Płošča Svabody ŭ Breście znoŭ pad ptušynaj abłohaj — varony, hałki i hałuby pieratvaryli ŭtulny skvier u sapraŭdnuju bazu dla adpačynku. Łaŭki, plitka i pomniki za dzień pakryvajucca pamiotam, a pach staić taki, što chočacca chutčej prajści mima, piša vydańnie «Pieršy».
Ptuški viarnulisia
Niekalki hadoŭ tamu ŭ Breście na płoščy Svabody pastavili śpiecyjalnyja pryłady dla adpužvańnia ptušak. Hetyja «pužałki» vydavali tryvožnyja huki, padobnyja da sihnałaŭ niebiaśpieki. Spačatku heta sapraŭdy dapamahała: varony i hałki, pačuŭšy sihnał, raźlatalisia. Ale chutka jany zrazumieli, što pahrozy niama, i viarnulisia na svajo zvykłaje miesca.
«Krucili zapisy — i ptuški sapraŭdy raźlatalisia. Ale prachodzić tydzień — i jany ŭžo nie reahujuć», — raskazvaje dyrektar Bresckaj ŽKH Andrej Hašaŭ.
Pavodle jaho słoŭ, abstalavańnie źniali, bo efiekt byŭ časovym.
Paśla taho jak «ptušynyja sihnały» prybrali, skvier znoŭ akazaŭsia pad abłohaj. Kamiery nazirańnia fiksujuć dziasiatki ptušynych čarod, a dvorniki skardziacca, što nie paśpiavajuć prybirać terytoryju.
«Pramyvajem plitku i łaŭki štodnia, a praz paru hadzin usio znoŭ u pamiocie», — kažuć kamunalniki.
Kamunalniki kličuć vučonych
Kab nie paŭtarać pamyłak, Bresckaje ŽKH źviarnułasia da śpiecyjalistaŭ z Paleskaha ahrarna-ekałahičnaha instytuta NAN Biełarusi. Vučonyja prapanujuć kompleksny padychod: sumiaščać huk, śviatło i ruch.
Zahadčyk łabaratoryi aptymizacyi ekasistem Viktar Dziamiančyk tłumačyć:
«Ptuški nie lubiać impulsnaje śviatło, asabliva ź infračyrvonaj padśvietkaj. Možna vykarystoŭvać drony, pavietranych źmiejaŭ, a taksama ruchomyja pudziły. U kompleksie heta daść vynik».
Vučony dadaje, što ciopłyja zimy spryjajuć mihracyi krumkačovych i hałuboŭ z paŭnočnych rehijonaŭ — ciapier jany zimujuć prosta ŭ Breście. Ježy chapaje: kantejniernyja placoŭki i ciopłyja nišy pad dachami stanoviacca dla ich idealnym prytułkam.
Videa ŭ TikTok
Historyja z varonami i hałubami vyklikała abmierkavańnie ŭ sacsietkach. Paśla demantažu «pužałak» karystalniki TikTok pačali vykładać videa z Płoščy Svabody. Na kadrach vidać, jak łaŭki ableplenyja ptuškami, a prajści pa darožkach amal niemahčyma.
«Śmiardzić žudasna, prajści nielha, a hałuby litaralna z hałavy nie źlatajuć», — pišuć karystalniki.
U kamientaryjach prapanujuć roznyja miery:
«Prybrać usie staryja drevy i pasadzić maładyja — budzie śvietła i čysta»;
«Patrucić»;
«A možna zładzić vyjaznoje sakalinaje palavańnie».
Ekśpierty ź infalinii «Zialony telefon» vykarystoŭvajuć inšyja mietady: ruchomyja pudziły, drony i biasšumnyja adpužvalniki.
Hałuby na padśvietcy
Asabliva pakutujuć žychary damoŭ na vulicy Lenina. Hałuby ablubavali śviatłodyjodnyja stužki pad dachami, dzie ciopła i ŭtulna. Navat paśla ŭstanoŭki mietaličnych šypoŭ i kalučych stužak ptuški nie pakinuli svaje «kvatery».
«Padličana, što adzin hołub štohod pakidaje na fasadach, asfalcie i pomnikach da 12 kiłahramaŭ pamiotu, jaki, jak kisłata, raźjadaje lubuju pavierchniu», — kaža žychar doma Valancin Jažełaŭ.
Na jaho dumku, najlepšaja prafiłaktyka — prosta pierastać padkormlivać ptušak.
«Samy prosty sposab pazbavicca ad hałuboŭ — nie karmić ich, tady jany sami raźlaciacca. Ale zabarony na karmleńnie hałuboŭ u nas niama».
Jak zmahajucca z ptuškami ŭ inšych krainach
U Vialikabrytanii i Hiermanii vykarystoŭvajuć jastrabaŭ i sokałaŭ dla adpužvańnia varon. U Vienie dziejničajuć patruli, jakija štrafujuć tych, chto kormić hałuboŭ. U niekatorych haradach u korm dadajuć rečyvy, što źnižajuć zdolnaść da razmnažeńnia.
A ŭ Breście žychary čakajuć ad uładaŭ užyvańnia novych technałohij i vyrašeńnia niepryjemnaj prablemy.
Kamientary