Pasoł Ukrainy paviedamiła pra patrabavańnie ZŠA nie nanosić udary pa naftavym terminale ŭ Novarasijsku
Pasoł Ukrainy ŭ ZŠA Volha Ściefanišyna zajaviła, što atrymała demarš ad United States Department of State paśla atak USU na naftavy terminał u Novarasijsku ŭ kancy 2025 hoda.
«My čuli, što ŭkrainskija ataki na Novarasijsk zakranuli častku amierykanskich inviestycyj, jakija ažyćciaŭlajucca praz Kazachstan. I my pačuli ad Dziarždepartamienta, što nam varta ŭstrymlivacca ad, nu, vy viedajecie, ad napadaŭ na amierykanskija intaresy», — skazała Ściefanišyna na bryfinhu.
Pavodle jaje słoŭ, u nocie Dziarždepartamienta taksama adznačałasia, što ZŠA ŭ ciapierašni čas nie majuć takich ekanamičnych intaresaŭ va Ukrainie, jak u Kazachstanie. Pry hetym Vašynhton nie prapanoŭvaŭ ustrymlivacca ad atak na inšuju rasijskuju enierhietyčnuju infrastrukturu, padkreśliła ŭkrainski pasoł.
Jana dadała, što Kijeŭ «pryniaŭ heta da viedama».
Marski terminał Kaśpijskaha trubapravodnaha kansorcyuma pad Novarasijskam trapiŭ pad ataku ŭkrainskich bieśpiłotnikaŭ u listapadzie minułaha hoda. Paškodžańni atrymała vynasnaja pryčalnaja pryłada (VPU-2), adnak abyšłosia biez uciečki nafty ŭ akvatoryju Čornaha mora. Pahruzka była prypynienaja, a tankiery adviedzienyja za miežy akvatoryi KTK. Paśla ataki ekspart nafty byŭ terminova pieranakiravany na alternatyŭnyja maršruty.
Kamientary