Łatuška: Łukašenka kateharyčna admoviŭ ZŠA ŭ prośbie dazvolić vyzvalenym palitviaźniam zastacca ŭ Biełarusi

Pavieł Łatuška śćviardžaje, što padčas pieramoŭ z Łukašenkam amierykanski bok prasiŭ dać vyzvalenym prava vybaru — źjechać abo zastacca ŭ krainie. Hetuju pazicyju, pavodle słoŭ palityka, baraniŭ śpiecpradstaŭnik ZŠA pa Biełarusi Džon Koŭł.

— Ja spadziajusia, što dypłamatam ZŠA ŭdasca pry razhladzie pytańnia vyzvaleńnia nastupnych hrup palityčnych źniavolenych usio ž adstajać hetuju pazicyju. Nie viedaju, jakija arhumienty moža vykarystać amierykanski bok — heta im vyrašać, — adznačyŭ Łatuška. — Ale my z vami taksama vydatna razumiejem, što Łukašenka idzie na peŭnyja sastupki ŭ suviazi z tym ciskam, jaki isnuje jak z boku ZŠA, tak i Jeŭrapiejskaha sajuza ŭ dačynieńni da režymu. I hety cisk maje pieradusim sankcyjny charaktar.

Pavodle słoŭ namieśnika kiraŭnicy APK, admova Łukašenki faktyčna aznačaje prymusovuju vysyłku apanientaŭ i pazbaŭleńnie biełarusaŭ ich bazavaha kanstytucyjnaha prava.

— My siońnia nazirajem adkrytuju palityku režymu Łukašenki pa departacyi niełajalnaj častki hramadzianskaj supolnaści Biełarusi z pazbaŭleńniem prava vybaru miesca žycharstva, — padkreśliŭ palityk.

Pra pravavuju niavyznačanaść, u jakoj apynulisia byłyja viaźni, raspaviała pradstaŭnica APK u sacyjalnaj palitycy Volha Zazulinskaja. Pavodle jaje słoŭ, niahledziačy na pamiłavańnie, sistema ŭnutry krainy praciahvaje pracavać nieskaardynavana, a časam i absurdna.

— Dniami da baćkoŭ adnaho z vyzvalenych i vysłanych pryjšli supracoŭniki KDB i prapanavali [jamu] viarnucca ŭ Biełaruś i adsiadzieć 15 hadoŭ. Kali maci skazała im, što heta ž jany jaho vysłali, joj adkazali, što jaje syn uciok z kałonii, — paviedamiła Zazulinskaja.

Pradstaŭnica Kabinieta adznačyła, što pravavy status vyzvalenych zastajecca niajasnym. U vydadzienych im daviedkach nie paznačanyja pryčyny vyzvaleńnia.

Taksama Zazulinskaja ahučyła sumy, vydatkavanyja na padtrymku 123 čałaviek, jakija vyjšli na volu 13 śniežnia. Pavodle spravazdačy Mižnarodnaha humanitarnaha fondu, ahulnaja suma vydatkaŭ za pieršy miesiac skłała 211 615 jeŭra.

Asnoŭnyja artykuły vydatkaŭ raźmierkavalisia tak:

• ježa — 66 199 jeŭra;
• žyllo — 60 862 jeŭra;
• adzieńnie — 37 619 jeŭra;
• technika — 13 867 jeŭra;
• srodki hihijeny — 10 470 jeŭra;
• materyjalnaja dapamoha — 8070 jeŭra.

— My bačym, kolki srodkaŭ Mižnarodnaha humanitarnaha fondu było vydatkavana za adzin miesiac pačatkovaj dapamohi. Hetaja suma biez uliku ŭniosku Freedom House, asabistaha ŭniosku Paŭła Łatuški, uniosku vałancioraŭ, BYSOL, Biełaruskaha doma pravoŭ čałavieka, «Viasny», Libereco. Hetyja arhanizacyi majuć svaje resursy — finansavyja i čałaviečyja, — padkreśliła pradstaŭnica APK.

Jana dadała, što nastupnym krokam stanie arenda pastajannaha žylla dla ludziej, ich lačeńnie, psichałahičnaja reabilitacyja i nabyćcio nie tolki zimovych, ale i viasnovych rečaŭ.

Kaardynatarka inicyjatyvy Volnyja Vieranika Stankievič raspaviała pra pobytavyja ŭmovy, u jakich ciapier znachodziacca byłyja palitviaźni ŭ Varšavie.

— Ciapier usia hrupa pražyvaje ŭ hateli, za vyklučeńniem tych ludziej, chto ŭžo źjechaŭ da svajakoŭ, — jany lepš adaptavalisia i samastojna źniali žyllo. Častka ludziej, jakija zastalisia ŭ Varšavie, taksama ŭžo žyvie ŭ šełtarach. I da 20 studzienia ŭsia hrupa budzie raśsialenaja pa asobnym žylli, jakoje taksama budzie kampiensavacca sa srodkaŭ Mižnarodnaha humanitarnaha fondu, — patłumačyła Stankievič.

Pavodle jaje słoŭ, ciapier va ŭsich vyzvalenych jość mientary, jakija dapamahajuć z adaptacyjaj i sacyjalizacyjaj. Praca viadziecca nie indyvidualna z kožnym čałaviekam, a ŭ hrupach pa 4—5 čałaviek.

• 6
• 0
• 0
• 1
• 0
• 2
• 1
• 0