Što ź joj płanujuć zrabić?
U Italii pradali viłu Musalini za 1,2 miljona jeŭra.
Viła, pabudavanaja ŭ 1890 hodzie na nabiarežnaj horada Ryčonie ŭ pravincyi Rymini — heta budynak u typovym styli kurortnych damoŭ na italjanskim uźbiarežžy Adryjatyki. U 1934 hodzie jana stała letniaj rezidencyjaj Bienita Musalini. Ciapier jaje vykupiŭ horad, piša Bild.
Municypalitet Ryčonie vypłaciŭ za viłu 1,2 miljona jeŭra. «Hety abjekt, simvał identyčnaści kurortnaha horada i važnaja častka pamiaci pra XX stahodździe, ciapier kančatkova piarojdzie va ŭłasnaść hramadzian Ryčonie», — havorycca ŭ zajavie municypaliteta.
Mer Danieła Andželini nazvała kuplu «rašeńniem z dalnabačnaj pierśpiektyvaj». Vierahodna, jana chacieła b taksama praduchilić kuplu viły ludźmi, jakija nastalhujuć pa Musalini. U Italii dahetul isnuje mnostva prychilnikaŭ dyktatara, u tym liku ŭ kirujučaj partyi «Braty Italii» premjer-ministra Džordžy Miełoni. «Ryčonie nie vyciaśniaje svajo składanaje minułaje, a krytyčna asensoŭvaje jaho praz kulturu», — padkreślivaje Andželini.
U apošnija hady viła ŭžo vykarystoŭvałasia municypalitetam jak kulturny i vystavačny centr. Pavodle słoŭ kiraŭnika departamienta kultury Sandry Viły, tam raniej pravodzilisia fotavystavy. U dalejšym tam płanujecca raźmiaścić histaryčnyja archivy. Nazvu «Viła Musalini», jakaja ŭžo zamacavałasia za hetym domam, municypalitet maje namier zachavać.
Lidar italjanskich fašystaŭ Bienita Musalini pryjšoŭ da ŭłady ŭ Italii ŭ 1922 hodzie. U vyniku jaho kałanijalnych vojnaŭ, jakija jon vioŭ u sajuzie z Adolfam Hitleram, zahinuli sotni tysiač ludziej. Pry sprobie ŭciokaŭ u Šviejcaryju ŭ 1945 hodzie Musalini byŭ rasstralany partyzanami kala voziera Koma. Jaho mahiła ŭ paŭnočnaitaljanskim horadzie Predapia — miesca sustreč nieafašystaŭ.
Kamientary