U Niaśvižy źbirajucca rekanstrujavać Ratušnuju płošču. Jość čatyry varyjanty, jak heta zrabić
U histaryčnym centry Niaśviža płanujecca maštabnaja rekanstrukcyja Ratušnaj płoščy. Na konkurs architekturnych prajektaŭ padadziena čatyry varyjanty, i zaraz idzie hałasavańnie za najlepšuju prapanovu, paviedamlaje vydańnie «Niaśvižskija naviny».
Svaje prapanovy padali arhanizacyi i pryvatnyja pradprymalniki. Kožny varyjant robić akcent na funkcyjanalnaści płoščy i jaje pryvabnaści dla turystaŭ i žycharoŭ.
Rekanstrukcyja budzie pravodzicca ŭ miežach vulic Čkałava, Biełaruskaj i Čapajeva (vulicy Savieckaj). Asnoŭnaja ŭmova — adnaŭleńnie histaryčnych paramietraŭ płoščy i jaje źniešniaha vyhladu. Pry hetym jana pavinna zastacca zručnaj dla vykarystańnia: nieabchodna praduhledzieć piešachodnyja zony, miescy dla parkoŭki, arhanizacyju transpartu, novaje azielanieńnie i małuju architekturu. Taksama ŭ prajekcie zapłanavana budaŭnictva sceničnaj placoŭki i častkovaje pieraabstalavańnie najaŭnych handlovych radoŭ. Usie prapanovy pavinny ŭličvać strohija patrabavańni achoŭnych zon i adaptacyju fasadaŭ sučasnych budynkaŭ pad histaryčnuju zabudovu.
Adzin z udzielnikaŭ konkursu, kampanija «ViaSETrejd», prapanuje viarnuć płoščy piešachodny status i vyzvalić jaje ad tranzitnaha transpartu. U ramkach hetaha varyjantu asfaltavaje pakryćcio zamianiajecca na bruk, jaki pavinien abjadnać roznyja zony prastory i zrabić jaje bolš harmaničnaj. Taksama prapanujecca vysadzić kala 80 dreŭ pa pierymietry, u tym liku ŭstojlivyja parody, kab zamianić staryja nasadžeńni, jakija stracili žyćciazdolnaść.
Jašče adna kancepcyja, stvoranaja indyvidualnym pradprymalnikam Alaksandram Trusavym, nakiravanaja na adnaŭleńnie histaryčnaj formy płoščy, jakaja ź ciaham času źmianiłasia z-za paźniejšaj zabudovy. Dla hetaha prapanujecca vykarystańnie časovych architekturnych elemientaŭ, kab adnavić pieršapačatkovyja miežy.
Taksama razhladajecca ideja adkryć vid na kaścioł Božaha Cieła, prybraŭšy kanstrukcyi, jakija pieraškadžajuć ahladu histaryčnaj daminanty. Heta pavinna padkreślić architekturny ansambl i suviaź roznych epoch.
Inšy prajekt, stvorany Tvorčaj majsterniaj architektara Juryja Samojlika, prapanuje źmianić architekturnaje asiarodździe vakoł ratušy, kab sfarmiravać adziny ansambl budynkaŭ. Pradstaŭlenaja ideja imitacyi fasadaŭ u siaredniaviečnym styli, kab vizualna abjadnać razroźnienyja budynki ŭ adzinaje stylistyčnaje rašeńnie.
Akramia taho, prapanujecca stvaryć letni amfiteatr z paŭdniovaha boku płoščy, što mahło b stać šturškom dla raźvićcia kulturnaha žyćcia horada.
Urešcie, instytut «Minskhramadzianprajekt» prapanuje vykarystać kancepcyju teatra jak asnoŭny pryncyp arhanizacyi prastory. U hetaj madeli elemienty azielanieńnia, art-abjekty i małyja formy pavinny nie tolki ŭparadkoŭvać terytoryju, ale i stvarać roznyja scenaryi ŭsprymańnia płoščy, farmiravać hłybiniu prastory i padkreślivać jaje maštab.
U Minsku raskazali, jakoj budzie byłaja Vaładarka paśla rekanstrukcyi FOTY
Pałac Tyškievičaŭ u Vałožynie stanie muziejem
Stała viadoma, navošta na fasad adnaho z histaryčnych budynkaŭ u Minsku padčas rekanstrukcyi pastavili mietaličnyja kałony
U Minsku abjavili pra płany stvaryć skvier na byłych katalickich mohiłkach. Ale tam užo daŭno idzie budaŭnictva
U cichi kvartał u centry Minska pryduć pieramieny. Tam budzie vializny skvier, centr sučasnaha mastactva i parkinh
Ciapier čytajuć
«Hałandski architektar», jaki adbudavaŭ Vostruju bramu i pastaviŭ sabie dom-krepaść u Hajciuniškach, akazaŭsia nijakim nie hałandcam. Ale jaho spadčyna zachaplaje1010
Kamientary
... i pierad vačyma "pamiatnyj znak na miestie piervoj minskoj elektrostancii" (