Z pałonu — pad sud. Ukrainski sałdat staŭ abvinavačanym u katavańniach svaich ža pabracimaŭ

Skandał razhareŭsia amal adrazu paśla abmienu. 17 lipienia 2024 hoda prezident Uładzimir Zialenski apublikavaŭ fota vyzvalenych bajcoŭ, zahornutych u sinie-žoŭtyja ściahi. Adnak užo na nastupny dzień adzin z byłych vajennapałonnych napisaŭ u Instagram, što adzin sa śpisu — Maksim Babyloŭ — nie tolki supracoŭničaŭ z administracyjaj rasijskaj kałonii, ale i sam udzielničaŭ u katavańniach, admaŭlaŭsia ad abmienu i ŭkrainskaha hramadzianstva.

Hetyja abvinavačvańni chutka raspaŭsiudzilisia ŭ siecivie. 18 lipienia Słužba biaśpieki Ukrainy (SBU) raspačała kryminalnuju spravu. U miedyja hučali roznyja viersii, u tym liku i takaja, što Rasija mahła naŭmysna abmianiać «zdradnika», kab spravakavać infarmacyjnuju apieracyju i pakazać, što va Ukrainie sudziać svaich ža vyzvalenych vajskoŭcaŭ.

Pavialičyć

Praz try tydni Maksima Babylova zatrymali. Z taho času jon znachodzicca pad vartaj.

Chto taki Maksim Babyloŭ?

Babyloŭ naradziŭsia ŭ 2002 hodzie ŭ Chiersonie. Jon matros i kiroŭca roty 137‑ha bataljona asobnaj bryhady marskoj piachoty VMS Ukrainy. U rasijski pałon mužčyna trapiŭ u pieršy ž dzień poŭnamaštabnaha ŭvarvańnia, 24 lutaha 2022 hoda, u Chiersonskaj vobłaści.

Pavodle danych śledstva, ź lipienia 2022‑ha pa červień 2024 hoda jaho ŭtrymlivali ŭ byłoj Kalininskaj papraŭčaj kałonii ŭ akupavanaj Horłaŭcy Danieckaj vobłaści. 

Nahladčykami tam byli žychary tak zvanaj «DNR», mnohija ź jakich mieli ŭkrainskija pašparty. Ukraina bolš čym dvum dziasiatkam supracoŭnikaŭ kałonii vystaviła abvinavačvańni ŭ ździekach z pałonnych.

Jak śćviardžajuć śviedki, Babyloŭ nie prosta byŭ łajalny da administracyi, ale i sam dałučaŭsia da źbićcia ŭkrainskich vajskoŭcaŭ, svaich byłych paplečnikaŭ.

Pavialičyć

U čym jaho abvinavačvajuć?

U abvinavačvańni fihurujuć čatyry epizody i piaciora paciarpiełych za pieryjad ź vieraśnia 2023 pa studzień 2024 hoda.

Naprykład, 19 vieraśnia 2023 hoda supracoŭniki kałonii źbili novaha pałonnaha nibyta za toje, što toj nie skazaŭ pra tatuiroŭku. Jaho zaviali ŭ prybiralniu, dzie, pa viersii śledstva, da achoŭnikaŭ pa ŭłasnaj inicyjatyvie dałučyŭsia Babyloŭ. Śćviardžajecca, što jon trymaŭ ruki paciarpiełaha, pakul tyja źbivali mužčynu nahami i mačali hałavoj va ŭnitaz.

Akramia taho, Babyloŭ, jak miarkuje śledstva, udzielničaŭ u tak zvanaj «pryjomcy» pałonnych. Padčas hetaj pracedury ludziej prymušali raspranacca, stavili da ściany ŭ «pozu łastaŭki» i biaźlitasna bili humovymi dručkami. Pavodle materyjałaŭ spravy, 30 kastryčnika 2023 hoda Babyloŭ nanios adnamu z pałonnych nie mienš za try ŭdary dručkom, a 18 studzienia 2024 hoda ŭdaryŭ inšaha nahoj u hrudzi.

Pavodle śviedčańniaŭ byłych pałonnych, jakija prachodziać paciarpiełymi pa spravie, Maksim Babyloŭ zajmaŭ pryvilejavanaje stanovišča ŭ kałonii. Jon byŭ tak zvanym «dziažurnym» u dyscyplinarnym izalatary, vykonvajučy daručeńni administracyi.

Jaho asnoŭnaj zadačaj byŭ nahlad za inšymi viaźniami. Śviedki raskazvajuć, što Babyloŭ rehularna zaziraŭ u vočki kamier, kab sačyć, ci nie parušajuć pałonnyja praviły — naprykład, ci nie siadziać na łožkach udzień. Pra ŭsie parušeńni jon nieadkładna dakładvaŭ achoŭnikam, paśla čaho tych, chto praviniŭsia, vyvodzili z kamier i žorstka źbivali.

Taksama jon «zdavaŭ» pabracimaŭ, kali tyja sprabavali razmaŭlać z novaprybyłymi padčas prahułak u turemnych dvorykach-«kletkach». Paśla adnaho z takich danosaŭ, jak śćviardžaje paciarpieły, achova mocna źbiła hrupu pałonnych, a sam Babyloŭ paśla hetaha kidaŭ u ich kavałkami cehły.

Dziakujučy svajoj łajalnaści Babyloŭ mieŭ palohki. 

Paciarpiełyja adznačajuć jahonuju asablivuju žorstkaść i pahardu da svaich. Pavodle ich pakazańniaŭ, Babyloŭ nieadnarazova zajaŭlaŭ, što nie choča viartacca va Ukrainu i što jana jamu «niepatrebnaja».

Sud i mahčymy prysud

Padčas dasudovaha śledstva było dapytana kala dvaccaci śviedkaŭ. Paciarpiełyja paćvierdzili svaje pakazańni padčas vočnych stavak z Babylovym.

Jaho abvinavačvajuć u žorstkim abychodžańni z vajennapałonnymi, učynienym hrupaj asob pa papiaredniaj zmovie (č. 2 art. 28, č. 1 art. 438 Kryminalnaha kodeksa Ukrainy). Sankcyja artykuła praduhledžvaje da 12 hadoŭ pazbaŭleńnia voli.

Na pasiadžeńni suda 7 kastryčnika 2024 hoda prakuror začytaŭ abvinavaŭčy akt, u jakim zhadvajucca šeść epizodaŭ ździekaŭ. Na pytańnie sudździ, ci pryznaje jon svaju vinu, Maksim Babyloŭ adkazaŭ: «Absalutna nie pryznaju».

• 1
• 0
• 0
• 1
• 0
• 0
• 2
• 0