Što stała viadoma pra spravu Anžaliki Mielnikavaj za hod paśla jaje źniknieńnia

Ab tym, što tahačasnaja śpikierka Kaardynacyjnaj rady Anžalika Mielnikava pierastała vychodzić na suviaź, publična stała viadoma 28 sakavika 2028 hodu. Infarmacyju pra heta ahučyŭ kiraŭnik Narodnaha antykryzisnaha ŭpraŭleńnia Pavał Łatuška, u čyju kamandu Mielnikava ŭvachodziła praciahły čas. Paplečniki zaŭvažyli źniknieńnie Anžaliki na try dni raniej — 25 sakavika. Paŭzu ŭ try dni paźniej tłumačyli prośbaj polskaj palicyi nie śpiašacca z ahałošvańniem hetych źviestak.

Bolšaść paplečnikaŭ Anžaliki Mielnikavaj u Kaardynacyjnaj radzie daviedalisia ab jaje źniknieńni ź miedyja. Ź ich słovaŭ, uvačavidki ŭ Varšavie bačyli śpikierku apošni raz u kancy lutaha. Paśla jana była dasiažnaja tolki dystancyjna, praz mesendžary, svaju adsutnaść na sustrečach tłumačyła chvarobaj. Adzin z apošnich sazvonaŭ z kalehami ŭ Anžaliki Mielnikavaj byŭ 21 sakavika.

«Ja joj pisaŭ u mesendžary. Supakoiła, što ŭsio vyrašyć»

«Ja byŭ, padobna, apošnim, chto ź joju razmaŭlaŭ, — raskazvaje ŭ razmovie z Svabodaj apieratar Andrej (imia surazmoŭcy źmienienaje dziela biaśpieki. — RS). — U kancy sakavika napisaŭ joj pytańnie ab apłacie zdymak. Jana adkazała, što ŭsio ŭ paradku. Što jana rychtuje papiery i chutka ja atrymaju apłatu. A praź niekalki dzion my daviedalisia, što Anžalika źnikła».

Andrej supracoŭničaŭ z Anžalikaj Mielnikavaj, Paŭłam Łatuškam i šeraham inšych biełaruskich palitykaŭ u Varšavie. Jon raskazvaje, što jaho pracu dla Mielnikavaj nielha nazvać rehularnaj, adnak niekalki videa ź jaje ŭdziełam jon źniaŭ. Apłata była aficyjnaja, z padpisańniem damovy, nijakich kapertaŭ. Raźličvałasia Anžalika zvyčajna ŭ abaznačany termin.

«A tut havaryła, što rychtuje pieravod, što ŭsio budzie dobra, što chvareje, — uzhadvaje svaju apošniuju razmovu sa źnikłaj śpikierkaj Andrej. — Ja joj pisaŭ u mesendžary. Supakoiła, što ŭsio vyrašyć. Nakolki ja viedaju, nas takich sabrałasia tady niekalki. My čakali apłaty ad jaje, peryjadyčna pytalisia pra heta».

U toj čas, kali Andrej pierapisvaŭsia z Anžalikaj Mielnikavaj u pytańniach apłaty vykananaj pracy, jaje ŭžo nie było na terytoryi Jeŭraźviazu.

Pra heta na pačatku krasavika paviedamiŭ Pavał Łatuška sa spasyłkaj na źviestki polskaj palicyi. Pavodle ich, śpikierka Kaardynacyjnaj rady vylecieła z Varšavy ŭ Łondan 26 lutaha 2025 hodu i bolš na terytoryju Jeŭraźviazu nie viartałasia.

Hrošy za vykananuju pracu apieratar tak i nie atrymaŭ. Sa słovaŭ Andreja, jon viedaje jašče prynamsi čatyroch čałaviek, ź jakimi nie raźličylisia praź źniknieńnie Anžaliki Mielnikavaj. U realnaści ich moža być značna bolš.

«Prakuror nie zhadžajecca na padaču infarmacyi»

Spravu ab źniknieńni Anžaliki Mielnikavaj, jakaja da lutaha 2025 hodu ŭžo paśpieła atrymać polskaje hramadzianstva, z varšaŭskaj palicyi chutka pieradali ŭ Nacyjanalnuju prakuraturu Polščy, rasśledavańniem pačało zajmacca jaje Lublinskaje adździaleńnie. Jak raskazvali tady Svabodzie polskija ekśpierty, pieradača rasśledavańnia ŭ rehijanalny filijał prakuratury — zvyčajnaja praktyka dla Polščy, vyklikanaja zaniataściu viedamstva. A sam fakt pieradačy spravy ŭ Nacyjanalnuju prakuraturu śviedčyŭ ab vysokim uzroŭni ŭvahi, jakuju polskija ŭłady nadali źniknieńniu biełaruskaj. Adnak za hod rasśledavańnia amal nijakaj aficyjnaj infarmacyi ab jaho chodzie ad polskich pravaachoŭnych orhanaŭ bolš nie pastupała.

«Niahledziačy na toje, što ja inicyjavaŭ padaču zajavy ab fakcie źniknieńnia Anžaliki Mielnikavaj u kamiendaturu staličnaj palicyi ŭ Varšavie, ni ja, ni naša kamanda nie źjaŭlajecca bokam u hetym śledstvie, — havoryć u kamientary dla Svabody Pavał Łatuška.

— Tamu ŭ nas abmiežavanyja mahčymaści atrymlivać infarmacyju ab chodzie śledčych dziejańniaŭ. Razam z tym ja źviartaŭsia ŭ Nacyjanalnuju prakuraturu Polščy z prośbaj ab padačy infarmacyi i na minułym tydni znoŭ nakiravaŭ zapyt prakuroru. Z dastupnych mnie źviestak, u hety momant miesca znachodžańnia Anžaliki Mielnikavaj nia vyznačana. Heta, biezumoŭna, nie moža pakidać nas, jaje kalehaŭ, abyjakavymi ŭ hetaj sytuacyi».

Na zapyt Svabody, nakiravany ŭ Lublinskaje adździaleńnie polskaj prakuratury, adkazali, što śledstva praciahvajecca, adnak rašeńnie ab ahałošvańni niejkich źviestak pra jaho chod moža być pryniata tolki ŭ Nacyjanalnaj prakuratury. Tam praź niekalki dzion paŭzy paviedamili, što źviestki ab rasśledavańni spravy Anžaliki Mielnikavaj ahałošanyja pakul być nie mohuć.

«U intaresach rasśledavańnia i pryniatych kirunkaŭ rasśledavańnia prakuror, jaki viadzie spravu, nie zhadžajecca na padaču infarmacyi ab biahučych vynikach spravy», — painfarmavała Svabodu pradstaŭnička Nacyjanalnaj prakuratury Polščy Katažyna Caluŭ-Jašeŭskaja.

U kancy viasny i letam 2025 hodu źjaviłasia niekalki nieaficyjnych viersij źniknieńnia Anžaliki Mielnikavaj. Ad vykradańnia biełaruskimi śpiecsłužbami da śviadomaha adjezdu z Varšavy razam ź dziećmi praz raman ź dziejnym supracoŭnikam KDB Biełarusi. Nivodnaja z ahučanych žurnalistami abo byłymi supracoŭnikami śpiecsłužbaŭ viersijaŭ pakul nie atrymała dakładnaha paćvierdžańnia.

«Za hety pieryjad nam prychodziła roznaha charaktaru infarmacyja, — praciahvaje Pavał Łatuška. — I ahulnaviadomaja ŭ ŚMI ab tym, što nibyta ŭ dačynieńni da jaje śpiecsłužby prymianili tak zvanuju «miadovuju pastku», i ab mahčymaj likvidacyi ŭ suviazi z tym, što joj była pastaŭlena zadača, jakaja mahła stvaryć pahrozu žyćciu i zdaroŭju kaleham u Narodnym antykryzisnym upraŭleńni. I pra toje, što nibyta jaje niechta bačyŭ u Biełarusi. Ni adna ź viersij nie źjaŭlajecca kančatkovaj. Najbolšy abjom infarmacyi, mahčyma, majuć polskija śpiecsłužby, nu i, možam mierkavać, i biełaruskija śpiecsłužby».

Akramia polskich śpiecsłužbaŭ i biełaruskich žurnalistaŭ, rasśledavańniem spravy ab źniknieńni Anžaliki Mielnikavaj viasnoj 2025 hodu zanialisia taksama pradstaŭniki supołki «Kibierpartyzany». Śpikierka Kaardynacyjnaj rady pa sumiaščeńni zajmałasia administravańniem fondu Białoruś Liberty, praź jaki častkova finansavalisia vydatki «Kibierpartyzanaŭ» i Kaardynacyjnaj rady.

U siaredzinie traŭnia pradstaŭniki supołki paviedamili, što zmahli adnavić kantrol nad rachunkami fondu, adkul źnikli 150 tysiač dalaraŭ. Kala 30 tysiač ź ich byli pryznačanyja na dziejnaść źviazanych z «Kibierpartyzanami» inicyjatyŭ. Reštu płanavałasia patracić na patreby Kaardynacyjnaj rady.

Pavodle abnarodavanaj u traŭni 2025 hodu infarmacyi, usie srodki z rachunku fondu Białoruś Liberty byli vyviedzienyja, apošniaja transakcyja adbyłasia 24 sakavika 2025 hodu. Rasśledavańnie «Kibierpartyzanaŭ» praciahvajecca.

20 lutaha 2026 hodu pradstaŭnica arhanizacyi Juljana Šamietaviec u razmovie z Svabodaj paviedamiła, što 24 sakavika 2025 hodu apošnija prykładna 150 tysiač złotych Anžalika Mielnikava (abo niechta inšy z dostupam da rachunku fondu Białoruś Liberty) pieraviała z rachunku ŭ polskim banku na rachunak litoŭskaj kryptabiržy UAB Onlychain Fintech Limited.

Heta adnosna nievialikaja litoŭskaja fintech-kampanija z 12 supracoŭnikami, zarehistravanaja ŭ śniežni 2021 hodu. Svaboda nakiravała na adras UAB Onlychain Fintech Limited zapyt ab dalejšym losie pieraviedzienych tudy Anžalikaj Mielnikavaj srodkaŭ. Adkazu na momant publikacyi žurnalisty nie atrymali.

«Zvyčajnyja hrošy z rachunku ŭ banku Jeŭraźviazu mohuć pieravodzicca ŭ kryptavalutu dla taho, kab zručna i chutka skarystacca imi ŭ kožnym miescy śvietu, u tym liku ŭ Biełarusi, — tłumačyć na ŭmovach ananimnaści ŭ razmovie z Svabodaj supracoŭnik biełaruskaj IT-kampanii, jaki sam karystajecca pasłuhami biržaŭ kryptavalut. — Litoŭskaja, bo polski bank ničoha nie zapadozryć. Usio adbyvajecca niby ŭnutry terytoryi Jeŭraźviazu. A paśla z hetymi hrašyma možna rabić što zaŭhodna, kali dziejničać razumna. Viadoma, jeŭrapiejskija śpiecsłužby mohuć adsačyć, kudy pajšli hrošy, dzie ich zdymali. Ale nie bolš».

Nieŭzabavie paśla źniknieńnia Anžaliki Mielnikavaj polskaja hazieta Rzeczpospolita apublikavała materyjał, dzie zhadvaŭsia jašče adzin fakt, źviazany ź dziejnaściu byłoj śpikierki Kaardynacyjnaj rady. Pavodle infarmacyi vydańnia, u 2023 hodzie fond na čale ź Mielnikavaj Białoruś Liberty atrymaŭ ad zarehistravanaj u Vialikaj Brytanii kampanii Media Consulting Services Ltd. 405 tysiač złotych (kala 100 tysiač jeŭra. — RS).

«Mnie budzie ciažka pavieryć u toje, što jana ahientka»

Jašče adnym čałaviekam, jaki aktyŭna ŭklučyŭsia ŭ pošuki Anžaliki Mielnikavaj u pieršyja dni paśla jaje źniknieńnia, byŭ suzasnavalnik fondaŭ BySol i By_help Alaksiej Lavončyk, jaki stała žyvie ŭ Łondanie. Alaksiej źviarnuŭsia z zajavaj ab źniknieńni Mielnikavaj u brytanskuju palicyju (nahodaj dla hetaha staŭ jaje pieralot z Varšavy ŭ Łondan) i abviaściŭ zbor 10 tysiač jeŭra, jakija abiacaŭ vypłacić tamu, chto padzielicca infarmacyjaj ab losie źnikłaj śpikierki Kaardynacyjnaj rady. Brytanskaja palicyja nieŭzabavie adkazała, što zajmacca spravaj źniknieńnia biełaruski z polskim hramadzianstvam nie budzie. A voś achvotnyja atrymać hrašovuju ŭznaharodu znajšlisia davoli chutka. Praŭda, amal adrazu vyśvietliłasia, što nijakaj dakładnaj infarmacyi pra źniknieńnie Mielnikavaj i aktualnaje miesca jaje znachodžańnia jany nie majuć.

«Novaj infarmacyja nijakaj niama, — kaža ŭ razmovie z Svabodaj Alaksiej Lavončyk pra toje, što sam viedaje ab losie Mielnikavaj praz hod paśla jaje adjezdu z Varšavy. — Toje, što my viedali, tak jano i zastałosia. Tyja, chto mnie pisaŭ, što maje videa ź Mielnikavaj, źniataje ŭ Biełarusi, u vyniku vysłali mnie kavałak praciahłaściu 4 siakundy. Ja adkazaŭ im, što veryfikavać pavodle jaho ničoha niemahčyma. Paprasiŭ poŭnaje videa. Ale ničoha nie atrymaŭ, i tyja ludzi źnikli».

Sa słovaŭ Alaksieja, tyja ž ludzi ŭ pierapiscy abiacali apublikavać videa z Anžalikaj Mielnikavaj, źniataje ŭ Biełarusi. Ale hetaha ŭ vyniku tak i nie adbyłosia.

«10 tysiač usio jašče lažać, — kaža Alaksiej. — Ale nieŭzabavie ŭ nas budzie punkt pryniaćcia rašeńnia, my musim vyrašyć, ci puskać hetyja hrošy na padtrymku palitviaźniaŭ. Ja schilajusia da takoha varyjantu, nielha tak doŭha trymać hetyja hrošy».

Niahledziačy na ŭsio toje, što stała viadoma pra spravy Anžaliki Mielnikavaj za hod paśla jaje źniknieńnia, Pavał Łatuška nie schilny rabić adnaznačnych vysnovaŭ. Jon źviartaje ŭvahu na toje, što Mielnikava padčas pracy ŭ Kaardynacyjnaj radzie zaŭsiody zajmała vyraznuju i adnaznačnuju pazicyju ŭ dačynieńni da palityki Alaksandra Łukašenki. I heta dziakujučy jaje dziejańniam u studzieni 2025 hodu było pryniataje rašeńnie Sienatu Polščy ab pryznańni Kaardynacyjnaj rady ŭ jakaści biełaruskaha parłamientu na emihracyi.

Pavał Łatuška dadaje, što Anžalika Mielnikava, zajmajučy pasadu śpikierski Kaardynacyjnaj rady, brała na siabie častku vydatkaŭ na jaje dziejnaść, a ŭ studzieni 2025 hodu vystupała na sesii Parłamienckaj asamblei Rady Jeŭropy, dzie padtrymała pryniaćcio rezalucyi PARE ab niepryznańni Łukašenki ŭ jakaści prezidenta ŭ vyniku vybaraŭ 2025 hodu, što možna ličyć mocnymi ŭdarami pa dziaržaŭnaj sistemie Biełarusi.

«Z ulikam taho, što Anžalika Mielnikava ŭznačalvała fundacyju «Kibierpartyzanaŭ», ja pierakanany, što jana prajšła adpaviednuju pravierku hetaj arhanizacyi, jakaja karystajecca vialikim aŭtarytetam, — havoryć Pavał Łatuška. — Adnačasova jana była hramadziankaj Polščy i taksama prajšła pravierku ŭsich adpaviednych śpiecsłužbaŭ.

Navat kali nam pakažuć u bližejšy čas Anžaliku Mielnikavu žyvoj i zdarovaj i jana zrobić peŭnuju zajavu, mnie budzie składana pavieryć u toje, što heta była hłyboka zakanśpiravanaja, ukaranionaja ŭ struktury demakratyčnych siłaŭ Biełarusi ahientka. Nielha vyklučać, što jaje mahli schilać da supracy ŭ apošnija miesiacy pierad źniknieńniem. Zanadta šmat škody mienavita jaje dziejnaść naniesła režymu Biełarusi, u tym liku i Rasiei».

• 0
• 0
• 0
• 2
• 0
• 1
• 1
• 0