Z-za rekordnaj kolkaści zapuščanych ź Biełarusi mieteazondaŭ Litva časova spyniała pracu pierachodaŭ na miažy
Praca spyniałasia z-za mieteazondaŭ, zapuščanych ź Biełarusi. Z-za hetaha taksama noč nie pracavaŭ aeraport Vilni.
U noč na sieradu Litva časova prypyniała propusk asob i transpartnych srodkaŭ u dvuch naziemnych punktach kantrolu na miažy ź Biełaruśsiu — u Miednikach i Salečnikach (ź biełaruskaha boku — Kamienny Łoh i Bieniakoni).
Heta miera harantavańnia biaśpieki Litvy, źviazanaja z pavietranymi šarami, zapuščanymi ŭnačy ź Biełarusi ŭ Litvu, havorycca ŭ paviedamleńni Pamiežnaj słužby.
U taki čas sutak ruch i patoki praz abodva zhadanyja punkty minimalnyja. Asablivych padziej abo incydentaŭ da ranicy sierady z-za zakryćcia punktaŭ nie zafiksavana ni na ich terytoryi, ni ŭ prybližanych zonach.
Ź viečara z-za kantrabandnych mieteazondaŭ, zapuščanych ź Biełarusi, byŭ zakryty aeraport Vilni.
Aeraport prypyniŭ svaju pracu 21 kastryčnika ŭ 22:23. Rejsy ź Lisabona, Antalji, Treviza, Barsiełony pieranakiravali ŭ Koŭna, z Frankfurta i Bierlina — u Ryhu, z Łondana — u Varšavu, z Kapienhahiena — u Pałanhu. Samalot sa Stakholma viarnuŭsia ŭ aeraport adpraŭleńnia.
Miesiac tamu, kali Polšča zakryvała miažu ź Biełaruśsiu padčas biełaruska-rasijskich vučeńniaŭ «Zachad», ministr unutranych spraŭ Litvy Uładzisłaŭ Kandratovič tłumačyŭ, u jakich vypadkach Litva zakryje miažu.
«Kali zdarycca (pravakacyja), kiraŭnik pamiežnaj achovy hatovy ŭ tuju ž chvilinu dać dazvoł na zakryćcio miažy. (…) Kali niešta adbyvajecca, dron abo pravakacyja, ci niejki nievyrazny pavyšany ruch sił la miažy, my možam heta zrabić», — kazaŭ tady Kandratovič.
Ź jahonych słoŭ, paźniej pastanovu na bolš praciahły termin zakryć miažu pavinien pryniać urad Litvy.
Kiraŭnik Nacyjanalnaha centra kiravańnia kryzisami Viłmantas Vitkaŭskas u efiry LRT Radijas zajaviŭ, što heta adna z samych intensiŭnych akcyj pa dastaŭcy kantrabandnych cyharet z dapamohaj pavietranych šaroŭ u Litvu sioleta.
«Padavałasia, što intensiŭnaść spyniłasia — i voś hetaj nočču my atrymali, badaj, samuju intensiŭnuju invaziju kantrabandnych cyharet z dapamohaj pavietranych šarykaŭ u našuju krainu sioleta. Heta intensiŭnaść vymiarajecca dvuma paramietrami: časavaj vośsiu, na praciahu jakoj zapuskalisia šaryki ŭ našuju krainu, i kolkaściu. Tamu byli pryniaty rašeńni pavietranaj navihacyi prypynić paloty, kab harantavać biaśpieku hramadzianskaj avijacyi», — kaža V. Vitkaŭskas.
Pavodle kiraŭnika NCKK, šaryki z kantrabandaj, što prylacieli ź Biełarusi, byli znojdzieny ŭžo ŭ piaci rehijonach: u Łaździejskim rajonie, u Druskienikach, u rajonach Aran, Salečnikaŭ, u Vilni.
«Apošniaja chvala była zafiksavanaja niepadalok ad aeraporta. Hieahrafija vielmi šyrokaja, heta śviedčyć pra toje, što intensiŭnaść zapusku šarykaŭ była vielmi vysokaja. Chutčej za ŭsio, zapusk adbyvaŭsia nie z adnaho punkta, a była kaardynavanaja apieracyja», — kaža V. Vitkauskas.
Pradstaŭnik Nacyjanalnaha centra kiravańnia kryzisami (NCKK) Darus Buta paviedamiŭ što adzin čałaviek byŭ zatrymany, znojdziena vosiem šaroŭ. «Paciarpieli kala 30 rejsaŭ. Ź ich 14 rejsaŭ, što lacieli ŭ Vilniu, byli nakiravanyja ŭ inšyja aeraporty. Najbolšaja kolkaść samalotaŭ pryziamliłasia ŭ aeraporcie Koŭna — 10 rejsaŭ byli skiravanyja tudy. U aeraport Ryhi byli nakiravanyja 2 rejsy, pa 1 — u Pałanhu i Varšavu. Taksama 10 rejsaŭ byli skasavanyja, a adzin samalot viarnuŭsia ŭ aeraport vyletu», — adznačyŭ jon.
Jość 5 rejsaŭ, jakija zatrymalisia z vyletam z aeraporta Vilni.
Praca pamiežnych pierachodaŭ adnaviłasia pad ranak.
Kamientary
Čto za bried? Hdie łohika? Śbivať nado nieopoznannyje objekty nad svojej tierritorijej.
A pakul što adzinaja "časavaja voś", "šyrokaja hieahrafija" i kolkaść zapuskaŭ praściej tłumačacca spryjalnymi ŭmovami nadvorja: z-za mocnaha reaktyŭnaha strumieniu ŭ strataśfiery nad pavierchniaju nie vielmi typovy, tym bolš dla chałodnaha siezonu, napramak vietru: paŭdniova-ŭschodni, jakraz na Litvu. Zvyčajna ruža viatroŭ advarotnaja: nadvorje da nas prychodzić z Atłantyki. Voś kantrabandysty i sinchronna vykarystali takija ŭmovy.
Vyhladaje, što pakul što jany bolš tearetyčna padrychtavanyja za dziaržavu, rychtujucca i vykarystoŭvajuć vietry.
Takoje nadvorje zachavajecca da vychodnych, pry hetym viecier budzie jašče bolš mocnym za papiaredniuju noč, tak što možna čakać paŭtory zapuskaŭ i praloty ich dalej. Darečy, toje ž nadvorje niasie paciapleńnie.