Zialenski: Niahledziačy na sankcyi, Rasija praciahvaje atrymlivać zamiežnyja technałohii dla zbroi
Padčas masiravanaha ŭdaru pa Ukrainie ŭ noč na 5 kastryčnika Rasija vykarystała zvyš 100 tysiač kampanientaŭ zamiežnaj vytvorčaści ŭ svaich dronach i rakietach, zajaviŭ prezident Ukrainy Uładzimir Zialenski. Jon padkreśliŭ, što kampanii z ZŠA, Kitaja, Tajvania, Japonii, Hiermanii i inšych krain pa-raniejšamu prysutničajuć u łancužkach pastavak dla rasijskaj vajennaj pramysłovaści.
Na čaćviortym hodzie poŭnamaštabnaj vajny Rasija praciahvaje atrymlivać kampanienty dla vytvorčaści zbroi. Padčas masiravanaha kambinavanaha ŭdaru pa Ukrainie ŭ noč na 5 kastryčnika Rasija ŭžyła 549 srodkaŭ paražeńnia, jakija ŭtrymlivali 102 785 kampanientaŭ zamiežnaj vytvorčaści — kampanij z ZŠA, Kitaja i Tajvania, Vialikabrytanii, Hiermanii, Šviejcaryi, Japonii, Respubliki Kareja i Niderłandaŭ. U zapuščanych udarnych dronach było prykładna 100 688 kampanientaŭ zamiežnaj vytvorčaści, u «Iskanderach» — kala 1500, u «Kinžałach» — 192 kampanienty, i 405 — u «Kalibrach», raspavioŭ Zialenski
U pryvatnaści, kampanii ŭ Złučanych Štatach Amieryki vyrablajuć kanviertary dla rakiet Ch-101 i dronaŭ typu Shahed / Geran, matrycy dla hetych BPŁA i rakiet «Kinžał», anałahava-ličbavyja pieraŭtvaralniki dla dronaŭ i rakiet, a taksama mikraelektroniku dla rakiet.
Prynamsi 50 adzinak raznastajnaj mikraelektroniki ŭ kožnym «šachiedzie» vyrablajecca ŭ Kitai i Tajvani. Mikrakantrolery dla BPŁA vyrablajucca ŭ Šviejcaryi, a mikrakampjutary dla kantrolu palotu dronaŭ — u Vialikabrytanii.
Optaizalatary dla kryłatych rakiet vyrableny ŭ Japonii, a kamutacyjnyja razdymy — u Hiermanii.
Akramia taho, Rasija vykarystoŭvaje pracesary, vyrablenyja ŭ Niderłandach, i siervapryvady dy padšypniki, vyrablenyja ŭ Respublicy Kareja.
Pavodle słoŭ Zialenskaha, Ukraina rychtuje novyja sankcyi suprać tych, chto dapamahaje Rasii i jaje vajnie, taksama kraina pieradała prapanovy pa abmiežavańni schiem pastaŭki.
«Na hetym tydni adbudziecca sustreča sankcyjnych kaardynataraŭ «Hrupy siami» (G7), i my čakajem sistemnaha rašeńnia, kab zabiaśpiečyć efiektyŭnaść sankcyj. Važna spynić usie schiemy abychodu sankcyj, bo kožnuju takuju schiemu Rasija vykarystoŭvaje dla praciahu zabojstvaŭ. Śviet maje siłu, kab heta spynić», — skazaŭ prezident Ukrainy.
Ciapier čytajuć
U Minsku pradali karcinu maładoj mastački za 402 tysiačy jeŭra2
Kamientary
Na čyściutkaj biełaruskaj movie, jak nie ŭvažyć?