Ale pieršy pakupnik adviedaŭ kniharniu jašče ŭčora.
U Centry biełaruskaj salidarnaści ŭ Varšavie siońnia adkryjecca knižnaja krama fondu «Kamunikat». Aficyjnaje adkryćcio kramy adbudziecca siońnia a 17:00 pa adrasie Oleandrów 6/2.
Siarod knih, jakija nieŭzabavie možna budzie nabyć u CBS — «Imiony Svabody» Uładzimira Arłova, «Zekamieron» Maksima Znaka, «Likvidacyja» Vasila Bykava dy inš.
U cyrymonii adkryćcia voźmuć udzieł Jarasłaŭ Ivaniuk, piśmieńnik Uładzimir Arłoŭ, a taksama pradstaŭniki inšych biełaruskich vydaviectvaŭ.
«Pieršy pakupnik naviedaŭ kniharniu Kamunikat.shop u Centry biełaruskaj salidarnaści ŭžo ŭčora! Vialiki Vam dziakuj, šanoŭny Alaksandr Fiaduta!!! Usich zaprašajem siońnia na 17:00 na Adkryćcio prastory Kamunikat shop u Centry Biełaruskaj Salidarnaści ŭ Varšavie», — napisaŭ Jarasłaŭ Ivaniuk u svaim fejsbuku.
Alaksandr Fiaduta trymaje ŭ rukach tom, pryśviečany Kastusiu Jezavitavu (1898—1946).
Jezavitaŭ byŭ adnym z padpisantaŭ abviaščeńnia niezaležnaści BNR 25 sakavika 1918 hoda, kamiendantam Mienska, zavadataram biełaruskaha žyćcia ŭ Łatvii ŭ 1920-1930-ja, stvaralnikam biełaruskich škoł u Łathalii, uznačalvaŭ Hałoŭnaje ŭpraŭleńnie vajskovych škoł pry Biełaruskaj Centralnaj Radzie. Jak jon pisaŭ u svaich listach, pracavaŭ pa 18‑19 hadzin u sutki, a pisaŭ listy kaleham ci ŭ ciahnikach, ci trasučysia na padvodach.
Paśla apieracyi pa vydaleńni hryžy ŭ krasaviku 1945 hoda ŭ vakolicach Bierlina Jezavitaŭ byŭ vykradzieny savieckim ahientam i pieradadzieny NKVD. Spačatku jaho vyvieźli ŭ Maskvu, a potym pa prośbie Canavy pieraviali ŭ minskuju «amierykanku».
Tom, vydadzieny «Kamunikatam», źmiaščaje padrabiaznuju bijahrafiju Jezavitava, jaho listavańnie, artykuły, dziońnik 1944‑1945 hadoŭ, ułasnaručnyja padrabiaznyja pakazańni, dadzienyja ŭ «amierykancy».
Fond «Kamunikat» byŭ zasnavany 26 hadoŭ tamu. Spačatku heta była internet-biblijateka. Jarasłaŭ Ivaniuk skanavaŭ biełaruskija knihi, haziety i časopisy i vykładaŭ heta ŭ internet.
Paśla padziej 2020 hoda Jarasłaŭ staŭ vydavać biełaruskija knihi, za piać hadoŭ byli vydadzienyja niekalki dziasiatkaŭ knih, a taksama jeździć pa asiarodkach novaj biełaruskaj emihracyi z prezientacyjami. Tak na minułym tydni jon i paetka Nasta Kudasava adpravilisia ŭ litaraturny tur u Biełastok, Vilniu, Ryhu i Talin.
Kamientary