Siłaviki zapuścili čat-bot dla danosaŭ. Ciapier bondaraviec Juspa staŭ častym hościem na milicejskich hutarkach
Instrumienty dla ananimnych skarhaŭ, stvoranyja siłavymi strukturami, niečakana ŭdaryli pa samych addanych adeptach «ruskaha śvietu». Prarasijski aktyvist sutyknuŭsia ź sistematyčnymi vyklikami na dopyty praz ułasnyja videaroliki.
Michaił Juspa, navukovy supracoŭnik Respublikanskaha instytuta vyšejšaj škoły i paplečnik Volhi Bondaravaj, staŭ sumna viadomym u apošnija hady, zmahajučysia ź lubymi prajavami biełaruskaści ŭ Biełarusi. Śfiera jaho intaresaŭ achoplivaje pošuk kramoły na etykietkach, vyvieskach i ŭ vopratcy minakoŭ. Ale nie doŭha jon ciešyŭsia.
U pačatku krasavika adbyŭsia pjeršy vizit aktyvista da siłavikoŭ u niazvykłym dla jaho statusie. 7 krasavika Michaiłu Juspu patelefanavali z HUBAZiKa. Nastupnym dniom padčas asabistaj sustrečy vyśvietliłasia, što na jaho napisali zajavu z abvinavačvańniem u pracy na raskoł Sajuznaj dziaržavy. Tady ŭ HUBAZiKu paćvierdzili svajmu idejna blizkamu vizavi adsutnaść prykmiet «raspalvańnia varožaści», i hutarka skončyłasia mirna.
Situacyja paŭtaryłasia praź miesiac. 12 maja aktyvistu patelefanavali z RAUS. Milicyjanier paviedamiŭ, što žychar Homiela skinuŭ u čat-bot MUS zajavu na jaho videa ŭ TikTok. Sam Juspa miarkuje, što nahodaj staŭ rolik, apublikavany im 6 maja.
U tym videa jon aburaŭsia abviaščeńniem prypynkaŭ u minskim mietro pa-biełarusku i pa-anhlijsku, biez daj pryčyny zajaŭlajučy, što pieršaja dziaržaŭnaja mova ŭ krainie — ruskaja.
Skarhi Juspy na moŭnuju palityku ŭ mietro vyklikali žorstkuju reakcyju navat z boku aficyjnaj prapahandy. 14 maja telehram-kanał siłavikoŭ «Žoŭtyja źlivy» pryśviaciŭ aktyvistu dopis, abvinavaciŭšy jaho ŭ razhojdvańni situacyi i tym, što jon lje vadu na młyn vorahaŭ-bečebešnikaŭ. Siłaviki pracytavali 17‑y artykuł Kanstytucyi ab roŭnaści dźviuch dziaržaŭnych moŭ i paraili spynić pošuki ŭščamleńnia ruskaj movy, dadaŭšy, što moŭnaje pytańnie ŭ Biełarusi vyrašana raz i nazaŭždy.
Juryst i papularyzatar biełaruskaj movy Ihar Słučak pierapościŭ skrynšot naviny pra vykliki Juspy ŭ milicyju, iranična namiaknuŭšy na svaju datyčnaść da prablem, jakija ŭźnikli ŭ prarasijskaha aktyvista: «I vy viedajecie, chto hety bot».
Paźniej aktyvist paviedamiŭ, što pa hetaj skarzie jaho znoŭ vyklikali ŭ RUUS, pryčym milicyja pieraviała raźbiralnictva ŭ ramkach Pracesualna-vykanaŭčaha kodeksa ab administracyjnych pravaparušeńniach (PVKaAP).
Palaŭničy na ŭsialakuju biełaruščynu, Juspa, sam apynuŭšysia pad prycełam pravaachoŭnych orhanaŭ, raskrytykavaŭ vybudavanuju sistemu ananimnych zvarotaŭ. U svaim telehram-kanale jon zaznačyŭ, što pryciahnuć padobnych hramadzian da adkaznaści za łžyvy danos niemahčyma, bo farmalna jany nie pišuć zajavu, a prosta skidvajuć svaju tvorčaść u bot MUS abo luboj inšaj struktury. Supracoŭnik pravaachoŭnych orhanaŭ pry hetym abaviazany hety sihnał razhledzieć i razabracca.
Prarasijski aktyvist paraŭnaŭ takuju praktyku ź virtualnaj DDoS-atakaj. Pavodle jaho acenki, pry praviadzieńni mierapryjemstvaŭ pa destabilizacyi dziaržavy varožaja siła zavalvaje boty siłavych struktur tonami danosaŭ. Heta adciahvaje pravaachoŭnikaŭ na pravierki pa prydumanych złačynstvach i raspylaje resursy dziaržaŭnaha aparata.
Juspa paskardziŭsia, što ŭ vyniku stvarajecca sistema, u ramkach jakoj u dačynieńni da luboha biełaruskaha hramadzianina moža być praviedziena biespakaranaja apieracyja pa dyskredytacyi.
«Naša Niva» — bastyjon biełaruščyny
PADTRYMAĆCiapier čytajuć
U Kaściukovičach praź biržu pracy šukajuć namieśnika staršyni rajvykankama — apošni kandydat nie prajšoŭ pravierki2
Kamientary