Parad Pieramohi ŭ Maskvie ŭpieršyniu za dva dziesiacihodździ projdzie biez vajskovaj techniki
Imavierna, rašeńnie było pryniata z-za novych ukrainskich rakiet, zdolnych dasiahnuć Maskvy za 10—30 chvilin.
9 maja parad Pieramohi na Čyrvonaj płoščy ŭ Maskvie projdzie biez vajskovaj techniki, paviedamili ŭ Ministerstvie abarony RF.
«Čamu nie budzie techniki. Pryčyna — apieratyŭnaja abstanoŭka», — zajavili ŭ Ministerstvie abarony. U viedamstvie nie rastłumačyli, što majecca na ŭvazie pad hetaj farmuloŭkaj.
Pry hetym u viedamstvie padkreślili, što ŭ paradzie budzie ŭdzielničać avijacyja. Taksama projduć piešyja kałony vajskoŭcaŭ. Akramia taho, padčas tranślacyi parada pakažuć pracu ŭsich vidaŭ vojskaŭ, u tym liku tych, što ŭdzielničajuć u vajnie suprać Ukrainy.
Apošni raz parad biez vajskovaj techniki na Krasnaj płoščy prachodziŭ u 2007 hodzie.
Raniej rasijskija niezaležnyja ŚMI paviedamlali, što parad projdzie biez techniki. U paniadziełak pra heta napisali ekśpiertka centra Carnegie Alaksandra Prakapienka i palitołah Kaciaryna Šulman. Jany taksama śćviardžali, što mierapryjemstva budzie doŭžycca kala 40 chvilin, i na jaho zaprosiać tolki niekalki sotniaŭ haściej.
Adnym ź pieršych pra mahčymuju admienu paradu napisaŭ u pačatku krasavika rasijski Z-błohier Illa Tumanaŭ
«Ujaŭlajecie, «parad, raŭniajsia, zvažaj» — i abjaŭlajecca rakietnaja niebiaśpieka. Što budzie adbyvacca na płoščy i vakoł jaje? Heta budzie značny ŭdar u miedyjnym płanie, navat kali ničoha nie dasiahnie», — razvažaje Tumanaŭ.
U apošnija miesiacy Ukraina paviedamlała pra źjaŭleńnie abo raspracoŭku dalnabojnych rakiet.
Kryłataja rakieta «Fłaminha» była pradstaŭlena ŭ žniŭni minułaha hoda. Jaje zajaŭlenaja dalnaść — 3000 km (da Maskvy ad ukrainskaj miažy tolki 450 km), vaha bajavoj hałoŭki — adna tona.
Z pačatkam vajny parady ŭ Maskvie značna skaracilisia.
U 2022 hodzie techniki było mienš (u paraŭnańni z 2021-m), a pavietranuju častku admianili. U 2023‑m kolkaść vajskoŭcaŭ skaraciłasia jašče na čverć, źnikli tanki (akramia troch T-34 časoŭ Druhoj suśvietnaj vajny), avijacyi znoŭ nie było. U 2024‑m samaloty źjavilisia, ale ŭsiaho 15 adzinak.
Jubilejny parad 2025 hoda byŭ maštabniejšy, ale sastupaŭ davajennamu (2021) u kolkaści ludziej i techniki. Samalotaŭ znoŭ było 15.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary
Ź nieciarpieńniem budu čakać taho samaha momanta, jakoha tak usie čakajuć (ťfu-ťfu, štob nie zhłazić). Udačy vam, arnitołahi!