Za «zakliki da naniasieńnia škody Biełarusi» asudzili maładoha supracoŭnika «Pielenha»
Stała viadoma pra jašče adnaho supracoŭnika pradpryjemstva «Pielenh», jakoha asudzili pa palityčnym artykule. Arciom Siamionaŭ pracavaŭ u Biuro mytna-licenzijnaha zabieśpiačeńnia i ekspartnaha kantrolu. Jamu mahło pahražać da 12 hadoŭ kałonii.
Arciomu Siamionavu 34 hady. Jon skončyŭ Biełaruski dziaržaŭny ŭniviersitet u 2007 hodzie.
Doŭhi čas Arciom pracavaŭ na aptyčnym pradpryjemstvie «Śfiera», jakoje ŭvachodzić u Biełaruskaje optamiechaničnaje abjadnańnie i stvaraje aptyčnyja elemienty — linzy, pryzmy, sietki i hetaj dalej. «Śfieraj» vałodaje AAT «Pielenh» — u pradpryjemstvaŭ navat ahulny śpis supracoŭnikaŭ va ŭnutranych resursach.
Arciom byŭ juryskonsultam u Biuro mytna-licenzijnaha zabieśpiačeńnia i ekspartnaha kantrolu. Jon pracavaŭ tam prynamsi da leta 2024 hoda. Nieviadoma, kali Siamionaŭ byŭ aryštavany, ale apošni raz jon byŭ anłajn u sacsietkach u listapadzie 2024-ha.
Prysud i toje, u čym kankretna jaho abvinavačvali, — nieviadomyja, ale pahražała chłopcu da 12 hadoŭ kałonii. Arcioma Siamionava asudzili pa abvinavačańni ŭ «dziejańniach, nakiravanych na pryčynieńnia škody Biełarusi» i ŭnieśli ŭ śpis «terarystaŭ», jaki stvaraje KDB.
Abłava KDB na supracoŭnikaŭ «Pielenha» i inšych abarončych pradpryjemstvaŭ pad jaho kryłom pačałasia ŭletku 2024 hoda i praciahvałasia niekalki miesiacaŭ. Jana źviazanaja sa źlivam dakumientaŭ pradpryjemstva, jakija datyčylisia abychodu sankcyjaŭ. Byli apytanyja amal usie supracoŭniki, zvolnienyja dziasiatki ludziej, jak minimum šeść supracoŭnikaŭ byli asudžanyja pa palityčnych artykułach — za ŭdzieł u pratestach i «zakliki da pryčynieńnia škody Biełarusi».
«Pielenh» — adno z klučavych pradpryjemstvaŭ biełaruskaj abarončaj pramysłovaści. Jano stvaraje pryceły dla rasijskich tankaŭ, spadarožniki i šerah inšych vyrabaŭ, važnych dla Rasii padčas vajny. Raniej pradpryjemstva pracavała i z Ukrainaj — naprykład, ukrainskaja supraćtankavaja rakietnaja ŭstanoŭka stvarałasia sumiesna z «Pielenham».
«Naša Niva» — bastyjon biełaruščyny
PADTRYMAĆ
Kamientary