Jak stała viadoma «Našaj Nivie», Alaksandr Šakucin — kolišni favaryt Alaksandra Łukašenki, siabar junactva palityka i «biznesmien udačy» pry im ža, staŭ fihurantam kryminalnaj spravy i byŭ zatrymany ŭ pačatku tydnia.
«Alaksandra Vasiljeviča zabrali i advieźli ŭ SIZA. Dzie Šakucin ciapier, nieviadoma. Ale jak minimum z aŭtorka jon načuje nie doma. Pakul adzinaje, što možna skazać, heta što spravu viadzie Departamient finansavych rasśledavańniaŭ: padatki, viadzieńnie spravaŭ na «Amkadory», — paviedamiŭ «Našaj Nivie» surazmoŭca.
My dakładna nie viedajem ni artykuł, jaki inkryminujecca Šakucinu, ni sens abvinavačvańniaŭ.
Adnak biełaruskaja praktyka pakazvaje, što piersanažy jaho kalibru najčaściej apynajucca adrazu ŭ SIZA KDB, a nie prachodziać praz Akreścina i niejkija inšyja SIZA.
Raniej «Naša Niva» ŭžo raskazvała, što trajektoryja losu Šakucina nahadvaje situacyju ź Juryjem Čyžom.
Majučy za košt siabroŭstva z Łukašenkam prosta nierealnyja rynkavyja pieravahi kštałtu mahčymaści masavych pryvatyzacyj na bankaŭskija hrošy, ilhotnyja kredyty, śpisańni daŭhoŭ, pierakredytavańni dziaržavaj, pramocyju na rasijskim rynku i hetak dalej, što Čyž, što Šakucin tak i nie zmahli za dziesiacihodździ «łafy» stać paśpiachovymi biznesmienami. Čyž ciapier sudzicca sa svajoj siamjoj za pareštki byłoj biznes-impieryi. A Šakucin zahnaŭ «Amkador» u bankroty i zrabiŭ prablemaj dziaržavy svoj hihancki — u sotni miljonaŭ dalaraŭ — doŭh pierad kitajcami.
Čytajcie historyju padzieńnia biźniesa Šakucina: Šakucin zalacieŭ minimum na $40 miljonaŭ
U sakaviku 2025 hoda «Naša Niva» paviedamiła, što Łukašenka adabraŭ u Šakucina «Amkador», pieradaŭšy pradpryjemstva pad kantrol BiełAZa.
Čytajcie taksama: Łukašenka nacyjanalizavaŭ «Amkador». Šakucin staŭ prostym biełaruskim piensijanieram
Šakucin niekalki miesiacaŭ jašče zastavaŭsia bienieficyjaram i saŭładalnikam niekalkich zavodaŭ i dystrybjutarskaj sietki «Amkadora» ŭ Rasii, ale taksama vyjšaŭ z dolaŭ.
Čytajcie taksama: U Šakucina zabrali harotny daŭhabud «Šanter Chił» kala Drazdoŭ
U kancy krasavika 2025 hoda Łukašenka naviedaŭ «Amkador» i skazaŭ, što «najbližejšym časam daviadziecca vielmi mocna papracavać na «Amkadory», jaki znachodzicca ŭ składanym stanoviščy praź dziejańni [minułaha] ŭładalnika».
***
AAT «Amkador» — biełaruskaja mašynabudaŭničaja kampanija. Zajmajecca vytvorčaściu i realizacyjaj śpiecyjalnych mašyn dla darožna-budaŭničaj, łahistyčnaj, torfazdabyŭnoj, kamunalnaj, lasnoj, sielskahaspadarčaj halin. U strukturu chołdynhu «Amkador» uvachodzili bolš za 25 pradpryjemstvaŭ.
Alaksandr Šakucin naradziŭsia ŭ 1959 hodzie ŭ vioscy Vialikaje Babina Aršanskaha rajona. Pačynaŭ jak traktaryst kałhasa «Radzima». Zakončyŭ Biełaruski dziaržaŭny miedycynski ŭniviersitet pa śpiecyjalnaści «chirurh». Pracavaŭ zahadčykam chirurhičnaha adździaleńnia 10‑j minskaj balnicy, dyrektaram miedcentra MTZ. U jakaści prezidenta pradpryjemstva «Prammiedinviest» zajmaŭsia pastaŭkami miedycynskaha abstalavańnia. Staŭ akcyjanieram «Amkadora», uznačaliŭ kampaniju. Byŭ členam Savieta respubliki, uznačalvaŭ Biełaruskuju tenisnuju fiederacyi.
Ciapier čytajuć
U minskim handlovym centry Palazzo sabrałasia daŭžeznaja čarha. Pa darmovych miadźviedzikaŭ!1
Kamientary