U źniavoleńni pamior asudžany pa palityčnych artykułach danosčyk i ŭdzielnik akcyj za Łukašenku
U 2020‑m historyk Hieorhij Siamionaŭ zvaniŭ u milicyju i prasiŭ pakarać svaich susiedziaŭ, jakija źbiralisia na rajonie ź bieł-čyrvona-biełymi ściahami. A sam stajaŭ z čyrvona-zialonym ściaham va Uruččy ŭ znak padtrymki Łukašenki. Ale ŭ 2024‑m pryjšli i pa jaho. Siamionaŭ trapiŭ za kraty pa dvuch palityčnych artykułach i za reabilitacyju nacyzmu.
Nadziejnaja krynica paviedamiła «Našaj Nivie» pra śmierć 48‑hadovaha prarasijskaha aktyvista Hieorhija Siamionava, asudžanaha pa palityčnych artykułach, ale nie pryznanaha palitviaźniem. Data i abstaviny jaho śmierci pakul nieviadomyja.
Hieorhij Siamionaŭ minčuk. Skončyŭ škołu ŭ Kurasoŭščynie, a paśla histaryčny fakultet Biełaruskaha dziaržaŭnaha ŭniviersiteta (1998).
Siamionaŭ mieŭ vidavočna prarasijskuju pazicyju, a taksama aktyŭna padtrymlivaŭ Alaksandra Łukašenku.
U žniŭni 2020 hoda jon zrabiŭ dva danosy ŭ svaim rajonie, na vulicy Kazinca ŭ minskaj Kurasoŭščynie.
«Stajać hramadzianie, kryčać, u rukach trymajuć bieł-čyrvona-bieły ściah. Kala 30 čałaviek», — pazvaniŭ jon 14 žniŭnia.
«Na płoščy kala 15 čałaviek zładzili niesankcyjanavanuju akcyju, hučna słuchajuć muzyku, sa ściahami. Prašu dapamohi milicyi, pieraškadžajuć adpačyvać žycharam susiednich damoŭ», — paviedamlaŭ jon 15 žniŭnia.
Sam ža Siamionaŭ chadziŭ na akcyi ŭ padtrymku Alaksandra Łukašenki i ŭrešcie prybiŭsia da supołki «Śpiektr», jakaja źbirałasia pobač z adnajmiennym handlovym centry va Uruččy.
«Śpiektr» — heta marhinalnaja supołka pazasistemnych łukašystaŭ, jakaja jadnaje samych adčajnych ciemrašałaŭ. Siaredni ŭdzielnik «Śpiektra» vieryć u toje, što pryščepki škodnyja, što častkaj biełaruskich čynoŭnikaŭ kiruje «kalektyŭny Zachad». Jany horača padtrymlivajuć Alaksandra Łukašenku i Uładzimira Pucina dy sumujuć pa SSSR.
U vyniku «Śpiektr» trapiŭ u niamiłaść. U 2022‑m im zabaranili pravodzić akcyi, i jany faktyčna rastvarylisia. Sietka ich małaviadomych i niepapularnych kanałaŭ faktyčna zharnułasia. Čym Siamionaŭ zajmaŭsia paśla — nieviadoma.
Aktyvist aktyŭna padtrymaŭ Rasiju ŭ vajnie suprać Ukrainy i šmat repościŭ tematyčnyja materyjały.
Taksama Siamionaŭ rehularna repościŭ materyjały abjadnańnia «Sajuz» adyjoznaha nieanacysta Siarhieja Łušča. Toj vystupaje za faktyčnaje abjadnańnie Biełarusi z Rasijaj i zaciata zmahajecca suprać usiaho biełaruskaha ŭ publičnaj prastory.
Pavodle źviestak «Kibierpartyzanaŭ», apošniaje miesca pracy Siamionava — kampanija «Žencitrejd». Pad hetaj jurydyčnaj nazvaj pracuje rasijskaja sietka kram kaśmietyki i parfumieryi «Letual».
U žniŭni 2024 hoda pa Siamionava pryjšli. Siłaviki paličyli, što na adnoj sa staronak, jakuju jon vioŭ, apraŭdvaŭsia nacyzm.
U vyniku prarasijskamu aktyvistu vystavili abvinavačvańnie pa troch artykułach — «reabilitacyja nacyzmu» (č. 1 art. 130‑1 KK), «raspalvańnie varožaści» (č. 1 art. 130 KK) i «abraza pradstaŭnika ŭłady» (art. 369 KK). Dva apošnija dakładnaja palityčnyja, ale pravaabaroncy nie śpiašalisia pryznavać jaho palitviaźniem, bo nie viedali sutnaść spravy.
Usie hetyja artykuły śpiecyfičnyja — jany dazvalajuć jak abmiežavacca štrafam ci chatniaj chimijaj, tak i praduhledžvajuć kałoniju, až da piaci hadoŭ. Adnak biełaruskaja praktyka pakazvaje, što z takim pakietam artykułaŭ paźbiehnuć kałonii było małarealna.
Milicyja dadała Siamionava ŭ śpis «ekstremistaŭ» 27 červienia 2025 hoda z paznakaj «adbyvaje pakarańnie». Heta značyć, što jamu prysudzili ci chimiju z nakiravańniem, ci kałoniju. Adnak jaki dakładny termin atrymaŭ Siamionaŭ, nieviadoma.
«Naša Niva» — bastyjon biełaruščyny
PADTRYMAĆCiapier čytajuć
Biełaruska kliča na viasielle zorku «Univiera», jaki za vajnu. Uprehsia ŭvieś Threads13
Kamientary