Cichanoŭski prapanavaŭ radykalna pierahledzieć stratehiju dla Biełarusi
U kałoncy dla The Washington Post Siarhiej Cichanoŭski prapanavaŭ try kroki dla pieratvareńnia Biełarusi ŭ «novuju Finlandyju».
Cichanoŭski pačynaje svaju kałonku z uspaminaŭ pra sustreču z Alaksandram Łukašenkam u SIZA KDB u 2020‑m hodzie. Jon pryvodzić słovy Łukašenki, źviernutyja da 12 aryštavanych palityčnych apanientaŭ:
«Palityka — brudnaja sprava! Vy pavinny byli być hatovyja da ŭsiaho! Tut niama praviłaŭ!!»
«Ja admoviŭsia pacisnuć ruku złodzieju. Ja admoviŭsia prasić ab pamiłavańni. Za heta ja atrymaŭ amal 20 hadoŭ», — zhadvaje Cichanoŭski.
Svajo vyzvaleńnie paśla amal piaci hadoŭ u adzinočnaj kamiery jon źviazvaje z «nieartadaksalnaj dypłamatyjaj» prezidenta ZŠA Donalda Trampa, a mienavita ź niečakanaj sustrečaj jaho śpiecpradstaŭnika hienierała Kita Kiełaha z Łukašenkam u Minsku.
«Heta byŭ vynik, jakoha nichto nie čakaŭ, i jon nahadaŭ mnie, što dypłamatyja, kali da jaje padychodzić tvorča, usio jašče moža źmianić žyćcio», — davodzić były palitviazień.
Novy hłabalny paradak
Pavodle jaho słovaŭ, viarnuŭšysia na volu, jon ubačyŭ śviet, u jakim «stary hłabalny paradak razburyŭsia» i pačałasia «Chałodnaja vajna 2.0 z tryma asnoŭnymi teatrami vajennych dziejańniaŭ: Jeŭropaj, Blizkim Uschodam i Inda-Cichaakijanskim rehijonam».
Jon krytykuje administracyju Bajdena za nierašučuju palityku ŭ dačynieńni vajny va Ukrainie, adznačajučy, što dapamoha pastupała «zanadta mała i zanadta pozna».
U vyniku «atrymałasia vajna na źniasileńnie, jakuju Ukraina nie moža vyjhrać na poli boju, ale ŭsio jašče moža vyjhrać dypłamatyčnym šlacham».
Palityk śćviardžaje, što Jeŭropa pavinna ŭziać na siabie bolš adkaznaści, ale bieź lidarstva ZŠA jana nie moža dziejničać rašuča. Jon taksama ličyć pamyłkovymi spadziavańni adździalić Pucina ad Si Czińpina, bo ich abjadnoŭvaje ahulnaje supraćstajańnie zachodniamu paradku.
«Hetak ža, jak Łukašenku nielha adździalić ad Pucina, Pucina nielha adździalić ad Si», — davodzić Cichanoŭski.
Pry hetym jon vysoka aceńvaje dypłamatyčny styl Trampa, jaki, na jaho dumku, spałučaje «pramyja kantakty, vyvierany cisk i tranzakcyjnuju dypłamatyju — toje, što patrabuje ciapierašni momant». I pierachodzić da pytańnia Biełarusi:
«I heta padvodzić mianie da majoj rodnaj Biełarusi — i da taho, čamu jana maje našmat bolšaje značeńnie, čym bolšaść u Vašynhtonie hatovyja pryznać».
Cichanoŭski ličyć, što ŭ 2020 hodzie Zachad upuściŭ mahčymaść źmianić situacyju ŭ Biełarusi. Kali b biełarusaŭ tady padtrymali, heta mahło b praduchilić poŭnamaštabnaje ŭvarvańnie Rasii va Ukrainu. Zamiest hetaha Zachad doŭhi čas razhladaŭ Biełaruś jak «šery bufier» pamiž Rasijaj i NATA.
Cichanoŭski nazyvaje naiŭnym pasył «Ratujcie nas. Dapamažycie nam zrynuć dyktatara. Dazvolcie nam ustupić u Jeŭrapiejski sajuz i NATA», jaki sychodziŭ ad biełaruskaj apazicyi na praciahu apošnich piaci hadoŭ.
«Surovaja praŭda ŭ tym, što Biełaruś nie ŭstupić u NATA ci ES u najbližejšy čas. Rabić vyhlad, što heta nie tak, — značyć tolki padahravać paranoju Maskvy i trymać Biełaruś u pastcy viečnaj zaležnaści».
Novaja stratehija
Zamiest hetaha Cichanoŭski prapanuje novuju stratehiju, jakaja składajecca z troch punktaŭ.
1. Realistyčnyja mety. Jon prapanuje aryjentavacca na histaryčny dośvied Finlandyi časoŭ Chałodnaj vajny, jakaja zdoleła zachavać svabodu i dasiahnuć vysokaha ŭzroŭniu žyćcia, zachoŭvajučy niejtralitet.
«Jaje niejtralitet byŭ nie sastupkaj, a strymlivańniem inšymi srodkami».
Cichanoŭski ŭpeŭnieny, što taki padychod adpaviadaje intaresam usich bakoŭ:
«Niejtralnaja Biełaruś — svabodnaja, suvierennaja i pazabłokavaja — mahła b słužyć intaresam usich. Jana stała b bufieram, nie pieratvarajučysia ŭ piešku, stabilizujučym elemientam, a nie kropkaj napružańnia».
2. Pieraasensavańnie apazicyi. Jana pavinna «navučycca dumać katehoryjami siły, a nie achviarnaści».
«Łukašenka nie bieśśmiarotny. Ułada ŭ Biełarusi źmienicca — mahčyma, chutka, mahčyma, niečakana. Kali heta adbudziecca, kirunak hetych źmien budzie zaležać ad taho, chto budzie hatovy dziejničać pieršym. My pavinny stvaryć novy palityčny kłas — efiektyŭny, aryjentavany na budučyniu i zdolny vyznačać los krainy, kali nadydzie momant pieramien».
3. Sapraŭdnyja sajuźniki. Zachad, i ŭ pieršuju čarhu ZŠA, pavinien uśviadomić ułasnuju zacikaŭlenaść u tym, kab Biełaruś stała «nastupnaj Finlandyjaj», i adyhrać aktyŭnuju rolu ŭ dasiahnieńni hetaha vyniku.
Cichanoŭski pryznaje, što pieramovy z Łukašenkam «niepryjemnyja, ale časam nieabchodnyja» jak taktyčny krok dla vyzvaleńnia bolš čym 1400 palitviaźniaŭ, ale heta nie doŭhaterminovaje rašeńnie.
U kancy svajho artykuła Cichanoŭski zaklikaje ZŠA być hatovymi da momantu, kali «akno mahčymaściaŭ znoŭ adkryjecca»:
«Kali heta adbudziecca, ZŠA pavinny być hatovyja ŭziać na siabie lidarstva, skarystacca šancam pieratvaryć Biełaruś z šeraha bufiera ŭ stabilizujučy most na miažy Jeŭropy. Cana vahańniaŭ budzie vymiaracca nie tolki strataj upłyvu, ale i dalejšym razbureńniem paradku, jaki kaliści pabudavała Amieryka».
Cichanoŭski prapanavaŭ radykalna pierahledzieć stratehiju dla Biełarusi19
Cichanoŭski prapanavaŭ radykalna pierahledzieć stratehiju dla Biełarusi
Pamiatajecie ŭkrainku, jakuju rasijanie pryviazali da słupa? Tyja, chto jaje katavaŭ, za hady vajny amal usie zahinuli. A voś što robić ciapier jana2525
Kamientary