Prakuratura paličyła navahodnija cacki z Łarysaj Hienijuš, što pradavalisia ŭ «Kaladnaj kramie», reabilitacyjaj nacyzmu
Navahodnija cacki z vyjavaj Łarysy Hienijuš, jakija pradavalisia ŭ minskaj «Kaladnaj kramie», paličyli «reabilitacyjaj nacyzmu».
«Prakuratura Savieckaha rajona h. Minska padčas manitorynhu ŭ sietcy internet vyjaviła prapanovy na nabyćcio ŭ adnoj z kram stalicy pradukcyi, źviazanaj z reabilitacyjaj nacyzmu, i zapatrabavała vyklučyć jaje z prodažu. Ustanoŭlena, što ŭ adnoj z kram publična demanstrujucca, a taksama prapanujucca da nabyćcia tavary ŭ vyhladzie navahodnich cacak z vyjavaj Łarysy Hienijuš», — havorycca ŭ paviedamleńni minskaj prakuratury.
Adznačajecca, što Łarysa Hienijuš była asudžanaja prysudam Viarchoŭnaha suda BSSR ad 7 lutaha 1949 hoda pavodle artykułaŭ 66, 76 Kryminalnaha kodeksa BSSR (u redakcyi 1928 hoda) za «zdradu Radzimie» i «ŭdzieł u antysavieckaj arhanizacyi».
«Padčas Druhoj suśvietnaj vajny jana znachodziłasia na terytoryi Čechasłavakii i ŭdzielničała ŭ napisańni zvarotu «biełarusaŭ pratektarata Čechii i Maravii» da Adolfa Hitlera. Jaje dziejnaść była ciesna źviazanaja z nacysckaj prapahandaj na zachoplenych biełaruskich ziemlach. Nieadnarazova ŭzdymałasia pytańnie ab reabilitacyi Łarysy Hienijuš, adnak Viarchoŭny Sud pastanaviŭ, što padstavaŭ dla jaje reabilitacyi niama», — zajavili ŭ prakuratury.
Navahodnija cacki źjaŭlajucca pradukcyjaj ułasnaj vytvorčaści arhanizacyi — ułaśnika kramy.
Namieśnik prakurora Savieckaha rajona Minska ŭ adras dyrektara arhanizacyi ŭnios pradpisańnie ab likvidacyi parušeńniaŭ zakanadaŭstva ab «niedapuščeńni reabilitacyi nacyzmu», u jakim zapatrabavaŭ likvidavać «parušeńni» i vyklučyć tavary z prodažu. Chada praviadzieńnia pravierki na kantroli prakuratury rajona.
Niadaŭna «Kaladnaja krama», što mieścicca na vulicy Kalcova ŭ Minsku, pačała pradavać sieryju jołačnych šaroŭ z partretami biełaruskich piśmieńnikaŭ i aśvietnikaŭ. Siarod ich byli Vasil Bykaŭ, Francysk Skaryna, Janka Kupała, Maksim Bahdanovič, Uładzimir Karatkievič i inšyja. Była i Łarysa Hienijuš.
Mienavita da asoby Łarysy Hienijuš pryčapilisia prapahandysty.
Pavodle lista z administracyi Savieckaha rajona Minska, apublikavanaha danosčycaj Volhaj Bondaravaj, milicyja ciapier pravodzić pravierku ŭ dačynieńni «Kaladnaj kramy».
U liście, padpisanym kiraŭnikom administracyi Alaksandram Ščakovičam, havaryłasia, što ŭ Minharvykankam pastupili elektronnyja zvaroty, dzie śćviardžałasia, što supracoŭniki «Kaladnaj kramy» raspaŭsiudžvajuć «materyjały, jakija reabilitujuć nacyzm», pradajučy cacki z partretam Hienijuš.
U vyniku kramu zakryli.
Kamientary