U Minsku pjany vieterynar zalez u RNPC nieŭrałohii i ściahnuŭ zaplečnik ź piečyvam
Mocna pjany 46‑hadovy žychar Barysava čamuści vyrašyŭ u stalicy pieranačavać u RNPC nieŭrałohii i niejrachirurhii. Ciapier jaho vinavaciać u kradziažy, piša «Minsk-Naviny».
Mužčyna pryjechaŭ u stalicu na sustreču ź siabrami. Jany vypili, paśla čaho jon adzin pajšoŭ špacyravać pa horadzie. Pozna ŭviečary, prachodziačy mima Respublikanskaha navukova-praktyčnaha centra nieŭrałohii i niejrachirurhii, jon vyrašyŭ prabracca ŭ budynak, kab pieranačavać.
Mužčyna ŭbačyŭ na pieršym paviersie akno, adčynienaje na pravietryvańnie, prasunuŭ ruku ŭ ščylinu i rasčyniŭ jaho, a potym zalez u pakoj adpačynku miedpiersanału.
Ubačyŭšy tam razasłany łožak, jon padumaŭ, što voś-voś niechta zojdzie. Tamu chutka schapiŭ zaplečnik, jaki stajaŭ na kreśle, i takim ža čynam vybraŭsia z balnicy.
Na prypynku jon razhledzieŭ, što było ŭnutry: trymalnik dla ručnika, aptyčnyja dyski, dźvie pary navušnikaŭ, parahienieratar i vadkaść da jaho, pakunačak harbaty i piečyva, jakoje mužčyna adrazu ž źjeŭ. Čužy zaplečnik jamu spadabaŭsia, i jon vyrašyŭ pakinuć jaho sabie.
Doktar RNPC, vyjaviŭšy, što majomaść źnikła, źviarnuŭsia ŭ milicyju. Złamyśnika zatrymali.
Abvinavačany pracuje vieterynarnym uračom, i ŭžo maje za parušeńnie praviłaŭ darožnaha ruchu i nie źniatuju sudzimaść. Jaho abvinavačvajuć u kradziažy, za što pahražaje da troch hadoŭ turmy.
Mužčyna całkam pryznaŭ svaju vinu, kampiensavaŭ paciarpiełamu škodu. Ekśpiertyza pakazała, što jon maje patrebu ŭ prymusovym lačeńni ad chraničnaha ałkahalizmu.
Padazravany znachodzicca pad vartaj.
Kamientary