Ejfieleva vieža prypyniła pracu paśla prośby prybrać žančyn-supracoŭnic padčas vizitu relihijnaj arhanizacyi
Heta pryviało da skandału.
Supracoŭnicam Ejfielevaj viežy na vychodnych prapanavali syści z pola zroku pierad prychodam induisckaj relihijnaj delehacyi. Heta pryviało da skandału. Aburanyja nie tolki supracoŭniki pomnika, ale i palityki, piša Bi-bi-si.
U Francyi nichto nie moža kazać žančynam, kab jany stanavilisia niabačnymi, zajaviła staršynia Nacyjanalnaha schodu.
U subotu paryžskuju słavutaść naviedała hrupa kala 100 čałaviek, źviazanaja ź induisckaj arhanizacyjaj «Bačasanvasi Akšar Purušottam Svaminarajan Sanstcha» (BAPS).
«Kali delehacyja prachodziła mima, žančyn paprasili pakinuć svaje pracoŭnyja miescy, kab mužčyny zaniali ich miesca», — paviedamiła Reuters pradstaŭnica prafsajuza Dyjana Davuan.
«Na vychodnych napružanaść uzmacniłasia, tamu siońnia ranicaj supracoŭniki vyrašyli sabracca: pa-pieršaje, kab naładzić dyjałoh z kiraŭnictvam, a pa-druhoje, kab harantavać, što ŭ kampanii bolš nikoli tak nie buduć abychodzicca z žančynami», — skazała jana.
U paniadziełak pomnik byŭ zakryty. «Adkryćcio Ejfielevaj viežy adkładzienaje pa vytvorčych pryčynach», — paviedamlałasia ŭ abjavach unizie.
Supracoŭniki pravodzili schod z nahody incydentu, jaki nie tolki vyklikaŭ abureńnie piersanału, ale i staŭ pryčynaj krytyki z boku francuzskich palitykaŭ.
Davuan paviedamiła, što kiraŭnictva pryniesła supracoŭnikam prabačeńni, u toj čas jak mer Paryža Emanuel Hrehuar napisaŭ u X, što razumieje abureńnie supracoŭnikaŭ. Jon paabiacaŭ pravieści rasśledavańnie.
«Treba jak maha chutčej pralić śviatło na fakty, jakija pryviali da hetaj akcyi pratestu», — zajaviŭ mer.
Asacyjacyja BAPS, pradstaŭniki jakoj znachodzilisia ŭ Francyi ŭ suviazi z uračystaściami z nahody adkryćcia induisckaha chrama ŭ pryharadzie Paryža, zajaviła, što naviedvańnie Ejfielevaj viežy było arhanizavanaje ranicaj, kab vialikaja delehacyja nie pieraškadžała inšym naviedvalnikam.
«Nakolki nam viadoma, nikomu nie pieraškadžali naviedvać Ejfielevu viežu. Tym nie mienš my prynosim ščyryja prabačeńni za pryčynienyja niazručnaści, — havorycca ŭ zajavie. — My vierym va ŭniviersalnyja čałaviečyja kaštoŭnaści — uzajemnuju pavahu i słužeńnie ludziam».
Staršynia Nacyjanalnaha schodu Jael Braŭn-Pive napisała ŭ X: «Vitać inšych nikoli nie aznačaje admaŭlacca ad našych kaštoŭnaściaŭ. U Francyi žančyny ŭ poŭnaj miery ŭdzielničajuć u hramadskim žyćci. Nichto nie kaža im, kab jany stanavilisia niabačnymi».
Lidarka ŭltrapravaj palityčnaj partyi «Nacyjanalnaje abjadnańnie» Maryn Lo Pien zajaviła: «U Francyi my nikoli nie prymiem taho, kab prysutnaść žančyn była «abmiežavanaja»».
Kampanija SETE, jakaja kiruje Ejfielevaj viežaj, paćvierdziła, što delehacyja prasiła arhanizavać vizit takim čynam, kab źvieści da minimumu «kantakty z žančynami», paviedamlaje AFP.
Kampanija zajaviła ahienctvu, što «takija ŭmovy nie varta było prymać», pakolki jany «nie adpaviadali ni kaštoŭnaściam SETE, ni pryncypam roŭnaści pamiž mužčynami i žančynami».
«Heta, biezumoŭna, nieprymalnaja praktyka. Ja znoŭ paćviardžaju prychilnaść Ejfielevaj viežy respublikanskim kaštoŭnaściam i pryncypu roŭnaści mužčyn i žančyn», — zajaviŭ kiraŭnik SETE Aryel Viejl.
Na svaim sajcie BAPS charaktaryzuje siabie jak «duchoŭnuju supolnaść vałancioraŭ, jakaja imkniecca da palapšeńnia hramadstva» na asnovie induisckich kaštoŭnaściaŭ. Arhanizacyja adkryła vialikija chramy ŭ najbujniejšych haradach śvietu, u tym liku ŭ Łondanie, Łos-Andželesie i Sidnei.
Ciapier čytajuć
Julijana Šamietaviec z «Kibierpartyzanaŭ» stała maci — raskazvaje pra dekretny adpačynak u ZŠA i toje, ci sapraŭdy možna sumiaščać pracu z maciarynstvam1616
Kamientary