Vinted: u Litvie vyras adnaroh, jakomu siońniašni biełaruski IT moža tolki pazajzdrościć

Na suśvietnym rynku anłajn-rytejła siońnia daminujuć amierykanskija i kitajskija hulcy. Na słychu Amazon, Shein, Temu. Jeŭrapiejskija kampanii, raźvićcio jakich tarmoziać praźmiernyja rehulacyi, majuć składanaści sa stvareńniem ułasnych ličbavych hihantaŭ. Adnak Litvie ŭsio ž udałosia vyraścić «adnaroha», jaki kinuŭ vyklik amierykanskim i kitajskim płatformam.

Havorka pra zasnavany ŭ Vilni markietplejs Vinted — płatformu dla prodažu vintažnych i ŭžyvanych rečaŭ. Akramia samoha markietplejsa, kampanija vybudavała paŭnavartasnuju ekasistemu: ułasnuju łahistyku i transpartnyja servisy, płaciežnuju infrastrukturu, a taksama inviestycyjnyja aktyvy.

Hałoŭny ofis Vinted znachodzicca ŭ Vilni, dadatkovyja — u Hiermanii i Niderłandach. U kampanii pracuje niekalki tysiač supracoŭnikaŭ.

Vinted — heta nie aŭtsorsnaja kampanija, jakaja pradaje pasłuhi i čałaviek-hadziny (što charakterna dla značnaj častki IT-siektara Uschodniaj Jeŭropy). Heta paŭnavartasnaja praduktovaja kampanija-adnaroh, kapitalizacyja jakoj aceńvajecca prykładna ŭ 5 miljardaŭ jeŭra. Abjom abaračeńnia tavaraŭ na płatformie pieravyšaje 10 miljardaŭ jeŭra, a hadavy dachod (revenue) składaje kala miljarda.

Siaredni bruta-zarobak u Vinted u 2025 hodzie skłaŭ €4657. U vilenskim ofisie pracujuć 1594 čałavieki, jašče sotni — u Amsterdamie i Bierlinie. Za try kvartały 2025 hoda Vinted pieraličyŭ u biudžet Litvy bolš za 32 miljony jeŭra padatkaŭ.

Klučavym rynkam dla kampanii stała Francyja — hetamu spryjaje znachodžańnie Litvy ŭ ES i dostup da adzinaha jeŭrapiejskaha rynku.

U 2025 hodzie Vinted staŭ najbujniejšym pradaŭcom adzieńnia ŭ Francyi (pa abjomie prodažaŭ), apiaredziŭšy nie tolki Amazon i miascovuju Kiabi, ale i ŭsich bujnych ofłajn-rytejleraŭ. Płatforma taksama ŭvachodzić u top-10 najbolš naviedvanych sajtaŭ krainy.

Pavialičyć

Ambicyi kampanii praciahvajuć raści. Vinted płanuje aktyŭniej vychodzić na rynak užyvanych luksavych rečaŭ, a taksama pašyrać asartymient za miežy mody: dadavać knihi, cacki, elektroniku, videahulni. Meta — zamacavacca jak viadučaja płatforma ŭžyvanych tavaraŭ u Jeŭropie.

U 2019 hodzie Vinted staŭ pieršym litoŭskim «adnaroham». Paźniej u krainie źjaviłasia jašče niekalki technałahičnych hihantaŭ. Asnoŭnaja ekasistema farmujecca vakoł hrupy Tesonet — adnoj z najmacniejšych technałahičnych hrup u rehijonie. Siarod jaje aktyvaŭ:

• Nord Security (kibierbiaśpieka, 1338 supracoŭnikaŭ),

• Oxylabs (zbor danych i proksi-servisy, 586 supracoŭnikaŭ),

• Hostinger (veb-chostynh, 463 supracoŭniki),

• Surfshark (VPN, 375 supracoŭnikaŭ).

Litva — kraina z nasielnictvam u try razy mienšym, čym u Biełarusi, i ź mienšaj inžyniernaj bazaj — zdoleła pabudavać bolš paśpiachovuju IT-ekasistemu. Heta stała mahčymym dziakujučy dostupu da hłabalnych rynkaŭ i kapitału, bolš jakasnym zakonam, prazrystamu zakanadaŭstvu i palityčnaj sistemie, jakoj daviaraje biznes. I ŭsio heta — bieź śpiecyjalnych režymaŭ kštałtu biełaruskaha PVT abo padatkovych afšoraŭ. Asnoŭny akcent robicca na stvareńni praduktovych kampanij, pad jakija stvarajucca aksieleratary, inkubatary i pryciahvajecca vienčurny kapitał.

Vysokaja jakaść i niezaležnaść sudovaj sistemy, prazrystaść padatkaŭ, adkrytaść dla zamiežnych śpiecyjalistaŭ, stabilnaja finansavaja sistema i biaśpieka dla zasnavalnikaŭ i inviestaraŭ akazalisia značna važniejšymi dla raźvićcia IT-siektara, čym padatkovyja lhoty.

Na hetym fonie biełaruski IT-siektar, jaki sutyknuŭsia z palityčnymi represijami, sankcyjami, finansavaj izalacyjaj, pracaj praz afšory, ciažkaściami z dostupam da kapitału i niemahčymaściu narmalna najmać zamiežnych śpiecyjalistaŭ, zastajecca pieravažna aŭtsorsnym i častkova aryjentavanym na rasijski rynak. Adrezanaść ad mižnarodnych rynkaŭ, kaapieracyi i inviestycyj nie dazvalaje jamu evalucyjanavać u paŭnavartasnuju praduktovuju ekanomiku.

Tym časam u honar Vinted prypynak u Vilni pobač z ofisam kampanii pierajmienavali ŭ «Adnaroha» (Vienaragių).

• 15
• 1
• 1
• 2
• 0
• 0
• 0
• 2