie było vyraznaje adčuvańnie, što vypuskny ja baču ŭ śnie. Napeŭna, ja da kanca nie ŭśviedamlaju, što ŭžo vypuskajusia i heta adbyvajecca prosta ciapier.
Maryja pryznajecca: vynikami ekzamienaŭ vielmi zadavolenaja, moža narešcie vydychnuć, tamu na śviacie hatovaja pa-sapraŭdnamu adpačyć.
— Vobraz ja padabrała amal vypadkova. Znajšła ŭ Pinterest adnu madel, krychu źmianiła koler, a ŭ pracesie pašyvu źmianiłasia i sama madel. Plus ja vyrašyła dadać jarkija akcenty. U mianie byli zavušnicy-kvietački, a jašče ja znajšła branzalet, jaki idealna ź imi spałučajecca. Na heta pajšoŭ ceły miesiac, — uśmichajecca vypusknica.
Dva kolery-favaryty hetaha hoda — ružovy i błakitny. I my schilnyja z hetym pahadzicca: sukienak dalikatnych adcieńniaŭ sapraŭdy šmat.
I znoŭ pierad nami cudoŭnaje trya: Daryna, Jeva-Maryja i Jana.
— Adčuvajem siabie vielmi ščaślivymi. Navat doždž nam ničoha nie sapsavaŭ, — kažuć dziaŭčaty.
Jak i ŭsie astatnija, našy surazmoŭnicy adznačajuć, što ekzamieny prajšli vydatna. Naprykład, Jeva nabrała 100 pa ruskaj movie i 99 pa anhlijskaj (choć z hetaj nahody dahetul krychu sumuje). Dziaŭčyna płanuje pastupać na fakultet mižnarodnych adnosin na ŭschodaznaŭstva. A Daryna i Jania abiedźvie źbirajucca ŭ miedycynu.
— Heta sukienka 20 rubloŭ kaštavała. Mnie jaje siastra pryviezła, znajšła sa źnižkami niedzie. A ja ŭžo dadała aksesuary potym, — raskazvaje Jania.
A voś Jeva natchniłasia vobrazam pryncesy Nastaśsi z adnajmiennaha multfilma — adrazu viedała, što jaje sukienka budzie ciomna-siniaj.
Paśpiavajem abmierkavać i stereatyp pra toje, što moładź nie nosić abcasaŭ. Siońnia na tankietcy tolki Jana.
— U nas nizki abcas. My nie vielmi vitajem pakuty. Vyšej za 8 santymietraŭ nie nosim, — adznačaje Daryna.
— Ja na apošni zvanok abuła vysokija, niekalki razoŭ upała, tamu bolš takich pamyłak nie paŭtaraju, — žartuje Jeva.
Znajomimsia i z našymi budučymi kalehami — Alaksiej i Luboŭ płanujuć pastupać na fakultet žurnalistyki. Jak možacie zdahadacca, ekzamieny ŭ našych surazmoŭcaŭ taksama prajšli vydatna. Naprykład, u Luby — 100 bałaŭ pa ruskaj movie, u Lošy — 93 pa hieahrafii.
— Niama sumnaha nastroju i adčuvańnia: jak ža tak, usio zakančvajecca. Tamu što ŭsio nastolki śviatočna, uračysta i pryjemna, što chočacca tolki radavacca i atrymlivać pazityŭnyja emocyi, — adznačaje Luba.
— Usio pryhoža, smačna, atmaśfierna, — dadaje Loša.
Śviatočnuju atmaśfieru stvarajuć i vobrazy samich našych hierojaŭ.
— Sukienku ja vybrała jašče ŭ studzieni. Ničoha nie mahła znajści ŭ kramach dla śviataŭ. Ale heta sukienka mnie vielmi spadabałasia. Ja zabrała apošniuju. Choć jana i była nie majho pamieru, ja padhaniała jaje pad siabie. Bo ŭbačyła i ŭžo nie zmahła hladzieć ni na što inšaje.
U Alaksieja z vybaram było krychu praściej — koler kaściuma jon padbiraŭ pad stroj svajoj damy. Kaścium taksama vybirali razam.
Padtrymać nastupnaha surazmoŭcu — Alaksieja — sabrałasia cełaja delehacyja. Akazałasia, što jaho baćki — taksama vypuskniki liceja — 1998 i 1999 hadoŭ, a mama jašče i pracuje tut nastaŭnicaj. Tamu, pa ŭłasnym pryznańni, jana adčuła cełuju chvalu emocyj.
A voś Loša adroźnivajecca vytrymanaściu: i pra samo mierapryjemstva, i pra ekzamieny adklikajecca maksimalna spakojna: «Usio spakojna». Taki charaktar dakładna spatrebicca jamu ŭ budučaj prafiesii: małady čałaviek płanuje źviazać žyćcio z prykładnoj matematykaj.
Adzinaje, što prymusiła jaho choć krychu paniervavacca, — heta vybar kaściuma. Jon chacieŭ pryjści ŭ bolš rassłablenym styli, ale ŭ chodzie «pieramoŭ» na siamiejnaj radzie ŭsio ž pryjšli da rašeńnia — vybrać kłasiku.
«Sukienka — mamina, jašče z časoŭ studenctva»
Vobraz Maryi mocna vyłučajecca na fonie pyšnych viačernich sukienak. Pobač mama, i ŭsio stanovicca na svaje miescy: ich styl niaŭłoŭna padobny.
— Adčuvańni niezvyčajnyja. Dziŭna, ale kulminacyjaj pa emocyjach stali zbory. Tak pieražyvaješ: jak usio padrychtavać, pryhoža vyhladać, a raptam niejkaja detal budzie vybivacca. A siudy prychodziš i ŭžo vydychaješ. Usie svaje. I, viadoma, cikava pahladzieć, chto jak apranuŭsia — i na dziaŭčat, i chłopcy taksama sapraŭdnyja pryhažuny.
— Mnie vielmi spadabałasia žyvaja muzyka na ŭvachodzie. Nas usich sustrakaŭ saksafon. A hetyja šary! Usio vyhladaje tak dušeŭna, ale pry hetym pradumana, prafiesijna.
Što datyčycca stroju, to ŭ Mašy było šmat varyjantaŭ na vybar. U hetym kaściumie jaje pryvabiła nie stolki sukienka, kolki žakiet. A jašče adsyłka da ispanskich matyvaŭ — atrymałasia vielmi jarka.
Kali pryhledziecca, na sukiency Maryi možna zaŭvažyć kvietki. I zdajecca, heta zusim nie vypadkovaść. U płanach u dziaŭčyny — pastupleńnie na bijafak, asabliva jaje cikavić bijainžynieryja.
Jašče adna vypusknica pa imieni Maša padčas fotasiesii z baćkami.
— Ja płaču, a muž śmiajecca, — adrazu ž adhukajecca jaje mama.
— Ničoha takoha nie adbyłosia. Usio ŭ pracoŭnym paradku: raściom, stalejem, zakančvajem škołu, pastupajem dalej, — surjozna razvažaje tata.
Darečy, Maryja taksama źbirajecca padavać dakumienty na bijafak.
Ad surjoznaha — da dziavočaha.
— Šukali doŭha. Vielmi doŭha! Prykładna za dva miesiacy pačali chvalavacca, bo ŭsie ŭžo kupili. Jeździli pa kramach razoŭ dziesiać, prymiarali roznyja varyjanty. Ale dačka ŭ vyniku prydumała vobraz sama, kab jon byŭ doŭhi, z harsetam, tufli abaviazkova na abcasie. Pa makijaž źviarnulisia da toj samaj vizažystki, u jakoj rabili jaho na vypuskny ŭ 9‑m kłasie. Zapisvalisia značna zahadzia, bo «akiency» raźlatalisia vielmi chutka.
Chočacca padyści da kožnaha vypusknika (a zaadno i vykazać svajo zachapleńnie), ale davodzicca siabie strymlivać. Naprykancy źviartajemsia da mamy z dačkoj, čyje vobrazy razam nahadvajuć zbałansavany iń-jan. Znajomciesia: Alena i Kira.
— Hety dzień nastaŭ! Ura! My vielmi radujemsia, — śmiajecca Alena.
11‑y kłas tradycyjna vydaŭsia napružanym. Siaredni bał atestata ŭ Kiry — 9,9. Usiaho adna dziaviatka.
Tamu niadziŭna, što siły pajšli na padrychtoŭku da ekzamienaŭ, tamu pytańnie z uboram vyrašali ŭ apošni tydzień. I znajšli niezvyčajny vychad: na Kiry — sukienka jašče z časoŭ maminaha studenctva. Da hetaha ni razu nie nadzietaja — šmat hadoŭ čakała svajho zornaha času. I dačakałasia.
Daviedvajemsia, kudy płanuje pastupać vypusknica? Vučanica fiłałahičnaha kłasa źbirajecca i dalej pahłyblena vyvučać movy.
Bližej da 20:30 choł apuścieje — pačynajecca hałoŭnaja častka viečara. Taja samaja, kranalnaja, z vostraj nieabchodnaściu mieć pad rukoj niekalki dziažurnych nasovak. Ale za hetym asabistym momantam my ŭžo padhladvać nie budziem. Prosta pažadajem zdalok: niachaj usio ździejśnicca.
-
Zamiest piensii — kałonija. 72‑hadovaha biełaruskamoŭnaha ajcišnika asudzili pa ciažkich palityčnych artykułach
-
Maładuju biełarusku pratrymali ŭ rasijskim SIZA amal 4 hady i apraŭdali. A kampiensacyju dali takuju, nibyta ŭ tvar plunuli
-
«Pastupajuć pahrozy prosta na miescy». Student EHU pra pieratrusy i parady dla tych, chto ŭ Biełarusi
Ciapier čytajuć
Maładuju biełarusku pratrymali ŭ rasijskim SIZA amal 4 hady i apraŭdali. A kampiensacyju dali takuju, nibyta ŭ tvar plunuli5
Kamientary