U Rasii abjavili ŭ vyšuk byłoha pradziusara hurta «Łaskavy maj» Andreja Razina
62‑hadovamu Andreju Razinu vystaŭlena abvinavačvańnie ŭ šmatmiljonnym machlarstvie. Pra heta paviedamiŭ jahony advakat.
Kryminalnuju spravu suprać pradziusara nadzvyčaj papularnaha na miažy 1980‑ch i 1990‑ch hadoŭ hurta «Łaskavy maj» raspačali jašče ŭ 2024 hodzie, a abvinavačvańnie vystavili tolki ciapier.
Śćviardžajecca, što Andrej Razin zaklučyŭ fiktyŭny kantrakt z paetam Siarhiejem Kuźniacovym, dziakujučy jamu pradziusar atrymlivaŭ aŭtarskija naličeńni za chity pamierłaha ŭ 2022 hodzie byłoha hałoŭnaha salista «Łaskavaha maja» Juryja Šatunova.
Za padroblenyja dakumienty i inšyja «kałamutnyja» schiemy abvinavačanamu pahražaje pakarańnie pa artykule «Machlarstva», jaki praduhledžvaje pazbaŭleńnie voli ad 2 da 10 hadoŭ.
Peŭnyja staronki bijahrafii Andreja Razina byli źviazanyja i ź Biełaruśsiu. Tak, u 1990 hodzie, na ŭzdymie papularnaści «Łaskavaha maja» tady 27‑hadovy Razin paznajomiŭsia z 62‑hadovym hienieralnym kanstruktaram MAZa Michaiłam Vysockim. Niahledziačy na roźnicu va ŭzroście, pamiž imi zaviazalisia vielmi ciopłyja stasunki: muzykant pačaŭ nazyvać kanstruktara tatam, a jahonuju žonku — mamaj.
Pieršym vynikam siabroŭstva stała stvareńnie ŭsiaho za try miesiacy na Minskim aŭtazavodzie śpiecyjalna dla patreb «Łaskavaha maja» ŭnikalnaha hruzavika, jaki atrymaŭ nazvu «Šasi 0000001».
Siabroŭstva Razina i Michaiła Vysockaha, jaki paźniej atrymaŭ ad Łukašenki zvańnie Hieroja Biełarusi, praciahvałasia da śmierci apošniaha ŭ 2013 hodzie. Hurt za hety čas daŭ bolš za 50 kancertaŭ dla supracoŭnikaŭ zavoda, a Razin nieadnarazova pryjazdžaŭ na radzimu Vysockaha na Kapylščynu.
Kamientary