Były ministr sielskaj haspadarki źbirajecca vyroščvać pšanicu ŭ Livii
Ciapier Anatol Linievič kiruje pradpryjemstvam «Biellibtrejd», piša BiełTa.
Były kiraŭnik Ministerstva sielskaj haspadarki i charčavańnia Anatol Linievič źbirajecca vyroščvać pšanicu ŭ Livii, pra heta stała viadoma paśla sustrečy Łukašenki z synam fieldmaršała Chaftara.
«Pasprabujem pradstavić svaje viedy, technałohii, umieńni, kab pakazać, jak treba i možna pracavać u sielskaj haspadarcy. Dumaju, što vynik nie prymusić siabie čakać. My pastarajemsia dapamahčy nakarmić narod Livii. Vyraścić tuju ž pšanicu, pierapracavać u chleb i addać heta ludziam», — pracytavała Linieviča BiełTa.
Havorka idzie ab sumiesnych vytvorčaściach raślinavodčaj pradukcyi. Taksama jość płany stvaryć na livijskaj terytoryi małočna-tavarny kompleks, ptuškafabryku. Jašče adzin prajekt — stvareńnie zboračnaha pradpryjemstva, ale pakul baki prapracoŭvajuć damoŭlenaści pa pastaŭkach techniki.
«Užo zaklučany šerah kantraktaŭ pa našych dziaržaŭnych pradpryjemstvach — MTZ, MAZ, BiełAZ, «Homsielmaš». Užo jość kantrakty. Nam treba budzie ŭ bližejšy čas pastaŭlać techniku», — skazaŭ Linievič.
Anatol Linievič prapracavaŭ na pasadzie kiraŭnika Ministerstva sielskaj haspadarki 9 miesiacaŭ da sakavika 2025 hoda. Jaho na ministerskaj pasadzie źmianiŭ Juryj Horłaŭ. Pavodle ŭkazu, Linievič byŭ adpraŭleny ŭ adstaŭku.
Ciapier čytajuć
Radzilnyja damy spaborničajuć, u kaho 3 lipienia narodzicca bolš dziaciej10
Kamientary