Novaja kitajskaja sistema zdolnaja źniščać rai dronaŭ z dapamohaj mikrachvalaŭ

Sistemu vysokamahutnaha mikrachvalevaha ŭździejańnia «Urahan 3000» šyrokaj publicy pakazali padčas maštabnaha vajskovaha paradu ŭ Piekinie ŭ vieraśni. Ale tolki ciapier dziaržaŭny abaronny kancern Norinco raskryŭ niekatoryja detali raspracoŭki, piša South China Morning Post.

Jak adznačyŭ pradstaŭnik kampanii, efiektyŭnaja dalokaść pierachopu «Urahana 3000» pieravyšaje 3 km. Heta daje mahčymaść paśpiachova zmahacca ź lohkimi i małymi bieśpiłotnymi latalnymi aparatami, a taksama z cełymi rajami dronaŭ. Pavodle jaho słoŭ, taki radyus dziejańnia stavić kitajskuju sistemu ŭ avanhard padobnych raspracovak jak unutry krainy, tak i na mižnarodnym uzroŭni.

Dla paraŭnańnia, amierykanski anałah — vysokamahutnaja mikrachvalevaja sistema Leonidas, raspracavanaja kampanijaj Epirus dla vojska ZŠA, — maje dalokaść dziejańnia da 2 km.

Jak adznačajecca, pavialičanaja dalokaść dazvalaje pierajści ad taktyki kropkavaj abarony asobnych abjektaŭ da bolš šyrokaj stratehii zabarony dostupu, kali sistema moža zakryvać dla bieśpiłotnikaŭ značnyja terytoryi.

«Urahan 3000» zdolny pracavać jak aŭtanomna, tak i ŭ spałučeńni z łaziernaj zbrojaj i tradycyjnaj artyleryjaj, utvarajučy svojeasablivy žalezny trochkutnik suprać pavietranych pahroz. Heta dazvalaje vykarystoŭvać kompleks nie tolki dla abarony važnych abjektaŭ, ale i dla achovy miežaŭ, uźbiarežža i navat dla arhanizacyi hramadskaj biaśpieki ŭ haradach.

Pryncyp dziejańnia «Urahana 3000» vyhladaje tak: spačatku sistema vykarystoŭvaje radar, kab vyjavić i adsočvać ruchomyja celi. Potym uklučajucca elektraaptyčnyja datčyki, jakija zabiaśpiečvajuć dakładny vizualny zachop i dalejšaje supravadžeńnie. Paśla fiksacyi celi antennaja panel vypramieńvaje vysokamahutnyja mikrachvali, jakija imhnienna vyvodziać dron z ekspłuatacyi.

U artykule tłumačycca, što mikrachvalevaja zbroja adnosicca da technałohij «ćviordaha źniščeńnia»: jana fizična vyvodzić z ekspłuatacyi elektroniku bieśpiłotnika, u adroźnieńnie ad srodkaŭ «miakkaha ŭździejańnia», jakija tolki hłušać sihnał abo abmiažoŭvajuć kiravańnie. Pry hetym, kali łaziery zvyčajna pracujuć pa adnoj celi — kropkava, — mikrachvali nakryvajuć šyroki siektar, što robić takuju zbroju asabliva efiektyŭnaj suprać masavanych atak rajoŭ dronaŭ.

Akramia taho, u adroźnieńnie ad rakiet i harmat, takija sistemy majuć praktyčna nieabmiežavany bojezapas, vielmi nizki košt adnaho «strełu» i nanosiać minimalnyja pabočnyja paškodžańni.

Jak adznačaje aŭtar, «Urahan 3000» byŭ pradstaŭleny jašče na avijasałonie ŭ Čžuchai ŭ 2024 hodzie razam ź mienšaj viersijaj — «Urahan 2000». Małodšaja madel maje dalokaść 2 km i taksama pryznačanaja dla niejtralizacyi małych dronaŭ. Adnak «Urahan 3000» značna bolšy, bolš mahutny i ŭstalavany na hruzaviku: u im palepšanyja klučavyja pakazčyki, uklučajučy vyjaŭleńnie, supravadžeńnie, bajavuju aŭtanomnaść i aŭtamatyzacyju.

Pavodle infarmacyi South China Morning Post, u budučyni Norinco płanuje pašyryć funkcyjanał svaich sistem, kab jany mahli vykarystoŭvacca nie tolki suprać bieśpiłotnikaŭ, ale i dla błakavańnia infarmacyjnych suviaziaŭ praciŭnika, procidziejańnia pavietranaj elektronnaj raźviedcy, niejtralizacyi vysokadakładnaj zbroi i navat jak srodak nielatalnaha ŭździejańnia.

• 0
• 0
• 0
• 0
• 3
• 0
• 1
• 0