Za 12 hadoŭ kolkaść biełaruskich studentaŭ u Polščy vyrasła ŭ čatyry razy, u Rasii skaraciłasia ŭtraja

Za 12 hadoŭ kolkaść biełaruskich studentaŭ u Polščy vyrasła ŭ čatyry razy, u Rasii skaraciłasia ŭtraja.

Na dumku Paŭła Cieraškoviča, Rasija stračvaje pryvabnaść, niahledziačy na 1300 stypiendyj u hod dla biełaruskich studentaŭ.

«Pik kolkaści biełaruskich studentaŭ u Rasii prychodzicca na 2012 hod — tam navučałasia 32 tysiačy biełaruskich studentaŭ, abo 77% ad usich biełarusaŭ, jakija navučalisia ŭ toj čas za miažoj. U 2023 hodzie ŭžo było 9 369 biełaruskich studentaŭ u Rasii»,

— kaža Pavieł Cieraškovič.

U Polščy, naadvarot, kolkaść biełaruskich studentaŭ raście. U 2012 hodzie ŭ Polščy navučaŭsia 2 991 biełarus, a na 2023 hod JUNESKA daje 11 146 biełaruskich studentaŭ u Polščy, letaś było 12 tysiač. 

U Hiermanii zaraz navučajecca 1500 studentaŭ (u 2023 hodzie było 1200).

Što da stypiendyj, jakija biełaruskaja moładź atrymlivaje ŭ krainach ES, to dakładnych ličbaŭ niama. 

«Bolš-mienš dakładnyja ličby možna znajści pa prahramie Kalinoŭskaha ŭ Polščy, jany dajuć ličby kolki ŭsiaho było stypiendyj za piać hadoŭ, heta prykładna 350 stypiendyj na hod. Prahrama Kalinoŭskaha najbolšaja. Jość prahramy pa padtrymcy ŭ asobnych univiersitetach», — kaža Pavieł Cieraškovič.

Jon taksama źviartaje ŭvahu na ciažkaści, ź jakimi sutykajucca biełaruskija studenty ŭ Polščy.

«Litaralna kožny hod u Polščy ŭźnikajuć niejkija prablemy dla studentaŭ. Letaś sistema adukacyi sutyknułasia z tym, što jany absalutna nie viedajuć, jakija jość uzory paśviedčańniaŭ ab siaredniaj adukacyi ŭ Biełarusi.

Heta nie tolki atestat za 11 kłasaŭ, ale i dypłomy kaledžaŭ, PTV. Ja, naprykład, kansultavaŭ užond (miascovaja administracyja. — NN) u Mazavieckim vajavodstvie i vysyłaŭ im fota ŭzoraŭ usich mahčymych dakumientaŭ. Sioleta prablema była z moŭnymi siertyfikatami. Vyśvietliłasia, što navat zakančeńnie «zeruŭki» [padrychtoŭčaje adździaleńnie ŭniviersitetu] nie harantuje pastupleńnia», — narakaje navukoviec.

Jon zaznačaje, što jość taksama prablema ŭ tym, što ŭniviersitety ŭ Polščy majuć šmat aŭtanomii, i časta rektar vyrašaje, jakoje rašeńnie prymać. I pracavać z sotniaj rektaraŭ bolš składana, čym z adnym ministerstvam adukacyi, jakoje taksama abmiežavanaje ŭ rehulavańni.

«U hetym hodzie situacyja častkova vyrašyłasia. Spadziajusia, praviły ciapier bolš-mienš viadomyja, i abituryjentam treba rychtavacca i zdavać ispyty pa polskaj movie, kab mieć aficyjny siertyfikat. Ale nie vyklučana, što i ŭ nastupnym razam budzie štości novaje, daviadziecca znoŭ u apieratyŭnym režymie situacyju vyrašać», — miarkuje Pavieł Cieraškovič.

• 12
• 0
• 0
• 1
• 0
• 1
• 0
• 0