Pamiatajecie sudździu Minharsuda, jaki admoviŭsia sudzić palitviaźnia i zvolniŭsia? Voś dzie jon ciapier
Dźmitryj Cykał paśpieŭ papracavać u Biełarusi i ŭ prakuratury, i ŭ sudovaj sistemie, a paśla źjechaŭ za miažu.
Były biełaruski sudździa Dźmitryj Cykał pracuje advakatam u Rasii. Jon źjaŭlajecca členam Advakackaj pałaty Maskoŭskaj vobłaści i ažyćciaŭlaje dziejnaść u Kalehii advakataŭ Maskvy «Šaryjeŭ i partniory».
Cykał u Biełarusi paśpieŭ papracavać u orhanach prakuratury (2009-2015), a paśla ŭ sudovaj sistemie (2015-2022). Jon skončyŭ karjeru na pasadzie sudździ Minskaha haradskoha suda.
Pa infarmacyi «Našaj Nivy», karjera Cykała pajšła ŭniz paśla taho, jak admoviŭsia sudzić palitviaźnia Cichana Osipava za «zamach na zabojstva supracoŭnika orhanaŭ unutranych spraŭ».
U noč na 11 žniŭnia 2020 hoda Osipaŭ najechaŭ na svajoj mašynie na siłavikoŭ, jakija razhaniali demanstrantaŭ. Cykał vyrašyŭ, što heta adpaviadaje «hvałtu ŭ adnosinach supracoŭnika». Sudździu daviałosia mianiać prosta pasiarod pracesu na inšaha, Piatra Arłova. U vyniku toj prysudziŭ Osipavu 11 hadoŭ źniavoleńnia, a sam pajšoŭ na pavyšeńnie, staŭ pieršym namieśnikam staršyni Minskaha haradskoha suda.
Cykał napisaŭ zajavu na zvalnieńnie, jakuju praz paŭhoda zadavolili.
Pry hetym sam Cykał taksama byŭ datyčny da palityčnaha pieraśledu. Jašče na pasadzie sudździ Pieršamajskaha suda Minska jon štrafavaŭ aktyvistaŭ — u tym liku Źmitra Daškieviča i Paŭła Vinahradava. Taksama davaŭ sutki ŭdzielnikam Dnia Voli — 2017.
Dyj jak sudździa Minskaha haradskoha suda pakidaŭ udzielnikam pratestaŭ nieadekvatnyja terminy.
Paśla adstaŭki Cykał źjechaŭ u Rasiju, dzie zmoh atrymać licenziju advakata.
«Biełaruś pieradusim». Što viadoma pra 23‑hadovaha aficera śpiecnaza, jakoha asudzili na 19 hadoŭ za «zdradu dziaržavie»8
Kamientary
[Zredahavana]