Prakurorka Paryža raskrytykavała ŭciečku infarmacyi nakont zatrymańnia padazravanych, što abrabavali Łuŭr
Paryžski prakuror Łara Bekua paćvierdziła fakt aryštaŭ padazravanych u abrabavańni Łuŭra, jakoje adbyłosia na minułym tydni. Jana ŭdakładniła, što aryšty byli praviedzienyja ŭviečary ŭ subotu 25 kastryčnika, i adzin z zatrymanych «rychtavaŭsia pakinuć krainu».
Adnak Bekua vykazała hłybokaje škadavańnie z nahody taho, što infarmacyja pra rasśledavańnie trapiła ŭ ŚMI zaŭčasna.
«Hłyboka škaduju ab raskryćci hetaj infarmacyi biez uliku intaresaŭ śledstva. Heta moža tolki naškodzić namahańniam sotniaŭ śledčych, jakija ŭdzielničajuć u pošuku jak vykradzienych kaštoŭnaściaŭ, tak i ŭsich złačyncaŭ», — zajaviła prakurorka.
Jana paviedamiła, što dadatkovyja padrabiaznaści buduć dadzienyja paśla zakančeńnia dopytu padazravanych, jaki moža doŭžycca da 96 hadzin.
Raniej stała viadoma pra zatrymańnie pieršych padazravanych.
Pavodle vydańnia Le Parisien, adzin z padazravanych byŭ zatrymany ŭ paryžskim aeraporcie, adkul jon płanavaŭ vylecieć u Ałžyr. Abstaviny aryštu druhoha nie raskryvajucca.
Abodva zatrymanyja žyvuć u pryharadzie Paryža i, jak miarkujecca, źjaŭlajucca častkaj złačynnaj hrupoŭki, jakoj prypisvajuć kradziež.
Palicyja praciahvaje pošuki astatnich udzielnikaŭ bandy. Paviedamlajecca, što złamyśniki ŭsiaho za 7 chvilin vynieśli ŭnikalnyja ekspanaty i ŭciakli na skutarach.
Paśla zdareńnia Łuŭr časova pieravioz častku svajoj juvielirnaj kalekcyi ŭ schovišča Banka Francyi.
Kamientary