«Mnie nie patrebna mižnarodnaje prava — u mianie niama namieru pryčyniać ludziam škodu». Tramp patłumačyŭ, navošta jamu Hrenłandyja
Prezident ZŠA Donald Tramp pravioŭ čatyrochhadzinnaje intervju z čatyrma žurnalistami haziety New York Times, jakaja tradycyjna stavicca da jaho krytyčna.
Padčas razmovy jon znoŭ zrabiŭ šerah zajaŭ pa pytańniach źniešniaj i ŭnutranaj palityki, piša Bild.
Novy suśvietny paradak. Na pytańnie pra mahčymyja abmiežavańni jaho vajennaj, ekanamičnaj i palityčnaj ułady Tramp adkazaŭ:
«Tak, jość adna reč — maja ŭłasnaja maral. Maja ŭłasnaja hałava. Heta adzinaje, što moža mianie spynić. Mnie nie patrebna mižnarodnaje prava, u mianie niama namieru pryčyniać ludziam škodu».
Žurnalisty ŭdakładnili, ci aznačaje heta, što jaho administracyja nie abaviazana vykonvać mižnarodnyja zakony. Tramp adkazaŭ:
«Ja ich vykonvaju. Heta zaležyć ad taho, što vy razumiejecie pad mižnarodnym pravam».
NATA ci Hrenłandyja? Na pytańnie, što dla jaho važniej, Tramp nie daŭ pramoha adkazu, ale pryznaŭ, što heta «mahčyma, vybar abo—abo». Jon taksama zajaviŭ, što biez udziełu ZŠA NATA, na jaho dumku, u značnaj stupieni stračvaje sens.
Pra Jeŭropu:
«Ja byŭ vielmi łajalny ŭ adnosinach da Jeŭropy. Ja dobra spraviŭsia sa svajoj zadačaj. Kali b nie ja, Rasija ciapier kantralavała b usiu Ukrainu», — skazaŭ Tramp.
Čamu Trampu patrebna Hrenłandyja:
«Tamu što ja liču, što heta psichałahična nieabchodna dla pośpiechu. Ja dumaju, što vałodańnie daje mahčymaści, jakich nielha dasiahnuć z dapamohaj arendy abo damovy. Ułasnaść daje pieravahi, jakich nie atrymaješ, prosta padpisaŭšy dakumient».
Staŭleńnie da vybaraŭ:
Tramp zajaviŭ, što jon «zaŭsiody» pavažaje vyniki vybaraŭ, za vyklučeńniem vypadkaŭ, kali jany «sfalsifikavanyja» i «niesumlennyja».
Pra karupcyju:
Tramp skazaŭ, što nie bačyć prablemy ŭ tym, što členy jaho siamji viaduć biźnies za miažoj.
«Padčas majho pieršaha terminu ja zabaraniŭ im zajmacca biźniesam, i za heta ja nie atrymaŭ absalutna nijakaha pryznańnia», — adznačyŭ jon.
Honka štučnaha intelektu:
«Toj, chto vyjhraje vajnu ŭ śfiery štučnaha intelektu, budzie kiravać śvietam», — zajaviŭ Tramp. Jon taksama skazaŭ, što ŠI stvoryć «vializnuju kolkaść pracoŭnych miescaŭ», ale ludziej dla ich vykanańnia moža nie chapić, tamu «pryjdziecca zadziejničać robataŭ».
Ciapier čytajuć
Łukašenka niervova prakamientavaŭ vizit Cichanoŭskaj u Kijeŭ15
Kamientary