Kučynski — Kavaleŭskamu: Admaŭlać zasłuhu Cichanoŭskaj, što pytańnie palitviaźniaŭ u mižnarodnym paradku dnia — ihnaravać vidavočnaje

«Mnie zdajecca, hetyja vypady daŭno pierajšli miežy i kančatkova pieratvarylisia ŭ ad hominem. I heta ŭžo zusim nie vyhladaje jak sproba razabracca ŭ sutnaści ci padyskutavać, a jak piersanalnaja ataka. Asabliva škada, što heta adbyvajecca z boku čałavieka z dypłamatyčnym minułym. Tamu, na moj pohlad, ustupać u dyskusii takoha kštałtu — biessensoŭna: jany stali zanadta asabistymi, — vykazaŭsia Kučynski. 

— Ja pra heta kazaŭ Valeru nieadnarazova — i publična, i ŭ pryvatnych razmovach paśla jaho adychodu. Navat kali pohlady ci taktyki razychodziacca, heta nie padstava apuskacca da asabistych napadak».

Kučynski adznačaje, što dobra razumieje, jak vybudavany ciapierašni humanitarny praces — jakija isnujuć praviły, jakija vykarystoŭvajucca taktyki i padychody, dzie prachodziać čyrvonyja linii. «Za apošnija 9 miesiacaŭ ja pravioŭ značnuju kolkaść času i ŭ Biełym domie (7 asobnych sustreč), i ŭ Dziarždepartamiencie, nie kažučy pra tuju kamunikacyju i pracu, jakaja viadziecca niepublična i dystancyjna».

«Ci źjaŭlajecca zasłuhaj Cichanoŭskaj toje, što pytańnie biełaruskich palitviaźniaŭ znachodzicca ŭ mižnarodnym paradku dnia — u tym liku amierykanskim? Admaŭlać heta — značyć ihnaravać vidavočnaje. U mnohich krainach jość palitviaźni, ale mienavita Biełaruś atrymała taki ŭzrovień uvahi. Heta vynik sistemnaj pracy ciaham piaci hadoŭ — ź lidarami, uradami, parłamientami i ŚMI. Prymianšać hetuju rolu — jak minimum niekarektna», — kaža Kučynski.

Jon dadaje, što pieramovy pačalisia jašče pry administracyi Bajdena, a Kavaleŭskaha ŭ kamandzie na toj momant užo nie było.

«Tamu jahonyja acenki — jak samich pieramoŭ, tak i ŭnutranych nastrojaŭ — vyhladajuć, miakka kažučy, nieinfarmavanymi. Nijakaj «rospačy» ci «razhublenaści» nie było, bo ŭ hetym pracesie dla nas nie było niečakanaściaŭ — była kankretnaja praca, publičnaja i niepubličnaja».

Kučynski dadaje: «My nikoli nie śćviardžali, što «kirujem», «dyktujem» ci «całkam upłyvajem» na amierykanski bok abo inšych partnioraŭ — budź to ZŠA, Litva ci Ispanija. My znachodzimsia ŭ stałaj kamunikacyi, kansultujemsia, danosim svaje pazicyi i prapanovy. I toje, što adbyvajecca paśla hetych kansultacyj i razmoŭ, — heta ŭžo rašeńni partnioraŭ».

Kavaleŭski zajaviŭ, što ofis prysabiečvaje sabie vyniki čužoj pracy.

«Hetyja abvinavačańni nie majuć ničoha ahulnaha z rečaisnaściu. Nikoli takoj intencyi nie było, — kaža Kučynski. — Vyzvaleńnie — heta vynik składanaj, šmatuzroŭnievaj pracy. I tut ja jašče raz asobna chaču padkreślić rolu Złučanych Štataŭ i asabista śpiecpasłańnika pa Biełarusi Džona Koŭła, a taksama Krysa Śmita i Endzi Bejkiera. Praca Džona Koŭła — heta šykoŭny prykład vysokaprafiesijnaj dypłamatyi. Mienavita dziakujučy jaho namahańniam hety humanitarny trek atrymaŭ kankretnaje ŭvasableńnie».

Kučynski kaža, što nie bačyŭ, kab Kavaleŭski ŭdzielničaŭ u dapamozie vyzvalenym palitviaźniam, kali ich vyvozili z krainy.

«Ja prysutničaŭ pry ŭsich šaści vyzvaleńniach za apošnija 14 miesiacaŭ. Paśla kožnaha vyzvaleńnia dapamoha arhanizoŭvałasia i akazvałasia praz OSC, APK, pravaabarončyja arhanizacyi i našych mižnarodnych partnioraŭ. Kavaleŭskaha nie było pry anivodnym z hetych vyzvaleńniaŭ. Jon nie ŭdzielničaŭ ni ŭ łahistycy, ni ŭ pracesach dapamohi ź lehalizacyjaj.

Taksama ja nikoli nie čuŭ ad zamiežnych partnioraŭ, kab jon advakatavaŭ za dałučeńnie krain da Mižnarodnaha humanitarnaha fondu, stvoranaha Cichanoŭskaj razam z Narviehijaj. Siońnia ŭ hetym fondzie ŭdzielničajuć užo 11 krain i tudy ŭnieśli pad 2 miljony jeŭra dapamohi, i pa sutnaści mienavita jon u značnaj stupieni zabiaśpiečvaje krytyčnuju padtrymku dla adnaŭleńnia žyćciaŭ vyzvalenych palitviaźniaŭ za miežami Biełarusi.

Pry hetym ja dapuskaju, što Kavaleŭski moh asabista rabić danaty — i kali heta tak, to za heta, biezumoŭna, dziakuj. Taksama mahčyma, što ludzi, jakija pobač ź im, zaklikali da padtrymki i ŭdzielničali ŭ zborach. Bo tych ludziej, jakich ja baču razam ź im — Nastu [Kaściuhovu], Volu [Harbunovu], Taniu [Chomič] — ja viedaju i staŭlusia da ich ź vialikaj pavahaj. I nie sumniavajusia, što jany šukali mahčymaści dapamahčy palitviaźniam».

Kučynski dadaŭ, što bolš nie chacieŭ by viartacca da hetych dyskusij i vykazaŭ tut asabistuju pazicyju, a nie ŭsiaho Ofisa.

«Pry ŭsioj pavazie da dziejnaści kožnaha, niachaj ahienctvy i ich ahienty — budź to ahienctva rekłamnaje, turystyčnaje ci eŭraatłantyčnaje — robiać svaju spravu, my budziem rabić svaju. Aby heta sapraŭdy było na karyść demakratyčnaj, suvierennaj i niezaležnaj Biełarusi.

I niachaj kožnaha sudziać pa ichnich učynkach. Jak kazaŭ prezident Kienedzi «U pieramohi zaŭždy tysiača baćkoŭ, a paraza zaŭždy sirata». My hatovyja adkazvać jak za pieramohi, hetak i za parazy».

• 40
• 3
• 0
• 4
• 1
• 0
• 0
• 0